എന്താണ് യു മുംബയുടെ കരുത്ത്? മനസ് തുറന്ന് നായകൻ സുനിൽ കുമാർ; 'സന്തുലിതമാണ് ഞങ്ങളുടെ ടീം'

പ്രോ കബഡി ലീഗ് സീസൺ പന്ത്രണ്ട് ആവേശകരമായി മുന്നേറുകയാണ്. യു മുംബയ്ക്ക് മികച്ച തുടക്കമാണ് ലഭിച്ചിരിക്കുന്നത്. ടീമിന്റെ പ്രതിരോധത്തിലെയും മുന്നേറ്റത്തിലെയും സന്തുലിതാവസ്ഥയാണ് തങ്ങളെ വേറിട്ടു നിർത്തുന്നതെന്ന് ക്യാപ്റ്റൻ സുനിൽ കുമാർ തന്നെ സാക്ഷ്യപ്പെടുത്തുന്നു. ജിയോസ്‌റ്റാർ സംഘടിപ്പിച്ച പരിപാടിയിലാണ് സുനിൽ ഇക്കാര്യം വ്യക്തമാക്കിയത്. ടീമിന്റെ ഈ ഇരട്ട ശക്തിയാണ് ഘടന രൂപപ്പെടുത്തുന്നതെന്നും അദ്ദേഹം കൂട്ടിച്ചേർത്തു.

വിജയകരമായ ഏതൊരു ടീമിന്റെയും അടിസ്ഥാനം പ്രതിരോധമാണ്. ഒപ്പം ലീഗിലെ മികച്ച റെയ്‌ഡർമാരെ ടീം മാനേജ്‌മെന്റ് തങ്ങൾക്ക് നൽകിയെന്ന് അദ്ദേഹം പറഞ്ഞു. റെയ്‌ഡർമാർ ഇതുവരെ എല്ലാ മത്സരങ്ങളിലും പോയിന്റ് നേടിയിട്ടുണ്ട്. ആദ്യ മത്സരങ്ങളിൽ പ്രതിരോധത്തിൽ പിഴവുകളുണ്ടായെങ്കിലും അതിപ്പോൾ മെച്ചപ്പെട്ടു. കഴിഞ്ഞ മത്സരത്തിൽ പ്രതിരോധം മികച്ച പ്രകടനമാണ് കാഴ്‌ചവെച്ചത്. അതിനാൽ, ടീം രണ്ട് മേഖലകളിലും ഒരുപോലെ ശക്തമാണെന്ന് തനിക്ക് തോന്നുന്നുവെന്നും അദ്ദേഹം വ്യക്തമാക്കി.

സെപ്റ്റംബർ 5-ന് വിശാഖപട്ടണത്ത് നടന്ന മത്സരത്തിൽ ബെംഗളൂരു ബുൾസിനെ 48-28 എന്ന സ്കോറിന് യു മുംബ തകർത്തപ്പോൾ ഈ സന്തുലിതാവസ്ഥ പ്രകടമായിരുന്നു. 27-ാം മിനിറ്റിൽ പരിക്കേറ്റ് പുറത്തുപോകുന്നതിന് മുമ്പ് 13 പോയിന്റുകൾ (12 ടച്ച് പോയിന്റുകളും ഒരു ബോണസും) നേടി റെയ്‌ഡർ അജിത് ചൗഹാൻ തിളങ്ങി. മത്സരത്തിനിടയിൽ അജിത് പുറത്തായെങ്കിലും, യു മുംബ നിയന്ത്രണം നിലനിർത്തുകയും മികച്ച വിജയം നേടുകയും ചെയ്‌തു.

ഈ വിജയത്തോടെ നാല് കളികളിൽ നിന്ന് മൂന്ന് ജയവും +23 പോയിന്റ് വ്യത്യാസവുമായി അവർ ലീഗ് പട്ടികയിൽ രണ്ടാം സ്ഥാനത്തെത്തി. എട്ട് പോയിന്റുള്ള ദബാംഗ് ഡൽഹിയുടെ പിന്നിലാണ് അവർ. ഡൽഹിക്ക് +19 എന്ന നേരിയ കുറഞ്ഞ പോയിന്റ് വ്യത്യാസമാണുള്ളത്. ബുൾസുമായുള്ള മത്സരത്തിന് ശേഷം, ടീം അംഗങ്ങളുടെ ഒത്തൊരുമിച്ചുള്ള പ്രയത്നത്തെ സുനിൽ കുമാർ അഭിനന്ദിച്ചു.

'നേരത്തെ നടന്ന കളികളിൽ റെയ്‌ഡർമാരായിരുന്നു പ്രധാന പങ്കുവഹിച്ചിരുന്നത്, എന്നാൽ ബെംഗളൂരുവിനെതിരെ പ്രതിരോധം മികച്ചതായിരുന്നു, അവർ ഇങ്ങനെയൊക്കെ കളിക്കുമ്പോൾ ഞങ്ങളുടെ തുടർച്ചയായ വിജയ സാധ്യതകൾ വർധിക്കുന്നു' സുനിൽ പറഞ്ഞു. തന്റെ പ്രകടനത്തെക്കുറിച്ച് സത്യസന്ധമായ വിലയിരുത്തൽ നടത്തിയ അദ്ദേഹം, തനിക്ക് ടാക്കിൾ ചെയ്യാൻ കഴിയുമായിരുന്ന ചില അവസരങ്ങൾ നഷ്‌ടപ്പെട്ടുവെന്ന് സമ്മതിക്കുകയും ചെയ്‌തു.

എന്നാൽ, ലൊകേഷ്, പർവേഷ്, റിങ്കു, രവി ഭാട്ടി തുടങ്ങിയ ഡിഫൻഡർമാരുടെ മികച്ച പ്രകടനത്തെ അദ്ദേഹം പ്രശംസിച്ചു. 'ടീമിന്റെ മൊത്തത്തിലുള്ള പ്രകടനത്തിൽ ഞാൻ സന്തുഷ്‌ടനാണ്, പക്ഷേ എനിക്ക് സ്വയം മെച്ചപ്പെടുത്താൻ കഴിയുമെന്ന് എനിക്കറിയാം' അദ്ദേഹം കൂട്ടിച്ചേർത്തു. റെയ്‌ഡിങ് മികവും മെച്ചപ്പെട്ട പ്രതിരോധനിരയും ഈ സീസണിൽ യു മുംബയെ ഒരു സുപ്രധാന സ്ഥാനത്തെത്താൻ സഹായിക്കുമെന്നാണ് വിലയിരുത്തൽ.