രാജ്യത്തെ ഏറ്റവും വലിയ അവാര്ഡുകളൊന്നിനുവേണ്ടി അപേക്ഷ നല്കേണ്ടിവരികയെന്ന രീതി തന്നെ എന്നെ അദ്ഭുതപ്പെടുത്തിയിട്ടുണ്ട്. അതിന്റെ ഒരു നടപടി അങ്ങനെ തന്നെയായതു കൊണ്ട് ഞാനും അപേക്ഷ നല്കി. മികച്ച പ്രകടനത്തിലൂടെ രാജ്യത്തിന്റെ അഭിമാനമുയര്ത്താന് കഴിഞ്ഞുവെന്നും അതിനാല് ഈ അവാര്ഡിന് അര്ഹയാണെന്നും വിശ്വസിച്ചിരുന്നു. കഴിഞ്ഞ 15 വര്ഷത്തിലധികമായി ഞാന് രാജ്യത്തിനായി കളിക്കുന്നുണ്ട്. എന്നാല് ഇതുകൊണ്ടു കാര്യമില്ലെന്നു എനിക്കു മനസ്സിലായി. ശുപാര്ശ കൂടിയുണ്ടെങ്കില് മാത്രമേ ഇതു ലഭിക്കൂവെന്നു ഇപ്പോള് ബോധ്യപ്പെട്ടു- ഫേസ്ബുക്ക് പേജില് ജ്വാല നിരാശയോടെ കുറിച്ചു.
രാജ്യത്തിനായി തിളങ്ങിയാല് മാത്രമേ പേരേ അതിനൊപ്പം പത്മശ്രീക്കായി എന്തിനാണ് ശുപാര്ശയെന്നും ജ്വാല ചോദിച്ചു. ദില്ലി കോമണ്വെല്ത്ത് ഗെയിംസിലും ഗ്ലാസ്ഗോ കോമണ്വെല്ത്ത് ഗെയിംസിലും രാജ്യത്തിനു മെഡുകള് സമ്മാനിച്ചു. കൂടാതെ ലോക ചാംപ്യന്ഷിപ്പിലും മെഡല് നേടി- ജ്വാല ഫേസ്ബുക്കില് രേഖപ്പെടുത്തി
15 തവണ ദേശീയ തലത്തില് ചാംപ്യനായിട്ടുണ്ട്. ലോക ഡബിള്സിലും മിക്സഡ് ഡബിള്സിലും ആദ്യ 10 റാങ്കിനുള്ളില് എത്തുകയും ചെയ്തിട്ടുണ്ട്. ഒളിംപിക്സില് രണ്ടിനങ്ങളിലേക്കു യോഗ്യത നേടിയ ആദ്യ താരം കൂടിയാണ് ഞാന്. പ്രകാശ് പാദുകോണിനു ശേഷം ലോക ചാംപ്യന്ഷിപ്പില് മെഡല് നേടുന്ന ആദ്യ ഇന്ത്യന് താരവും ഞാനാണ്.
രാജ്യത്ത് ബാഡ്മിന്റണ് ഡബിള്സിനു മേല്വിലാസമുണ്ടാക്കിയത് ഞാനാണ്. മറ്റു താരങ്ങള് ഇതിനെ ഗൗരവമായി കാണാതിരുന്ന സമയമായിരുന്നു അപ്പോള്. ഇത്രയൊക്കെ ചെയ്തിട്ടും പത്മശ്രീ നിഷേധിക്കപ്പെട്ടത് ദുഖകരമാണെന്ന് ജ്വാല പറഞ്ഞു.
നേട്ടങ്ങള് അക്കമിട്ടു നിരത്തിയ ശേഷം ചില ചോദ്യങ്ങള് കൂടി ജ്വാല ചോദിക്കുന്നു. തുറന്നടിക്കുന്ന പ്രകൃതമായതുകൊണ്ടാണോ എന്നെ ഒഴിവാക്കിയത്? എന്തിനാണ് എനിക്ക് അവാര്ഡ് നിഷേധിച്ചത് ? ഇനിയാരോടാണ് അവാര്ഡിനായി ചോദിക്കേണ്ടതെന്ന് അറിയില്ല.
അശ്വിനി പൊന്നപ്പയ്ക്കൊപ്പം മികച്ച നേട്ടങ്ങളുണ്ടാക്കാന് ജ്വാലയ്ക്കായിട്ടുണ്ട്. രാജ്യത്തിന്റെ ഏറ്റവും മിക്ച്ച ഡബിള്സ് ജോടിയായാണ് ഇരുവരും വിലയിരുത്തപ്പെടുന്നത്. 2015ലെ ലോക റാങ്കിങില് ഈ സഖ്യം 10ാംസ്ഥാനത്തെത്തി ചരിത്രം കുറിച്ചിരുന്നു.
2011ല് രാജ്യത്തിനായി നല്കിയ സമഗ്ര സംഭാവനകള് പരിഗണിച്ചു ജ്വാലയ്ക്ക് അര്ജുന അവാര്ഡ് സമ്മാനിച്ചിരുന്നു.
ഇന്ത്യന് ക്രിക്കറ്റ് ടീം ക്യാപ്റ്റന് വിരാട് കോലി, ഹോക്കി ടീം നായകനായ മലയാളി താരം പി ആര് ശ്രീജേഷ്, ഒളിംപിക്സ് മെഡല് ജേതാവ് സാക്ഷി മാലിക്ക്, പാരാലിംപിക്സ് മെഡല് വിജയികളായ ദീപ മാലിക്ക്, മാരിയപ്പന് തങ്കവേലു, ജിംനാസ്റ്റിക്സ് താരം ദീപ കര്മാക്കര്, ഡിസ്കസ് ത്രോ താരം വികാസ് ഗൗഡ എന്നിവര്ക്ക് ഇത്തവണ പത്മശ്രീ നല്കിയിരുന്നു.