മിക്‌സഡ് മാർഷ്യൽ ആർട്‌സിൽ ഇന്ത്യക്ക് ചരിത്ര നേട്ടം; വെങ്കലം നേടി, തോറ്റത് വെറും 700 ഗ്രാമിന്റെ പേരിൽ!

ന്യൂഡൽഹി: ഏഷ്യൻ ഗെയിംസിലെ വനിതകളുടെ 60 കിലോഗ്രാം പരമ്പരാഗത മിക്‌സഡ് മാർഷ്യൽ ആർട്‌സ് മത്സരത്തിൽ ഇന്ത്യയുടെ സുചിക തരിയാൽ വെങ്കല മെഡൽ നേടി. തിങ്കളാഴ്‌ച നടന്ന ആവേശകരമായ സെമിഫൈനലിൽ സിംഗപ്പൂരിന്റെ ഹുയി ഹൂൺ ടിയോയോട് തോറ്റതോടെയാണ് സുചികയ്ക്ക് വെങ്കലത്തിൽ ഒതുങ്ങേണ്ടിവന്നത്.

സെമിഫൈനൽ മത്സരം ആദ്യം സമനിലയിൽ അവസാനിച്ചിരുന്നു. ഇന്ത്യയുടെ അപ്പീൽ അംഗീകരിച്ചതിന് പിന്നാലെയാണ് അന്തിമ തീരുമാനം വന്നത്. എന്നാൽ അന്താരാഷ്ട്ര മിക്‌സഡ് മാർഷ്യൽ ആർട്‌സ് ഫെഡറേഷന്റെ നിയമപ്രകാരം രാവിലെ നടന്ന തൂക്ക പരിശോധനയിലെ ഭാരത്തിന്റെ അടിസ്ഥാനത്തിലാണ് വിജയിയെ തീരുമാനിച്ചത്. സുചികയേക്കാൾ 700 ഗ്രാം ഭാരം കുറവായിരുന്ന ടിയോ ഇതോടെ ഫൈനലിലേക്ക് മുന്നേറി.

ഏകദേശം ഒരു ടാബ്ലറ്റ് കമ്പ്യൂട്ടറിന്റെയോ കട്ടിയുള്ള ഒരു പുസ്‌തകത്തിന്റെയോ ഭാരത്തിന് തുല്യമാണ് ഈ വ്യത്യാസം. ഏഷ്യൻ ഗെയിംസിൽ മിക്‌സഡ് മാർഷ്യൽ ആർട്‌സ് ആദ്യമായി ഉൾപ്പെടുത്തിയിരിക്കെയാണ് ഇന്ത്യക്ക് ഈ ചരിത്ര മെഡൽ ലഭിച്ചത്. മിക്‌സഡ് മാർഷ്യൽ ആർട്‌സിൽ ഏഷ്യൻ ഗെയിംസിലെ ഇന്ത്യയുടെ ആദ്യ മെഡലാണിത്. മത്സരത്തിലെ അന്തിമ തീരുമാനം ടിയോയ്ക്ക് അനുകൂലമായി പ്രഖ്യാപിച്ചതോടെ 36കാരിയായ സുചിക മൈതാനത്ത് കണ്ണീരിലായി.

എന്താണ് മോർണിംഗ് വെയ്റ്റ് റൂൾ?

സാധാരണയായി ടൂർണമെന്റുകളിൽ മത്സരം സമനിലയിലാകുമ്പോൾ വിജയിയെ കണ്ടെത്താൻ ഉപയോഗിക്കുന്ന ഒരു ടൈ-ബ്രേക്കർ നിയമമാണ്. അന്താരാഷ്ട്ര അമച്വർ സംഘടനയായ ഐഎംഎംഎഎഫ് (IMMAF) നിയമപ്രകാരം, ഒരു ഫൈറ്റ് സമനിലയിൽ അവസാനിച്ചാൽ അന്ന് രാവിലെ നടത്തിയ ഭാരപരിശോധനയിൽ ഏത് ഫൈറ്റർക്കാണോ ശരീരഭാരം കുറവായിരുന്നത് അവരെ വിജയിയായി പ്രഖ്യാപിക്കും.

അതേസമയം, ഈ വെങ്കല മെഡലോടെ ഏഷ്യൻ ഗെയിംസിൽ ഇന്ത്യയുടെ മെഡൽ നേട്ടം ആറായി. ഷൂട്ടർമാർ ഇതുവരെ നാല് വെള്ളിയും ഒരു വെങ്കലവും നേടിയിട്ടുണ്ട്. ഹരിയാനയിലെ റോഹ്തക് ജില്ലയിലെ കിലോയ് ഗ്രാമത്തിൽ നിന്നുള്ള താരമാണ് സുചിക തരിയാൽ. 2024ലെ ജിയു ജിറ്റ്സു ലോക ചാമ്പ്യൻ കൂടിയാണ് സുചിക. 2022 കോമൺവെൽത്ത് ഗെയിംസിൽ ജൂഡോയിലും 2022 ഏഷ്യൻ ഗെയിംസിൽ കുറാഷിലും ഇന്ത്യയെ പ്രതിനിധീകരിച്ചിട്ടുണ്ട്.

സെമിഫൈനൽ മത്സരത്തിന് ശേഷം ഫലം അംഗീകരിക്കാൻ കഴിയില്ലെന്ന് സുചിക പ്രതികരിച്ചു. താൻ മത്സരം വിജയിച്ചതായി കരുതിയിരുന്നെന്നും ഫലം നിരാശപ്പെടുത്തിയെന്നും അവർ പറഞ്ഞു. മത്സരത്തിന്റെ ഇരു റൗണ്ടുകളിലും മികച്ച പ്രകടനം നടത്തിയെന്നും എതിരാളിയെ വീഴ്ത്തിയെന്നും സുചിക വ്യക്തമാക്കി. താൻ 100 ശതമാനം കഴിവും പരിശ്രമവും നൽകി മത്സരിച്ചെന്നും തീരുമാനം അന്യായമാണെന്ന് തോന്നിയതിനാലാണ് പ്രതിഷേധിച്ചതെന്നും സുചിക പറഞ്ഞു.