പോയിന്റ് പട്ടികയില്‍ ദബാങ് ഡെൽഹിയുടെ ആധിപത്യം: ഗുജാറാത്തിന് വന്‍ നാണക്കേട്

പ്രോ കബഡി ലീഗ് നാല് ആഴ്ച പിന്നിടുമ്പോള്‍ പോയിന്റ് പട്ടികയില്‍ ദബാങ് ഡെൽഹി ഒന്നാമത്. പാട്നയുമായുള്ള മത്സരത്തിലെ തോല്‍വി കനത്ത അഘാതമായെങ്കിലും സ്ഥിരമായ കാഴ്ചവെച്ച മികച്ച പ്രകടനം അവർക്ക് തുടർ വിജയങ്ങള്‍ സമ്മാനിക്കുകയായിരുന്നു. എട്ട് മത്സരങ്ങളിൽ ഏഴെണ്ണത്തിലും വിജയിച്ച ടീമിന് പട്ന പൈറേറ്റ്സിനോട് മാത്രമാണ് പരാജയപ്പെടേണ്ടി വന്നത്. ശക്തമായ മത്സരത്തിന് ഒടുവില്‍ 33-30ന് എന്ന പോയിന്റിലായിരുന്നു തോല്‍വി. മുൻ ചാമ്പ്യന്മാരായ പുണെരി പൽട്ടൻ ഒമ്പത് മത്സരങ്ങളിൽ ആറ് വിജയങ്ങളുമായി മികച്ച സ്കോർ ഡിഫറൻസിന്റെ പിൻബലത്തോടെ പോയിന്റ് പട്ടികയില്‍ രണ്ടാം സ്ഥാനത്താണ്.

കഴിഞ്ഞ വാരം രണ്ട് തുടർ വിജയങ്ങൾ നേടിയ ഹരിയാന സ്റ്റീലേഴ്സ് മൂന്നാം സ്ഥാനത്തെത്തി. തെലുങ്കു ടൈറ്റൻസും രണ്ട് വിജയങ്ങളോടെ നാലാം സ്ഥാനത്തേക്ക് കയറി. ജയ്പൂർ പിങ്ക് പാന്തേഴ്സ് കഴിഞ്ഞ വാരം ഒരു മത്സരം മാത്രമാണ് കളിച്ചതെങ്കിലും ടൈ ബ്രേക്കറിൽ വിജയിച്ച് സ്ഥിരത നിലനിർത്തി. ബെംഗളൂരു ബുൾസ് പത്ത് മത്സരങ്ങളിൽ അഞ്ച് വിജയങ്ങളോടെ ആറാം സ്ഥാനത്താണ്. മോശം സ്കോർ ഡിഫറൻസാണ് അവർക്ക് തിരിച്ചടിയായി മാറിയത്.

രണ്ട് വിജയങ്ങള്‍ മാത്രമുള്ള യുപി യോദ്ധാസാണ് പട്ടികയില്‍ ഐഴാമത്. മോശം ഫോം തുടരുന്ന യു മുംൈബ മൂന്ന് തുടർ തോൽവികളോടെ എട്ടാം സ്ഥാനത്തേക്ക് പിന്തള്ളപ്പെട്ടു. തമിഴ് തലൈവാസ് രണ്ട് തോൽവികളോടെ ഒമ്പതാം സ്ഥാനത്തും, പട്ന പൈറേറ്റ്സ് ഡെൽഹിയെ തോൽപ്പിച്ച് പത്താം സ്ഥാനത്തുമെത്തി. ബംഗാൾ വാരിയേഴ്സ് പതിനൊന്നാം സ്ഥാനത്ത് തുടരുമ്പോള്‍ ഗുജറാത്ത് ജയന്റ്സ് എട്ട് മത്സരങ്ങളിൽ ഒരു വിജയം മാത്രമായി ഏറ്റവും പുറകിലായി നിലകൊള്ളുന്നു.

