റിയോ ഒളിംപിക്‌സ്; അമ്പെയ്ത്തില്‍ മിന്നുന്ന പ്രകടനവുമായി ബൊംബായ്‌ലാ ദേവി പ്രീ ക്വാര്‍ട്ടറില്‍

റിയോ: വനിതാ വിഭാഗം വ്യക്തിഗത അമ്പെയ്ത്തില്‍ ഇന്ത്യയുടെ ബൊംബായ്‌ല ദേവി പ്രീ ക്വാര്‍ട്ടറില്‍ പ്രവേശിച്ചു. എലിമിനേഷന്‍ റൗണ്ടില്‍ ചൈനീസ് തായ്‌പേയിയുടെ ലിന്‍ ഷിയെ 6-2 ന് ബൊംബെയ്‌ലാ പരാജയപ്പെടുത്തി. ലോക ചാമ്പ്യന്‍ഷിപ്പില്‍ വെള്ളിമെഡല്‍ നേടിയ താരമാണ് ലിന്‍ ഷി.

108-101 എന്നായിരുന്നു സ്‌കോര്‍. നാലില്‍ മൂന്ന് സെറ്റും അനായാസമായി സ്വന്തമാക്കിയാണ് ബൊംബെയ്‌ല മികച്ച് നിന്നത്. പിഴവുകള്‍ വരുത്താതെ ആത്മവിശ്വാസത്തോടെ വില്ലുകുലച്ച ഇന്ത്യന്‍ താരത്തിന് മുന്നില്‍ ലിന്‍ ഷി അടിയറവ് പറയുകയായിരുന്നു. വ്യാഴാഴ്ചയാണ് ബൊംബെയ്‌ലയുടെ പ്രീ ക്വാര്‍ട്ടര്‍ പോരാട്ടം.

നാലു സെറ്റിലുമായി ബൊംബെയ്‌ലാ മൊത്തം നാലു തവണ പത്ത് പോയിന്റ് നേടി. 27-24, 27-24, 26-27, 28-26. എന്നിങ്ങിനെയാണ് പോയിന്റുകള്‍. ഹോക്കിയിലും ഷൂട്ടിങ്ങിലും ഇന്ത്യ പരാജയപ്പെട്ടപ്പോള്‍ ബൊംബായ്‌ലാ ദേവിയുടെ പ്രകടനമാണ് ആരാധകര്‍ക്ക് ആശ്വാസമായത്.