മിലാന്‍-ബാഴ്‌സലോണ മത്സരം സമനിലയില്‍

മ്യൂണിക്: യൂറോപ്യന്‍ ചാംപ്യന്‍സ് ലീഗിന്റെ ക്വാര്‍ട്ടര്‍ ഫൈനലില്‍ ബയേണ്‍ മ്യൂണിക് ഏകപക്ഷീയമായ രണ്ടു ഗോളുകള്‍ക്ക് മാഴ്‌സെലിയെ തോല്‍പ്പിച്ചു. മറ്റൊരു മത്സരത്തില്‍ എസി മിലാന്‍ ബാഴ്‌സലോണയെ ഗോള്‍രഹിത സമനിലയില്‍ തളച്ചു.

ആദ്യപാദത്തിലെ ആദ്യപകുതി അവസാനിക്കുന്നതിനു തൊട്ടുമുമ്പ് ഗോമസാണ് മ്യൂണിക്കിനുവേണ്ടി ആദ്യ ഗോള്‍ നേടിയത്. 69ാം മിനിറ്റില്‍ റോബന്‍ രണ്ടാം ഗോളും നേടിയതോടെ ആധികാരിക വിജയം ഉറപ്പാക്കി. രണ്ടാം പാദ മത്സരത്തിനുശേഷം വിജയിക്കുന്നവര്‍ റയല്‍ മാഡ്രിഡുമായി മാറ്റുരയ്ക്കും.

മിലാന്‍-ബാഴ്‌സലോണ മത്സരം സമനിലയില്‍ പിരിഞ്ഞതിനാല്‍ കാംപ്നൗവില്‍ നടക്കുന്ന രണ്ടാം പാദ മത്സരം നിര്‍ണായകമായി.
കളി നിയന്ത്രിച്ചത് ബാഴ്‌സലോണയായിരുന്നെങ്കിലും മിലാന്റെ ശക്തമായ പ്രതിരോധം തിരിച്ചടിയായി. ബാഴ്‌സലോണയുടെ ആക്രമണങ്ങള്‍ക്ക് മികച്ച മറുപടി നല്‍കാന്‍ മിലാന്‍ ശ്രമിച്ചെങ്കിലും ഗോള്‍ മാത്രം ഒഴിഞ്ഞു നിന്നു.