പ്രോ കബഡി ലീഗ്; ജയ്പൂരിന് മൂന്നാം ജയം, ആദ്യ ജയവുമായി യുപി യോദ്ധയും

മുംബൈ: പ്രോ കബഡി ലീഗ് ഏഴാം സീസണിലെ ബുധനാഴ്ച നടന്ന മത്സരത്തില്‍ ജയ്പൂര്‍ പിങ്ക് പാന്ഥേഴ്‌സും യുപി യോദ്ധയും ജയിച്ചു. ഹരിയാണ സ്റ്റീലേഴ്‌സിനെതിരെ ഏകപക്ഷീയമായ ജയമാണ് ജയ്പൂര്‍ സ്വന്തമാക്കിയത്. സ്‌കോര്‍ 37-21. യു മുംബയെ 27-23 എന്ന സ്‌കോറിന് വീഴ്ത്തി യു പി യോദ്ധ സീസണിലെ ആദ്യ ജയവും നേടി. മൂന്നു കളികളില്‍ മൂന്നിലും ജയിച്ച ജയ്പൂര്‍ ആണ് പോയന്റ് പട്ടികയില്‍ ഒന്നാം സ്ഥാനത്ത്.

മൂന്നു കളികളില്‍ രണ്ടിലും തോറ്റ ഹരിയാണയ്‌ക്കെതിരെ ജയ്പൂര്‍ തുടക്കം മുതല്‍ ലീഡെടുത്ത് മുന്നേറി. ദീപക് ഹൂഡ 14 പോയന്റുകളാണ് സ്വന്തമാക്കിയത്. ടാക്കിളിങ്ങില്‍ ഒരിക്കല്‍ക്കൂടി മിന്നിയ സന്ദീപ് ദുള്‍ 6 പോയന്റും നേടി. റെയ്ഡില്‍ നിറം മങ്ങിയ ഹരിയാണയ്ക്കുവേണ്ടി വിനയ് 6 പോയന്റ് നേടിയപ്പോള്‍ പ്രതിരോധത്തില്‍ തിളങ്ങിയ സുനില്‍ 6 പോയന്റും സ്വന്തമാക്കി.

സീസണില്‍ മോശം പ്രകടനവുമായി തുടങ്ങിയ യു പി യോദ്ധ ഒടുവില്‍ യു മുംബയ്‌ക്കെതിരെ ആശ്വാസ ജയമാണ് സ്വന്തമാക്കിയത്. ടീമിനുവേണ്ടി മോനു ഗോയാത് 6 റെയ്ഡ് പോയന്റുകള്‍ നേടി. പ്രതിരോധത്തില്‍ മികവുകാട്ടിയ സുമിത് 6 ഉം അഷു സിങ് 4 ഉം പോയന്റു സ്വന്തമാക്കി. യു മുംബയ്ക്കുവേണ്ടി രോഹിത് ബലിയന്‍ 6 പോയന്റുമായി ടോപ് സ്‌കോററായി. സുരീന്ദര്‍ സിങ് 4 ടാക്കിള്‍ പോയന്റുകളും നേടിയെങ്കിലും മറ്റു കളിക്കാര്‍ തിളങ്ങിയില്ല.