തോറ്റവർക്ക് എപ്പോഴും ഒഴിവുകഴിവുകൾ കാണും! അർജന്റീനയെ കുറ്റം പറയുന്നവരുടെ വായടപ്പിച്ച് ജർമ്മൻ ഇതിഹാസം!

ഫിഫ ലോകകപ്പ് പ്രീ-ക്വാർട്ടറിൽ ഈജിപ്തിനെതിരെ അർജന്റീന നേടിയ നാടകീയ വിജയത്തിന് പിന്നാലെ ഉയർന്നുവന്ന റഫറിയിംഗ് വിവാദങ്ങളെയും ഗൂഢാലോചന വാദങ്ങളെയും പൂർണ്ണമായി തള്ളിപ്പറഞ്ഞ് മുൻ ജർമ്മൻ മിഡ്‌ഫീൽഡ് ഇതിഹാസം ടോണി ക്രൂസ്. രണ്ട് ഗോളുകൾക്ക് മുന്നിൽ നിന്ന ശേഷം കളി കൈവിട്ട ഈജിപ്തിന്റെ പരാജയത്തെ റഫറിയുടെ തലയിൽ കെട്ടിവെക്കാൻ നോക്കുന്നവർക്കെതിരെ ക്രൂസ് രൂക്ഷമായ ഭാഷയിലാണ് പ്രതികരിച്ചത്. മത്സരങ്ങൾ തീരുമാനിക്കുന്നത് കളിക്കളത്തിലെ പ്രകടനങ്ങളാണെന്നും അല്ലാതെ ഇത്തരം വിലകുറഞ്ഞ സിദ്ധാന്തങ്ങളല്ലെന്നും ക്രൂസ് തുറന്നടിച്ചു.

"രണ്ട് ഗോളിന് മുന്നിൽ നിന്നിട്ട് കളി കളഞ്ഞത് ഈജിപ്താണ്"

മത്സരഫലത്തിന് ശേഷം ആളുകൾ എപ്പോഴും ഒഴിവുകഴിവുകൾ തിരയുന്നത് എന്തുകൊണ്ടാണെന്ന് തനിക്ക് മനസ്സിലാകുന്നില്ലെന്ന് ടോണി ക്രൂസ് പറഞ്ഞു. കളി കൈവിട്ടത് ഈജിപ്തിന്റെ തന്നെ പിഴവുകൾ കൊണ്ടാണെന്ന് അദ്ദേഹം ചൂണ്ടിക്കാണിച്ചു:

ടോണി ക്രൂസ് പറഞ്ഞത്: "ഒരു മത്സരഫലത്തിന് ശേഷം ആളുകൾ എന്തിനാണ് എപ്പോഴും ഒഴിവുകഴിവുകൾ തിരയുന്നത് എന്ന് എനിക്ക് മനസ്സിലാകുന്നില്ല. ഫുട്ബോൾ തീരുമാനിക്കപ്പെടുന്നത് 90 മിനിറ്റിലെ കളിയിലാണ്, അല്ലാതെ ഏതെങ്കിലും ഒരു ഒറ്റപ്പെട്ട നിമിഷത്തിലല്ല. ഈജിപ്ത് ആദ്യ പകുതിയിൽ മികച്ച രീതിയിലാണ് കളിച്ചത്. എന്നാൽ 2-0 ന് മുന്നിലെത്തിയ ശേഷം അവർക്ക് കളിയുടെ നിയന്ത്രണം നഷ്ടമായി. അർജന്റീന അത് കൃത്യമായി മുതലെടുത്തു. ലോകത്തെ മുൻനിര ടീമുകൾ ചെയ്യുന്നത് അതുതന്നെയാണ്."

"അർജന്റീനയുടെ തിരിച്ചുവരവ് അവരുടെ വീര്യം കൊണ്ടാണ്"

ആളുകൾ റഫറിയെക്കുറിച്ചും വാറിനെക്കുറിച്ചും സംസാരിച്ചുകൊണ്ടേയിരിക്കുകയാണ്, എന്നാൽ മത്സരത്തെ വസ്തുനിഷ്ഠമായി വിലയിരുത്തിയാൽ അർജന്റീനയുടെ തിരിച്ചുവരവിന് കാരണം അവരുടെ കളിയിലെ തീവ്രതയും മാനസിക കരുത്തുമാണെന്ന് കാണാമെന്ന് ക്രൂസ് വ്യക്തമാക്കി.

"അവസാന വിസിൽ മുഴങ്ങുന്നത് വരെ അവർക്ക് ജയിക്കുമെന്ന വിശ്വാസമുണ്ടായിരുന്നു. എന്നാൽ മത്സരത്തിന്റെ തുടക്കത്തിൽ കാട്ടിയ അതേ നിലവാരം പിന്നീട് നിലനിർത്താൻ ഈജിപ്തിന് കഴിഞ്ഞില്ല. ലോകത്തിലെ ഏറ്റവും മികച്ച ടീമുകളിലൊന്നിനെതിരെ രണ്ട് ഗോളുകളുടെ ലീഡ് കളഞ്ഞുകുളിച്ച ശേഷം, എല്ലാം ഒരു ഒരൊറ്റ തീരുമാനത്തിന്റെ പുറത്താണെന്ന് പറയുന്നത് ശരിയല്ല. ഫുട്ബോൾ അതിനേക്കാൾ വളരെ സങ്കീർണ്ണമാണ്," അദ്ദേഹം കൂട്ടിച്ചേർത്തു.

"കപ്പ് അർജന്റീനയ്ക്ക് ദാനം ചെയ്യുന്നു എന്ന് പറയുന്നത് അനീതിയാണ്"

റഫറിയിംഗിനെക്കുറിച്ച് ചർച്ചകൾ ഉണ്ടാകുന്നത് സ്വാഭാവികമാണെന്നും എന്നാൽ മത്സരം 'മോഷ്ടിക്കപ്പെട്ടു' എന്നോ, ടൂർണമെന്റ് അർജന്റീനയ്ക്ക് സമ്മാനമായി നൽകുകയാണെന്നോ പറയുന്നത് മൈതാനത്തിറങ്ങി കളിച്ച എല്ലാ കളിക്കാരെയും അപമാനിക്കുന്നതിന് തുല്യമാണെന്ന് ക്രൂസ് ഓർമ്മിപ്പിച്ചു.

"തോൽവിക്ക് ശേഷം, നിർണ്ണായക നിമിഷങ്ങളിൽ എതിരാളികൾ നമ്മളേക്കാൾ മികച്ചവരായിരുന്നു എന്ന് സമ്മതിക്കുകയാണ് ഏറ്റവും പ്രയാസമേറിയ കാര്യം. കടുത്ത സമ്മർദ്ദത്തിലും അർജന്റീന പ്രതികരിച്ച രീതിക്ക് അവർ ക്രെഡിറ്റ് അർഹിക്കുന്നുണ്ട്. ഈജിപ്ത് തങ്ങളുടെ പ്രകടനത്തിൽ അഭിമാനിക്കുകയാണ് വേണ്ടത്, ഒപ്പം തങ്ങൾക്ക് പറ്റിയ വലിയ തെറ്റുകളിൽ നിന്ന് പഠിക്കുകയും വേണം. അതാണ് ഫുട്ബോൾ," ക്രൂസ് തന്റെ നിലപാട് വ്യക്തമാക്കി.