കംഗാരുക്കളെ ഷൂട്ട് ചെയ്ത് വീഴ്ത്തി, ബെല്‍ജിയത്തെ കൂടി തീര്‍ത്താല്‍ ഇന്ത്യ ലോകത്തിന്റെ നെറുകയില്‍

നിശ്ചിത സമയമത്ത് സ്‌കോര്‍ 2-2ന് പിരിഞ്ഞതോടെയാണ് വിജയികളെ കണ്ടെത്താന്‍ ഷൂട്ടൗട്ട് വേണ്ടിവന്നത്. ഷൂട്ടൗട്ടില്‍ 4-2നായിരുന്നു ഇന്ത്യന്‍ വിജയം.
ക്യാപ്റ്റന്‍ ഹര്‍ജീത്ത് സിങ്, ഹര്‍മന്‍പ്രീത് സിങ്, സുമിത്, മന്‍പ്രീത് തുടങ്ങി ഇന്ത്യക്കായി ഷൂട്ടൗട്ടില്‍ നാലു താരങ്ങളുംലക്ഷ്യം കണ്ടു.
നേരത്തേ നിശ്ചിതസമയത്ത് ഗുര്‍ജന്ത് സിങും മന്‍ദീപ് സിങുമായിരുന്നു സ്‌കോറര്‍മാര്‍.

ഗോള്‍കീപ്പര്‍ വികാസ് ദാഹിയയാണ് ഷൂട്ടൗട്ടില്‍ ഇന്ത്യയുടെ വിജയശില്‍പ്പി. ഷൂട്ടൗട്ടില്‍ താരം നിര്‍ണായകമായ രണ്ടു സേവുകള്‍ നടത്തി.
മാത്യു ബേര്‍ഡ്, ലാക്ലെന്‍ ഷാര്‍പ്പ് എന്നിവരുടെ കിക്കുകളാണ് അപാരമായ മെയ് വഴക്കത്തോടെ ഡൈവ് ചെയ്ത് വികാസ് വിഫലമാക്കിയത്.

തന്റെ കുഞ്ഞനുജന്‍മാര്‍ ലോകകിരീടത്തിലേക്ക് അടുക്കുമ്പോള്‍ മലയാളി ഗോള്‍കീപ്പറും സീനിയര്‍ ടീം ക്യാപ്റ്റനുമായ പി ആര്‍ ശ്രീജേഷ് അടങ്ങിയിരിക്കുന്നതെങ്ങനെ.
ബെല്‍ജിയത്തിനെതിരായ ഇന്ത്യയുടെ സെമി ഫൈനല്‍ ആസ്വദിക്കാന്‍ ശ്രീയും സ്റ്റേഡിയത്തിലെത്തിയിരുന്നു. ഷൂട്ടൗട്ടില്‍ ഗോളി വികാസ് ദാഹിയ ഓസീസിന്റെ മൂന്നാമത്തെ പെനല്‍റ്റി തട്ടിയകറ്റിയപ്പോള്‍ ശ്രീ ഗാലറിയില്‍ ആഹ്ലാദത്താല്‍ ആര്‍പ്പുവിളിച്ചു. മല്‍സരശേഷം ഗ്രൗണ്ടിലെത്തി താരങ്ങളെ അദ്ദേഹം അഭിനന്ദിക്കുകയും ചെയ്തു.

ഞായറാഴ്ച വൈകീട്ട് ആറു മണിക്കാണ് ഇന്ത്യയും ബെല്‍ജിയവും തമ്മിലുള്ള കലാശക്കളി. ഇതിനു മുമ്പ് വൈകീട്ട് 3.45ന് മൂന്നാംസ്ഥാനക്കാരെ കണ്ടെത്താനുള്ള മല്‍സരത്തില്‍ ജര്‍മനിയും ആസ്‌ത്രേലിയയും ഏറ്റുമുട്ടും.
മല്‍സരം ടെലിവിഷനില്‍ ലൈവായി കാണാന്‍ താല്‍പ്പര്യമുള്ളവര്‍ക്ക് സ്റ്റാര്‍ സ്‌പോര്‍ട്‌സ് നാലില്‍ തല്‍സമയം ആസ്വദിക്കാം.