ഏഷ്യന്‍ കബഡി: ഇന്ത്യ-പാക് ഫൈനല്‍

ലാഹോര്‍: ഏഷ്യാ കപ്പ് കബഡി ചാംപ്യന്‍ഷിപ്പില്‍ ചിരവൈരികളായ ഇന്ത്യയും പാകിസ്താനും ഏറ്റുമുട്ടും. പാകിസ്താനിലെ പഞ്ചാബ് സ്‌പോര്‍ട്‌സ് സ്‌റ്റേഡിയത്തില്‍ നടന്ന മത്സരത്തില്‍ പാകിസ്താന്‍ 46-26 എന്ന സ്‌കോറില്‍ ശ്രീലങ്കയെയും ഇന്ത്യ കരുത്തരായ ഇറാനെ 53-35 എന്ന സ്‌കോറിലും മറികടന്നു.

ഇന്ത്യന്‍ നിര മികച്ചതാണ്. പക്ഷേ, അവരെ അട്ടിമറിച്ച് ട്രോഫി ഞങ്ങള്‍ തന്നെ നേടും. മാനസികമായും ശാരീരികമായും ഞങ്ങള്‍ അതിനു തയ്യാറായി കഴിഞ്ഞു-പാകിസ്താന്‍ നായകന്‍ മുഷാറഫ് ജാവേദ് പറഞ്ഞു.

ആറു ടീമുകളാണ് ഏഷ്യാ കപ്പ് ടൂര്‍ണമെന്റിനുവേണ്ടി മാറ്റുരച്ചത്. ഫൈനല്‍ നടക്കുന്ന തിങ്കളാഴ്ച മൂന്നാം സ്ഥാനത്തിനുവേണ്ടി ശ്രീലങ്കയും ഇറാനും ഏറ്റുമുട്ടും.

ഞായറാഴ്ച രാത്രി നടന്ന മത്സരത്തില്‍ നേപ്പാളിനെ 32-3 എന്ന സ്‌കോറില്‍ കെട്ടുകെട്ടിച്ച് അഫ്ഗാനിസ്താന്‍ അഞ്ചാം സ്ഥാനം സ്വന്തമാക്കി.

വിജയികള്‍ക്ക് 15 ലക്ഷം രൂപയും രണ്ടാം സ്ഥാനത്തെത്തുന്നവര്‍ക്ക് 10 ലക്ഷം രൂപയും മൂന്നാം സ്ഥാനത്തെത്തുന്നവര്‍ക്ക് അഞ്ചു ലക്ഷം രൂപയും സമ്മാനമായി ലഭിക്കും.