മികച്ച റെയ്ഡർമാർ

ബംഗാൾ വാരിയേഴ്സ് ക്യാപ്റ്റൻ ദേവങ്ക് ദലാൽ 109 റെയ്ഡ് പോയിന്റുകളോടെ മികച്ച റെയ്ഡറായി തുടരുന്നു. ഡെൽഹി ക്യാപ്റ്റൻ അഷു മാലിക് (106), ജയ്പൂറിന്റെ നിതിൻ കുമാർ ധൻകർ (101) എന്നിവർ പിന്നാലെ. കഴിഞ്ഞ വാരം അഷുവും നിതിനും 100 റെയ്ഡ് പോയിന്റ് കടന്നു.

• ദേവങ്ക് ദലാൽ (ബംഗാൾ വാരിയേഴ്സ്) - 109
• അഷു മാലിക് (ദബാങ് ഡെൽഹി) - 106
• നിതിൻ കുമാർ ധൻകർ (ജയ്പൂർ പിങ്ക് പാന്തേഴ്സ്) - 101
• അലിറെസ മിർസായാൻ (ബെംഗളൂരു ബുൾസ്) - 83
• ഗഗൻ രാജു ഗൗഡ (യുപി യോദ്ധാസ്) & ഭരത് ഹൂഡ (തെലുങ്കു ടൈറ്റൻസ്) - 82 വീതം

ദലാൽ ഏഴ് മത്സരങ്ങളിലും നിതിൻ എട്ട് മത്സരങ്ങളിൽ ഏഴിലും സൂപ്പർ 10 നേടി.

ഡിഫൻഡർ

പുണെരി പൽട്ടന്റെ ഗൗരവ് ഖത്രി 30 ടാക്കിൾ പോയിന്റുകളോടെ മികച്ച ഡിഫൻഡറായി തുടരുന്നു. യുപി യോദ്ധാസിന്റെ സുമിത് സാംഗ്വാൻ (29) പിന്നാലെ. ബെംഗളൂരു ബുൾസ് ക്യാപ്റ്റൻ യോഗേഷ് ദഹിയയും ദീപക് ശങ്കറും 27 വീതം പോയിന്റുകളോടെ മൂന്നാം സ്ഥാനം പങ്കിടുന്നു.

• ഗൗരവ് ഖത്രി (പുണെരി പൽട്ടൻ) - 30
• സുമിത് സാംഗ്വാൻ (യുപി യോദ്ധാസ്) - 29
• യോഗേഷ് ദഹിയ (ബെംഗളൂരു ബുൾസ്) - 27
• ദീപക് ശങ്കർ (ബെംഗളൂരു ബുൾസ്) - 27
• ഫസൽ അത്രച്ചാലി (ദബാങ് ഡെൽഹി) & നിതേഷ് കുമാർ (തമിഴ് തലൈവാസ്) - 26 വീതം

ഒരു മാസത്തെ മത്സരങ്ങൾ പിന്നിട്ടപ്പോൾ, ദബാങ് ഡെൽഹിയും പുണെരി പൽട്ടനും പ്ലേഓഫ് സാധ്യതകൾ ശക്തമാക്കിയിട്ടുണ്ട്. എന്നാൽ, മധ്യനിരയിലെ പോരാട്ടം കടുപ്പമുള്ളതാണ്. യു മുംബ, തമിഴ് തലൈവാസ്, ഗുജറാത്ത് ജയന്റ്സ് പോലുള്ള ടീമുകൾ തിരിച്ചുവരുമോ അതോ പരാജയങ്ങൾ തുടരുമോ എന്നത് വരുന്ന ആഴ്ചയിലെ പ്രകടനങ്ങള്‍ തീരുമാനിക്കും. അതുകൊണ്ട് തന്നെ വരും ദിവസങ്ങളില്‍ കബഡി ആരാധകർക്ക് കൂടുതൽ ആവേശകരമായ മത്സരങ്ങൾ പ്രതീക്ഷിക്കാം.