ഏഷ്യന്‍ ഗുസ്തി ചാമ്പ്യന്‍ഷിപ്പ്; തകര്‍പ്പന്‍ പ്രകടനത്തോടെ ബജ്‌രംഗ് പൂണിയയ്ക്ക് സ്വര്‍ണം

ഷിയാന്‍: ചൈനയിലെ ഷിയാനില്‍ നടന്നുവരുന്ന ഏഷ്യന്‍ ഗുസ്തി ചാമ്പ്യന്‍ഷിപ്പില്‍ ഇന്ത്യയുടെ ബജ്‌രംഗ് പൂണിയയ്ക്ക് സ്വര്‍ണം. പുരുഷന്മാരുടെ 65 കിലോഗ്രാം വിഭാഗത്തില്‍ ലോക ഒന്നാം നമ്പറായ ഇന്ത്യന്‍ താരം കസാഖിസ്താന്റെ സായത്‌ബെക്ക് ഒക്കാസോവിനെ 12-7 എന്ന സ്‌കോറിനാണ് കീഴ്‌പ്പെടുത്തിയത്. തോല്‍വി മുന്നില്‍കണ്ടുനില്‍ക്കുമ്പോഴായിരുന്നു ബജ്‌രംഗിന്റെ തകര്‍പ്പന്‍ തിരിച്ചുവരവ്.

തുടക്കം മുതല്‍ ആധിപത്യം സ്ഥാപിച്ച കസാഖ് താരം മത്സരം അവസാനിക്കാന്‍ 60 സെക്കന്റുകള്‍ ശേഷിക്കെ 7-2 എന്ന നിലയില്‍ മുന്നിലായിരുന്നു. എന്നാല്‍, അസാമാന്യ മെയ് വഴക്കവും സ്റ്റാമിനയും പുറത്തെടുത്ത ബജ്‌രംഗ് തുടര്‍ച്ചയായ 10 പോയന്റുകള്‍ നേടിയാണ് എതിരാളിയെ മലര്‍ത്തിയടിച്ചത്. ഏഷ്യന്‍ ചാമ്പ്യന്‍ഷിപ്പിലെ രണ്ടാം സ്വര്‍ണം ഇതോടെ ബജ്‌രംഗിന് സ്വന്തമായി. ഇന്ത്യന്‍താരം 2017ലും ഇവിടെ ചാമ്പ്യനായിരുന്നു.

അതേസമയം, മറ്റൊരു ഇന്ത്യന്‍ താരം പ്രവീണ്‍ റാണ ഫൈനലില്‍ തോല്‍വിവഴങ്ങി. 79 കിലോഗ്രാം വിഭാഗത്തില്‍ ഇറാനിയന്‍ താരം ബഹ്മാന്‍ മുഹമ്മദ് തെയ്‌മോറിയോട് 3-0 എന്ന സ്‌കോറിനാണ് പ്രവീണ്‍ പരാജയപ്പെട്ടത്. 97 കിലോഗ്രാം വിഭാഗത്തില്‍ സത്യവ്രത് കഡിയന്‍ വെങ്കലവും സ്വന്തമാക്കി. ടൂര്‍ണമെന്റില്‍ ഇതുവരെ ഇന്ത്യ 5 മെഡലുകള്‍ നേടിയിട്ടുണ്ട്.