PKL 2025: ഗോള്‍ഡന്‍ റെയ്ഡ് റൂള്‍ നല്ലതാണെന്ന് പവന്‍, 'കളിക്കുക അല്ലെങ്കില്‍ മരിക്കുക എന്നതാണ് ലൈന്‍'

PKL 2025: പ്രോ കബഡി ലീഗ് സീസണ്‍ 12 ആരംഭിക്കാനിരിക്കുകയാണ്. ഇത്തവണ കബഡി ലീഗില്‍ പുതിയ നിയമങ്ങള്‍ ആണ് വരാന്‍ പോകുന്നത്. അതിനാല്‍ തന്നെ എല്ലാവരം ടൂര്‍ണമെന്റിന് മുന്‍പ് തന്നെ ആവേശത്തിലാണ്. പുതിയ നിയമങ്ങളില്‍ ഗോള്‍ഡന്‍ റെയ്ഡ്, ടൈ-ബ്രേക്കര്‍ നിയമങ്ങള്‍ എന്നിവയാണ് ഏറ്റവും വലിയ ചര്‍ച്ചാ വിഷയങ്ങള്‍.

ഈ മാറ്റങ്ങള്‍ കളിക്കാരെ അവരുടെ കംഫര്‍ട്ട് സോണുകളില്‍ നിന്ന് പുറത്താക്കുകയും പ്രതിസന്ധി സാഹചര്യങ്ങളില്‍ അവരുടെ നാഡീവ്യൂഹങ്ങള്‍ പരീക്ഷിക്കുകയും ചെയ്യുമെന്ന് തമിഴ് തലൈവാസ് ക്യാപ്റ്റന്‍ പവന്‍ സെഹ്റാവത്ത് പറഞ്ഞു. ജിയോ സ്റ്റാര്‍ സംഘടിപ്പിച്ച ഒരു മാധ്യമ സെഷനില്‍ സംസാരിക്കവെ ആയിരുന്നു അദ്ദേഹത്തിന്റെ പ്രതികരണം. പുതിയ നിയമങ്ങള്‍ നൂതനവും ആരാധക സൗഹൃദപരവുമാണെന്ന് പവന്‍വിശേഷിപ്പിച്ചു.

'ടൈ-ബ്രേക്കര്‍ നിയമം വളരെ രസകരവും കായികരംഗത്തിന് നല്ലതുമാണ്. ഇത് റൈഡര്‍മാര്‍ക്ക് അവരുടെ കഴിവുകള്‍ മൂര്‍ച്ച കൂട്ടാനും സമ്മര്‍ദ്ദത്തിന് അനുസരിച്ച് മെച്ചപ്പെട്ട പ്രകടനം നടത്താനും അവസരം നല്‍കുന്നു. സമനിലയില്‍ ഒതുങ്ങുന്നതിനുപകരം ടീമുകള്‍ ഇപ്പോള്‍ റിസ്‌ക് എടുക്കേണ്ടതുണ്ട്. ഒന്നുകില്‍ പ്രവര്‍ത്തിക്കുക അല്ലെങ്കില്‍ മരിക്കുക എന്ന സമീപനത്തെ പ്രോത്സാഹിപ്പിക്കുന്നു, ഇത് കളിക്കാര്‍ക്കും കാണികള്‍ക്കും ആവേശകരമാണ്,' അദ്ദേഹം പറഞ്ഞു.

ഗോള്‍ഡന്‍ റെയ്ഡ്, ഉയര്‍ന്ന സമ്മര്‍ദ്ദ നിമിഷങ്ങള്‍ കൈകാര്യം ചെയ്യാന്‍ കഴിവുള്ള റൈഡര്‍മാരെ ശ്രദ്ധാകേന്ദ്രമാക്കും എന്നും പവന്‍ ചൂണ്ടിക്കാട്ടി. ഒന്നിലധികം റെയ്ഡിംഗ് ഓപ്ഷനുകള്‍ ഉള്ള ടീമുകള്‍ക്ക് ഇത് ഗുണം ചെയ്യുമെന്ന് പവന്‍ അഭിപ്രായപ്പെട്ടു. 'ഒരു പ്രത്യേക പ്രതിരോധത്തിനെതിരെ അര്‍ജുന്‍ ദേശ്വാള്‍ കൂടുതല്‍ അനുയോജ്യനാണെന്ന് എനിക്ക് തോന്നുന്നുവെങ്കില്‍, ക്യാപ്റ്റനെന്ന നിലയില്‍ എന്റെ ഉത്തരവാദിത്തം അദ്ദേഹത്തെ അയയ്ക്കുക എന്നതാണ്,' അദ്ദേഹം പറഞ്ഞു.

ഓരോ കളിക്കാരനും ഒരു റോളുണ്ട് എന്നും അത് ശരിയായ സമയത്ത് നിര്‍വഹിക്കുന്നതിനെക്കുറിച്ചാണ് ഈ റൂള്‍ പറയുന്നത് എന്നും അദ്ദേഹം വിശദീകരിച്ചു. അതേസമയം കളിക്കാരന്‍ എന്ന നിലയില്‍ താനും പരിണാമത്തിന് വിധേയമായിട്ടുണ്ട് എന്ന് പവന്‍ സമ്മതിച്ചു. 'സീസണ്‍ 3 ല്‍ കളിച്ച പവന്‍ ഇന്ന് കളിക്കുന്നവരില്‍ നിന്ന് വളരെ വ്യത്യസ്തനാണ്. പുതിയ കളിക്കാരുമായി പരിശീലിക്കുമ്പോള്‍ കഴിവുകള്‍ വികസിച്ചുകൊണ്ടിരിക്കുന്നു. മുന്നില്‍ നില്‍ക്കാന്‍ നിങ്ങള്‍ അവരെ പരിഷ്‌കരിക്കേണ്ടതുണ്ട്,' അദ്ദേഹം പറഞ്ഞു.

ശക്തമോ ദുര്‍ബലമോ ആയ ടീമുകളെക്കുറിച്ചുള്ള സംസാരം ശരിയല്ല എന്നും അദ്ദേഹം പറഞ്ഞു. 'എനിക്ക്, എല്ലാ മത്സരങ്ങളും ഒരുപോലെ വെല്ലുവിളി നിറഞ്ഞതാണ്. എതിരാളിയുടെ ബലഹീനതകള്‍ക്കനുസരിച്ച് ഞങ്ങള്‍ പ്ലാന്‍ ചെയ്യുകയും സ്വന്തമായി പ്രവര്‍ത്തിക്കുകയും ചെയ്യുന്നു. ഞങ്ങളുടെ പ്രതിരോധവും ആക്രമണവും ശക്തമാണ്, സാഹചര്യത്തെ ആശ്രയിച്ച്, ഞങ്ങള്‍ അതിനനുസരിച്ച് പൊരുത്തപ്പെടും,' അദ്ദേഹം കൂട്ടിച്ചേര്‍ത്തു.

അവസാന റെയ്ഡ് വരെ ആരാധകരെ ആകര്‍ഷിക്കുന്നതിനാണ് നിയമ മാറ്റങ്ങള്‍ രൂപകല്‍പ്പന ചെയ്തിരിക്കുന്നതെന്ന് പവന്‍ പറയുന്നു. ഗോള്‍ഡന്‍ റെയ്ഡ് സീസണ്‍ 12 ലേക്ക് കൂടുതല്‍ നാടകീയത ചേര്‍ക്കുമെന്നാണ് കളിക്കാരും കാണികളും വിശ്വസിക്കുന്നത്.