പ്രോ കബഡി ലീഗ്; കരുത്തരുടെ പോരാട്ടത്തില്‍ ബംഗാളിനെ വീഴ്ത്തി ദബാംഗ് ദില്ലി

ദില്ലി: പ്രോ കബഡി ലീഗിന്റെ ആറാം സീസണിലെ ലീഗ് മത്സരത്തില്‍ ബംഗാള്‍ വാരിയേഴ്‌സിന്റെ വിജയക്കുതിപ്പിന് ദബാംഗ് ദില്ലിയുടെ കടിഞ്ഞാണ്‍. കഴിഞ്ഞദിവസം നടന്ന വാശിയേറിയ പോരാട്ടത്തില്‍ 37-31 എന്ന സ്‌കോറിനാണ് ദില്ലി ബംഗാളിനെ വീഴ്ത്തിയത്. ഇരു ടീമുകളും ഗ്രൂപ്പില്‍നിന്നും നേരത്തെ പ്ലേ ഓഫില്‍ കടന്നതിനാല്‍ മത്സരഫലം ഇരുവരെയും ബാധിക്കില്ല.

മീരജ് ഷെയ്ക്കിന്റെ റെയ്ഡുകളാണ് ദില്ലിക്ക് വിജയമൊരുക്കിയത്. മീരജ് 13 പോയന്റുകള്‍ നേടിയപ്പോള്‍ നവീന്‍ കുമാര്‍ 6 പോയന്റുമായി ഉറച്ച പിന്തുണ നല്‍കി. ബംഗാളിനായി മണീന്ദര്‍ സിങ് 9ഉം ഭൂപീന്ദര്‍ സിങ് 5ഉം പോയന്റുകള്‍ നേടി. മത്സരം ഇടവേളയ്ക്ക് പിരിയുമ്പോള്‍ 6 പോയന്റ് ലീഡ് ദില്ലി നേടിയിരുന്നു. എന്നാല്‍ 22-22 എന്ന നിലയില്‍ രണ്ടാംപകുതിയുടെ തുടക്കത്തില്‍ ബംഗാള്‍ തിരിച്ചടിച്ചെങ്കിലും കളിയുടെ അവസാന മിനിറ്റുകളില്‍ ദില്ലി മുന്നില്‍ക്കയറി.

ഗ്രൂപ്പ് ബിയില്‍ 19 മത്സരങ്ങളില്‍നിന്നും 59 പോയന്റുമായി ബംഗാള്‍ വാരിയേഴ്‌സ് രണ്ടാം സ്ഥാനത്താണ്. 20 മത്സരങ്ങളില്‍നിന്നും 72 പോയന്റുള്ള ബെംഗളുരു ബുള്‍സ് ആണ് ഗ്രൂപ്പിലെ ഒന്നാം സ്ഥാനക്കാര്‍. ഗ്രൂപ്പ് എ യില്‍ 22 മത്സരങ്ങളില്‍നിന്നും ദബാംഗ് ദില്ലിക്ക് 68 പോയന്റുണ്ട്. ഗുജറാത്ത് ഫോര്‍ച്യൂണ്‍ ജയന്റ്‌സ്, യു മുംബ ടീമുകള്‍ക്ക് പിറകില്‍ മൂന്നാം സ്ഥാനത്താണ് ദില്ലി.