ഹോക്കി ലോകകപ്പ്: ഷൂട്ടൗട്ടില്‍ ബെല്‍ജിയം ലോക ചാമ്പ്യന്മാര്‍

ഭുവനേശ്വര്‍: ഒഡീഷയിലെ ഭുവനേശ്വറില്‍ നടന്നുകൊണ്ടിരിക്കുന്ന പതിനാലാമത് ഹോക്കി ലോകകപ്പില്‍ ബെല്‍ജിയം കിരീടം നേടി. നിശ്ചിത സമയത്തും ഇരു ടീമുകള്‍ക്കും ഗോള്‍ കണ്ടെത്താനാകാത്തതിനാല്‍ ഷൂട്ടൗട്ടിലൂടെയായിരുന്നു വിജയിയെ നിശ്ചയിച്ചത്. ഷൂട്ടൗട്ടില്‍ ബെല്‍ജിയം 3-2 എന്ന നിലയില്‍ നെതര്‍ലന്‍ഡ്‌സിനെ തോല്‍പ്പിച്ചു.

മത്സരത്തിലുടനീളം ഇരുടീമുകളും ഒട്ടേറെ ഗോളവസരങ്ങള്‍ ഒരുക്കിയെങ്കിലും ഗോള്‍ കണ്ടെത്താനായില്ല. ഇന്ത്യയുള്‍പ്പെട്ട ഗ്രൂപ്പില്‍നിന്നും രണ്ടാം സ്ഥാനക്കാരായാണ് ബെല്‍ജിയം ക്വാര്‍ട്ടറിലെത്തിയത്. ഇന്ത്യയുമായുള്ള മത്സരത്തില്‍ 2-2 എന്ന നിലയിലായിരുന്നു മത്സരഫലം. അതേസമയം, 2014ലെ ലോകകപ്പില്‍ ഓസ്‌ട്രേലിയയോട് തോറ്റ നെതര്‍ലന്‍ഡ്‌സ് ഒരിക്കല്‍ക്കൂടി ഫൈനലില്‍ തോറ്റു.

നേരത്തെ ഓസ്‌ട്രേലിയ ഇംഗ്ലണ്ടിനെ തകര്‍ത്ത് മൂന്നാംസ്ഥാനം സ്വന്തമാക്കി. 8-1 എന്ന സ്‌കോറിനാണ് ഓസ്‌ട്രേലിയയുടെ ജയം. സെമിയില്‍ ആറു ഗോളുകള്‍ക്ക് ഇംഗ്ലണ്ട് ബെല്‍ജിയത്തോടും പരാജയപ്പെട്ടിരുന്നു. ഷൂട്ടൗട്ടില്‍ ഓസ്‌ട്രേലിയ നെതര്‍ലന്‍ഡ്‌സിനോടും തോറ്റു. ടൂര്‍ണമെന്റില്‍ മികച്ച പ്രകടനം നടത്തിയ ഇന്ത്യ ക്വാര്‍ട്ടറില്‍ നെതര്‍ലന്‍ഡ്‌സിനോട് തോറ്റ് പുറത്താവുകയായിരുന്നു.