തോറ്റപ്പോഴും തല ഉയർത്തി ദേവാങ്ക്, പ്രോ കബഡിയിലെ ചരിത്ര നേട്ടം സ്വന്തം; അതും 3 മത്സരങ്ങളിൽ നിന്ന്!

പ്രോ കബഡി ലീഗിൽ മത്സരാവേശം മുറുകുകയാണ്. പന്ത്രണ്ടാം സീസണിൽ എത്തി നിൽക്കുമ്പോഴും ടീമുകൾ തമ്മിലുള്ള പോരാട്ടം പഴയതിലും ശക്തമായി തുടരുന്നു. ആദ്യഘട്ടം ആയതിനാൽ ആര് കിരീടത്തിൽ മുത്തമിടുമെന്നോ ഫൈനലിൽ എത്തുമെന്നോ ഒക്കെ പ്രവചിക്കുന്നതും വളരെ നേരത്തെ ആയിപ്പോകും. അതുകൊണ്ട് ഇത്തവണ അതിന് മുതിരുന്നതിൽ അർത്ഥമില്ല. എന്നാൽ ചില റെക്കോർഡ് നേട്ടങ്ങൾ കണ്ടില്ലെന്ന് നടിക്കാൻ കഴിയില്ല.

അത്തരത്തിൽ ഒരു ചരിത്ര നേട്ടം സ്വന്തമാക്കിയത് ബംഗാൾ വാരിയേഴ്‌സ് നായകൻ ദേവാങ്ക് ദലാൽ ആണ്. അതും വമ്പൻ തോൽവിയിലും തല ഉയർത്തിപ്പിടിക്കുന്ന നേട്ടമാണ് അദ്ദേഹം ഉണ്ടാക്കിയിരിക്കുന്നത്. കഴിഞ്ഞ ദിവസം നടന്ന മത്സരത്തിൽ തെലുഗു ടൈറ്റൻസിനോട് ആവുന്ന അത്രയും പൊരുതി നോക്കിയെങ്കിലും അവരെ കീഴടക്കാൻ കഴിഞ്ഞിരുന്നില്ല. എന്നാൽ അവിടെ തന്റെ പോരാട്ട വീര്യം കൊണ്ട് ദേവാങ്ക് ജ്വലിച്ചു നിന്നുവെന്നതാണ് യാഥാർഥ്യം.

ബംഗാൾ വാരിയേഴ്‌സ് vs തെലുഗു ടൈറ്റൻസ്

സീസണിലെ 19-ാം മത്സരത്തിൽ ബംഗാൾ വാരിയേഴ്‌സ് തെലുങ്ക് ടൈറ്റൻസിനോട് 34-44 എന്ന സ്കോറിന് പരാജയപ്പെട്ടു. മത്സരത്തിൽ തെലുഗു ടൈറ്റൻസ് ഓൾറൗണ്ടർ ഭരത് 12 പോയിന്റുകൾ നേടിയപ്പോൾ (11 റെയ്‌ഡ്‌ പോയിന്റുകളും 1 ടാക്കിൾ പോയിന്റും), ക്യാപ്റ്റൻ വിജയ് മാലിക് 11 പോയിന്റുകൾ സംഭാവന ചെയ്‌തു. വാരിയേഴ്‌സിനെതിരെ ഏഴ് ടച്ച് പോയിന്റുകളും മൂന്ന് ബോണസ് പോയിന്റുകളും ഒരു ടാക്കിൾ പോയിന്റും അദ്ദേഹം നേടി.

എന്നാൽ മറുവശത്ത് ഒറ്റയാനെ പോലെ ഉണ്ടായിരുന്നത് ദേവാങ്ക് ആയിരുന്നു. ദേവാങ്ക് ദലാലിന്റെ 13 റെയ്‌ഡ്‌ പോയിന്റുകൾ ശരിക്കും പാഴായി. 10 പോയിന്റുകളുടെ വ്യത്യാസത്തിൽ അവർ മത്സരം തോറ്റു. തോൽവിയോടെ, മൂന്ന് മത്സരങ്ങളിൽ നിന്ന് രണ്ട് പോയിന്റും -9 സ്കോർ വ്യത്യാസവുമുള്ള അവർ പോയിന്റ് പട്ടികയിൽ എട്ടാം സ്ഥാനത്തേക്ക് പിന്തള്ളപ്പെടുകയും ചെയ്‌തു.

റെക്കോർഡ് നേട്ടം സ്വന്തം

തെലുങ്ക് ടൈറ്റൻസിനെതിരെ ഞായറാഴ്‌ച നടന്ന സൂപ്പർ 10 മുന്നേറ്റത്തോടെ പി‌കെ‌എൽ ചരിത്രത്തിൽ ഒരു സീസണിൽ 50 റെയ്‌ഡ്‌ പോയിന്റുകൾ ഏറ്റവും വേഗത്തിൽ നേടുന്ന കളിക്കാരനായി ദേവാങ്ക് ദലാൽ ചരിത്രം കുറിച്ചു. 2019ലെ പി‌കെ‌എല്ലിൽ തെലുങ്ക് ടൈറ്റൻസിനെതിരെ നാല് മത്സരങ്ങളിൽ നിന്ന് 50 റെയ്‌ഡ്‌ പോയിന്റുകൾ നേടിയ സിദ്ധാർത്ഥ് ദേശായിയെ മറികടന്ന് കൊണ്ടാണ് ഈ നേട്ടം.

വെറും മൂന്ന് മത്സരങ്ങൾ കൊണ്ടായിരുന്നു ദേവാങ്ക് ദലാൽ 50 പോയിന്റുകൾ തികച്ചത്. ഒരു പി‌കെ‌എൽ സീസണിൽ അഞ്ച് മത്സരങ്ങൾ വീതമെടുത്ത് 50 റെയ്‌ഡ്‌ പോയിന്റുകൾ മറികടന്ന അനുപ് കുമാറും അജയ് താക്കൂറുമാണ് പട്ടികയിൽ അടുത്ത സ്ഥാനങ്ങളിൽ. പ്രോ കബഡി ലീഗിന്റെ നടപ്പ് സീസണിൽ ബംഗാൾ വാരിയേഴ്‌സിന് വേണ്ടി മൂന്ന് മത്സരങ്ങളിൽ നിന്ന് ദേവാങ്കിന് 51 പോയിന്റുണ്ട്.

ഈ സീസണിൽ 69 റെയ്‌ഡുകളിൽ നിന്ന് മൂന്ന് സൂപ്പർ 10-കളും ഒരു സൂപ്പർ റെയ്‌ഡും അദ്ദേഹത്തിന്റെ പേരിലുണ്ട്. ഹരിയാന സ്‌റ്റീലേഴ്‌സിനെതിരായ സീസൺ ഓപ്പണറിൽ ദേവാങ്ക് 21 പോയിന്റുകൾ (15 ടച്ച് പോയിന്റുകളും 6 ബോണസ് പോയിന്റുകളും) നേടി. പികെഎൽ സീസൺ 10 ചാമ്പ്യന്മാരായ പുനേരി പൽത്താനെതിരായ തന്റെ രണ്ടാമത്തെ മത്സരത്തിൽ 11 ടച്ച് പോയിന്റുകളും ആറ് ബോണസ് പോയിന്റുകളും ഉൾപ്പെടെ 17 പോയിന്റുകളും അദ്ദേഹം കീശയിലാക്കിയിരുന്നു.