അങ്ങനെ എല്ലാം തീരുമാനമായി; പ്രോ കബഡി ലീഗ് സീസൺ 12 പ്ലേഓഫുകളുടെ സമ്പൂർണ വിവരങ്ങൾ പുറത്ത്

ന്യൂഡൽഹി: പ്രോ കബഡി ലീഗ് 2025 സീസൺ പ്ലേഓഫ് ഘട്ടത്തിലേക്ക് കടക്കുമ്പോൾ, മത്സരങ്ങൾ കൂടുതൽ ആവേശകരമാവുകയാണ്. ഡൽഹിയിൽ നടക്കുന്ന പ്ലേഓഫ് മത്സരങ്ങൾ കബഡി ആരാധകർ പ്രതീക്ഷയോടെയാണ് കാത്തിരിക്കുന്നത്. പുതുതായി അവതരിപ്പിച്ച പ്ലേഓഫ് സംവിധാനം ചിലർക്ക് ആശയക്കുഴപ്പമുണ്ടാക്കിയേക്കാം, എങ്കിലും ഇത് ടൂർണമെന്റിന് കൂടുതൽ സുതാര്യതയും സന്തുലിതാവസ്ഥയും നൽകാനാണ് ലക്ഷ്യമിടുന്നത്. ഈ വർഷം ആകെ ഒമ്പത് പ്ലേഓഫ് മത്സരങ്ങളാണ് അരങ്ങേറുന്നത്.

പുതിയ പികെഎൽ പ്ലേഓഫ് സംവിധാനം അനുസരിച്ച് എട്ട് ടീമുകളാണ് പ്ലേഓഫിലേക്ക് യോഗ്യത നേടുന്നത്. ഇതിൽ പ്ലേ-ഇൻ ഘട്ടം, മിനി-ക്വാളിഫയർ, എലിമിനേറ്ററുകൾ എന്നിവ ഉൾപ്പെടുന്നു. ആദ്യ നാല് സ്ഥാനക്കാർക്ക് എലിമിനേറ്ററുകളിലും ക്വാളിഫയറുകളിലും മുൻഗണന ലഭിക്കുമ്പോൾ, അഞ്ച് മുതൽ എട്ട് വരെയുള്ള ടീമുകൾ പ്ലേ-ഇൻ ഘട്ടത്തിൽ മാറ്റുരയ്ക്കും. ആദ്യ രണ്ട് സ്ഥാനക്കാർ ക്വാളിഫയർ 1 കളിക്കുകയും വിജയി നേരിട്ട് ഫൈനലിലേക്ക് കടക്കുകയും ചെയ്യും.

അഞ്ച് മുതൽ എട്ട് വരെ സ്ഥാനങ്ങളിൽ ഫിനിഷ് ചെയ്‌ത്‌ ടീമുകൾ രണ്ട് പ്ലേ-ഇൻ മത്സരങ്ങളിൽ ഏറ്റുമുട്ടും. ഇതിലെ വിജയികൾ എലിമിനേറ്റർ 1 ലേക്ക് മുന്നേറും. എലിമിനേറ്റർ 1 ലെ ആദ്യ മത്സരം അഞ്ചാം സ്ഥാനക്കാരും എട്ടാം സ്ഥാനക്കാരും തമ്മിലായിരിക്കും. രണ്ടാമത്തെ മത്സരം ആറാം സ്ഥാനക്കാരും ഏഴാം സ്ഥാനക്കാരും തമ്മിൽ നടക്കും.

പോയിന്റ് പട്ടികയിൽ മൂന്നും നാലും സ്ഥാനങ്ങളിൽ എത്തിയ ടീമുകൾ മിനി-ക്വാളിഫയറിൽ ഏറ്റുമുട്ടും. ഈ മത്സരത്തിലെ വിജയി നേരിട്ട് എലിമിനേറ്റർ 3 ലേക്ക് യോഗ്യത നേടും. മിനി-ക്വാളിഫയറിലെ പരാജിതർക്ക് ഒരു രണ്ടാം അവസരം ലഭിക്കും; അവർ എലിമിനേറ്റർ 1 ലെ വിജയികളുമായി എലിമിനേറ്റർ 2 ൽ മത്സരിക്കും.

