പ്രോ കബഡി ലീഗ്; ബംഗാള്‍ വാരിയേഴ്‌സിനും പൂണേരി പള്‍ട്ടാനും ജയം

ദില്ലി: പ്രോ കബഡി ലീഗിന്റെ ആറാം സീസണിലെ ഗ്രൂപ്പ് മത്സരത്തില്‍ ബംഗാള്‍ വാരിയേഴ്‌സും പൂണേരി പള്‍ട്ടാനും ജയം കണ്ടെത്തി. കടുത്ത ഒരു പോരാട്ടത്തില്‍ തമിഴ് തലൈവാസിനെ 27-24 എന്ന പോയന്റിനാണ് ബംഗാള്‍ കീഴ്‌പ്പെടുത്തിയത്. മറ്റൊരു മത്സരത്തില്‍ ആധികാരിക പ്രകടനം പുറത്തെടുത്ത പൂണേരി പള്‍ട്ടാന്‍ 37-20 എന്ന വമ്പന്‍ മാര്‍ജിനില്‍ തെലുഗ് ടൈറ്റന്‍സിനെ തോല്‍പ്പിച്ചു.

ബംഗാള്‍ വാരിയേഴ്‌സിനായി വിദേശതാരം ലീ ജങ് കുന്‍ 12 പോയന്റുമായി തിളങ്ങി. മണീന്ദര്‍ സിങ് 7 പോയന്റുമായി മികച്ച പിന്തുണയും നല്‍കി. തമിഴ് തലൈവാസിനായി 9 പോയന്റു നേടിയ സുകേഷ് ഹെഗ്‌ഡെയാണ് ടോപ് സ്‌കോററായത്. ക്യാപ്റ്റന്‍ അജയ് താക്കൂറിന് 5 പോയന്റ് നേടാനേ കഴിഞ്ഞുള്ളൂ. പ്ലേ ഓഫില്‍ കളിക്കാന്‍ ബംഗാള്‍ വാരിയേഴ്‌സിന് ഇനിയും അവസമുണ്ടെങ്കിലും തമിഴ് തലൈവാസ് നേരത്തെതന്നെ പുറത്തായിരുന്നു.

പൂണേരി പള്‍ട്ടാനുവേണ്ടി കളിക്കാരുടെ ഓള്‍ റൗണ്ട് പ്രകടനമാണ് വിജയത്തിന് അടിത്തറയായത്. ജിബി മോറെ 10 പോയന്റുമായി ടീമിനെ നയിച്ചപ്പോള്‍ റിങ്കു നല്‍വാള്‍, രവി കുമാര്‍ എന്നിവര്‍ 5 പോയന്റുകള്‍വീതം നേടി തകര്‍പ്പന്‍ പ്രതിരോധം കാഴ്ചവെച്ചു. തെലുഗ് ടൈറ്റന്‍സിനായി ഫര്‍ഹാദ് 5 പോയന്റ് നേടി. സൂപ്പര്‍താരം രാഹുല്‍ ചൗധരിക്ക് ആകെ ഒരു പോയന്റുമാത്രമാണ് നേടാനായത്.