തുടർച്ചയായ നാലാം ജയം, പികെഎല്ലിൽ തെലുഗു ടൈറ്റൻസ് മുന്നോട്ട്; യുവതാരങ്ങൾക്ക് ക്രെഡിറ്റ് നൽകി പരിശീലകൻ

തിരുവനന്തപുരം: കഴിഞ്ഞ ദിവസം നടന്ന വാശിയേറിയ മത്സരത്തിൽ യുപി യോദ്ധാസിനെ 40-35ന് തകർത്ത് തെലുഗു ടൈറ്റൻസ് വിജയം നേടിയിരുന്നു. ഈ വിജയത്തോടെ പോയിന്റ് പട്ടികയിൽ ടീം തങ്ങളുടെ സ്ഥാനം കൂടുതൽ ഭദ്രമാക്കിയിരിക്കുകയാണ്. ടീമിന്റെ പ്രകടനത്തിൽ പരിശീലകൻ കൃഷൻ കുമാർ ഹൂഡ വലിയ സന്തോഷമാണ് പ്രകടിപ്പിച്ചത്.

മത്സരശേഷം നടന്ന പത്രസമ്മേളനത്തിൽ ഹൂഡ തന്റെ ടീമിന്റെ പ്രകടനത്തെക്കുറിച്ച് സംസാരിച്ചു. 'ഇതൊരു മികച്ച കളിയായിരുന്നു. ഞങ്ങൾ ചെറിയ തെറ്റുകൾ വരുത്തിയിട്ടുണ്ട്, അതിന് ആരെയും കുറ്റപ്പെടുത്താനാകില്ല. ഞങ്ങൾ പ്ലാൻ അനുസരിച്ചാണ് കളിച്ചത്. ഭാരതും വിജയയും അവരുടെ ഭാഗം ഭംഗിയായി ചെയ്‌തു' അദ്ദേഹം പറഞ്ഞു. പ്രതിരോധനിരയ്ക്ക് ചില പാളിച്ചകൾ സംഭവിച്ചെങ്കിലും അടുത്ത കളിയിൽ ഇത് മെച്ചപ്പെടുത്തുമെന്നും അദ്ദേഹം കൂട്ടിച്ചേർത്തു.

തന്റെ ടീം മികച്ച പ്രകടനം കാഴ്‌ചവെച്ചുവെന്ന് ഹൂഡ ചൂണ്ടിക്കാട്ടി. 'കളിയിൽ നിർണായകമായ ചില സൂപ്പർ ടാക്കിളുകൾ ഞങ്ങൾക്ക് ലഭിച്ചു, വരാനിരിക്കുന്ന മത്സരങ്ങളിൽ ടീം ഒരു താളം കണ്ടെത്തുന്നുണ്ട്' അദ്ദേഹം അഭിപ്രായപ്പെട്ടു. കഴിഞ്ഞ ദിവസം ടീമിന്റെ വിജയത്തിൽ നിർണായക പങ്ക് വഹിച്ച പ്രഫുൽ സാവെയുടെ നാല് പോയിന്റ് പ്രകടനത്തെയും അദ്ദേഹം അഭിനന്ദിച്ചു.

സാവെയുടെ പ്രകടനത്തെക്കുറിച്ച് ചോദിച്ചപ്പോൾ ഹൂഡ ഇങ്ങനെയാണ് പ്രതികരിച്ചത്. 'യുവ താരങ്ങൾ ടീമിലെത്തുമ്പോൾ അത് മുതിർന്ന താരങ്ങളിലും നല്ല സ്വാധീനം ചെലുത്തും. വിജയ്, ഭാരത് തുടങ്ങിയ കളിക്കാർ അവരോട് അടുത്ത് ഇടപഴകുകയും ഒരു ഭാരവും നൽകാതിരിക്കുകയും ചെയ്യുന്നു. ഞാൻ യുവ കളിക്കാരോട് ദേഷ്യപ്പെട്ടാൽ പോലും അവർക്ക് എന്നോട് വലിയ സ്നേഹമാണ്'.

'ഞങ്ങൾ മൂന്നോ നാലോ യുവ കളിക്കാരെയാണ് കളിക്കാനിറക്കുന്നത്, അവർ മികച്ച ഫലങ്ങൾ നൽകുന്നുണ്ട്. യുവ കളിക്കാർ മികച്ച പ്രകടനം കാഴ്‌ചവെക്കുമ്പോൾ മുഴുവൻ ടീമിനും അതിന്റെ ഗുണം ലഭിക്കും," അദ്ദേഹം കൂട്ടിച്ചേർത്തു. വിജയ മാലിക് ടീമിൽ ചെലുത്തുന്ന നല്ല സ്വാധീനത്തെക്കുറിച്ചും പരിശീലകൻ ഹൂഡ തുറന്ന് സംസാരിച്ചു.

'ഞങ്ങൾക്ക് കളിയെ നിയന്ത്രിക്കുന്ന ഒരു മികച്ച ക്യാപ്റ്റനുണ്ട്. ആരെങ്കിലും തെറ്റ് ചെയ്‌താലും അദ്ദേഹം ഒന്നും പറയാറില്ല എന്നതാണ് ഏറ്റവും പ്രധാനപ്പെട്ട കാര്യം. അത് നല്ലൊരു കാര്യമാണ്. ക്യാമ്പിനുള്ളിലെ അന്തരീക്ഷം മികച്ചതാണ്. എല്ലാ കളിക്കാരും സന്തോഷത്തിലാണ്. കളിക്കാർ സന്തോഷത്തിലാണെങ്കിൽ പ്രകടനം തനിയെ വരും' ഹൂഡ പറഞ്ഞു.

വരാനിരിക്കുന്ന ഹരിയാന സ്‌റ്റീലേഴ്‌സിനെതിരായ മത്സരത്തെക്കുറിച്ച് ടീം ക്യാപ്റ്റൻ വിജയ് മാലിക് സംസാരിച്ചു. "എല്ലാ കളികളും വെല്ലുവിളിയാണ്, കാരണം എല്ലാ ടീമുകളും മികച്ചതാണ്. ഹരിയാന സ്‌റ്റീലേഴ്‌സിന് ജയദീപും രാഹുൽ സേത്ത്പാലും പോലുള്ള മികച്ച കളിക്കാരുണ്ട്. ഞങ്ങളെ സംബന്ധിച്ചിടത്തോളം ഞങ്ങൾ പരമാവധി പ്രകടനം പുറത്തെടുത്ത് അവരിൽ നിന്ന് രണ്ട് പോയിന്റ് നേടാൻ ശ്രമിക്കും' മാലിക് വ്യക്തമാക്കി.