ആവേശപ്പോരാട്ടം തലസ്ഥാനത്ത്; പ്രോ കബഡി ലീഗ് സീസൺ 12 ഫൈനലിന് ഡൽഹി വേദിയാവും, മത്സരക്രമം പുറത്ത്

ന്യൂഡൽഹി: പ്രോ കബഡി ലീഗ് സീസൺ 12 പ്ലേഓഫുകളുടെയും ഫൈനലിന്റെയും മത്സരക്രമം പ്രഖ്യാപിച്ചു. ഡൽഹിയിലെ ത്യാഗരാജ് സ്‌റ്റേഡിയമാണ് ഇതവണത്തെ ഫൈനലിന് അടക്കം വേദിയാകുന്നത്. സീസൺ 12ന്റെ ഡൽഹി പാദത്തിന് മുന്നോടിയായി നടന്ന പത്രസമ്മേളനത്തിലാണ് ഈ നിർണായക പ്രഖ്യാപനം ഉണ്ടായിരിക്കുന്നത്. ഇനി ഇരുപത് ദിവസങ്ങൾ കൂടിയാണ് ഫൈനൽ മത്സരത്തിന് ശേഷിക്കുന്നത്.

ഒക്ടോബർ 11-നാണ് ഡൽഹി പാദത്തിലെ മത്സരങ്ങൾ ആരംഭിക്കുന്നത്. പികെഎല്ലിന്റെ ചരിത്രത്തിലെ ഏറ്റവും വാശിയേറിയ സീസണുകളിലൊന്നിന്റെ അവസാന ഘട്ടമാണ് ഡൽഹിയിൽ നടക്കുന്നത്. പോയിന്റ് പട്ടികയിൽ ഒന്നാമതുള്ള ദബാംഗ് ഡൽഹി കെസി, ആദ്യ എട്ടിൽ ഇടം ഉറപ്പിച്ചുകഴിഞ്ഞു. ശേഷിക്കുന്ന ഏഴ് സ്ഥാനങ്ങൾക്കായുള്ള പോരാട്ടം അതിനാൽത്തന്നെ ഏറെ ആവേശം നിറഞ്ഞതായിരിക്കും.

ഡൽഹി പാദത്തിലെ മത്സരങ്ങൾ ഒക്ടോബർ 23-ന് അവസാനിക്കും. തുടർന്ന്, ഒക്ടോബർ 25-ന് പ്ലേ-ഇന്നുകളോടെ പ്ലേഓഫ് റൗണ്ടിന് തുടക്കമാകും. അഞ്ച് മുതൽ എട്ട് വരെയുള്ള സ്ഥാനങ്ങളിലെത്തിയ ടീമുകളാണ് പ്ലേ-ഇന്നുകളിൽ മാറ്റുരയ്ക്കുക. ഇതിലെ വിജയികൾ പ്ലേഓഫുകളിലേക്ക് മുന്നേറും.

ഒക്ടോബർ 26 മുതൽ 29 വരെയാണ് പ്ലേഓഫ് മത്സരങ്ങൾ. എലിമിനേറ്ററുകളും ക്വാളിഫയറുകളും ഉൾപ്പെടുന്ന ഈ മത്സരങ്ങൾക്ക് ശേഷം, ഒക്ടോബർ 31 വെള്ളിയാഴ്‌ച ഗ്രാന്റ് ഫിനാലെ നടക്കും. പുതിയ പ്ലേ-ഇൻ ഫോർമാറ്റ് ലീഗിന് കൂടുതൽ ആവേശം പകരും. പികെഎൽ ട്രോഫി നേടാനായി 12 ടീമുകൾക്കും കൂടുതൽ കടുത്ത മത്സരം നേരിടേണ്ടി വരുമെന്ന് ഉറപ്പാക്കുന്നതാണ് ഈ മാറ്റം.

കൂടുതൽ ടീമുകളെ ലീഗിൽ നിലനിർത്താനും മത്സരങ്ങളുടെ തീവ്രത വർധിപ്പിക്കാനും ഈ പുതിയ ഘടന സഹായിക്കുന്നു. ഇത് ആരാധകർക്ക് കൂടുതൽ ആവേശം നിറഞ്ഞ മത്സരങ്ങൾ സമ്മാനിക്കുമെന്നാണ് വിലയിരുത്തൽ. യോഗ്യതയ്ക്കായി എല്ലാ ടീമുകളും കഠിനമായി പരിശ്രമിക്കുമ്പോൾ, ആദ്യ രണ്ട് സ്ഥാനങ്ങളിൽ എത്തുന്ന ടീമുകൾക്ക് വലിയ മുൻതൂക്കം ലഭിക്കും. ഇത് പോയിന്റ് പട്ടികയിലെ പോരാട്ടത്തിന് ചൂട് പകരും.

ഡൽഹിയിലെ ആരാധക പിന്തുണയും ലോകോത്തര ഇൻഡോർ സ്‌റ്റേഡിയം സൗകര്യങ്ങളും കണക്കിലെടുത്ത്, അവസാന പാദ മത്സരങ്ങൾക്കും പ്ലേഓഫുകൾക്കും ഏറ്റവും അനുയോജ്യമായ നഗരമാണ് ഇത്. സീസണിലെ നാലാമത്തെയും അവസാനത്തെയും പാദത്തിന് ആതിഥേയത്വം വഹിക്കുന്ന നഗരത്തിൽ മുമ്പ് നടന്ന വലിയ കബഡി മത്സരങ്ങൾ വലിയ ജനക്കൂട്ടത്തെ ആകർഷിച്ചിട്ടുണ്ട് എന്നതാണ് ശ്രദ്ധേയമായ കാര്യം.