എലിമിനേറ്റർ മത്സരങ്ങൾ ഇപ്രകാരമാണ്: എലിമിനേറ്റർ 1ൽ രണ്ട് പ്ലേ-ഇൻ വിജയികൾ മത്സരിക്കും. എലിമിനേറ്റർ 2ൽ മിനി-ക്വാളിഫയറിലെ പരാജിതരും എലിമിനേറ്റർ 1 ലെ വിജയിയും തമ്മിൽ ഏറ്റുമുട്ടും. എലിമിനേറ്റർ 3ൽ മിനി-ക്വാളിഫയറിലെ വിജയിയും എലിമിനേറ്റർ 2 ലെ വിജയിയും തമ്മിൽ കളിക്കും. എലിമിനേറ്റർ 3 ലെ വിജയി ക്വാളിഫയർ 2 ലേക്ക് കടക്കും.

ഫൈനൽ പ്രവേശനത്തിനുള്ള ക്വാളിഫയറുകൾ ഇങ്ങനെയാണ്: ലീഗിലെ ആദ്യ രണ്ട് സ്ഥാനക്കാർ ക്വാളിഫയർ 1 ൽ ഏറ്റുമുട്ടും. ഇതിലെ വിജയി നേരിട്ട് ഫൈനലിൽ പ്രവേശിക്കും. പരാജയപ്പെടുന്ന ടീമിന് ക്വാളിഫയർ 2 ൽ ഒരു രണ്ടാം അവസരം ലഭിക്കും. ക്വാളിഫയർ 2ൽ ക്വാളിഫയർ 1 ലെ തോറ്റ ടീമും എലിമിനേറ്റർ 3 ലെ വിജയിയും മത്സരിക്കും. ക്വാളിഫയർ 2 ലെ വിജയിയാകും രണ്ടാമത്തെ ഫൈനലിസ്റ്റ്.

ക്വാളിഫയർ 1 ലെ വിജയിയും ക്വാളിഫയർ 2 ലെ വിജയിയും തമ്മിലാണ് എല്ലാവരും കാത്തിരിക്കുന്ന പികെഎൽ 2025 ഫൈനൽ അരങ്ങേറുക. ഈ പുതിയ സംവിധാനം അനുസരിച്ച്, ആദ്യ രണ്ട് സ്ഥാനങ്ങളിൽ എത്തുന്ന ടീമുകൾക്ക് കുറഞ്ഞത് രണ്ട് പ്ലേഓഫ് മത്സരങ്ങൾ മാത്രം കളിച്ചാൽ പികെഎൽ കിരീടം നേടാൻ സാധിക്കും. എന്നാൽ, അഞ്ച് മുതൽ എട്ട് വരെയുള്ള ടീമുകൾക്ക് കിരീടം നേടണമെങ്കിൽ ആറ് പ്ലേഓഫ് മത്സരങ്ങളിലും വിജയിക്കേണ്ടതുണ്ട്.

പികെഎൽ 2025 പ്ലേഓഫ് മത്സരങ്ങൾ ഒക്ടോബർ 25 ന് ആരംഭിച്ച് ഒക്ടോബർ 31ന് ഫൈനലോടെ അവസാനിക്കും. ഒക്ടോബർ 25 ന് ആദ്യ രണ്ട് മത്സരങ്ങളും, ഒക്ടോബർ 26 ന് മൂന്നും നാലും മത്സരങ്ങളും, ഒക്ടോബർ 27 ന് അഞ്ചും ആറും മത്സരങ്ങളും, ഒക്ടോബർ 28 ന് ഏഴാം മത്സരവും, ഒക്ടോബർ 29 ന് എട്ടാം മത്സരവും, ഒക്ടോബർ 31 ന് ഒമ്പതാം മത്സരവും നടക്കുന്ന രീതിയിലാണ് ഫിക്‌സചർ തയ്യാറാക്കിയിരിക്കുന്നത്.