ലണ്ടന്/മാഡ്രിഡ്: യൂറോപ്യന് ചാംപ്യന്മാരും സ്പാനിഷ് അതികായന്മാരുമായ റയല് മാഡ്രിഡിന് ഈ സീസണില് ഒന്നിനു പിറകെ ഒന്നായി തിരിച്ചടികള് തുടരുകയാണ്. കിങ്സ് കപ്പില് (കോപ്പാ ഡെല് റേ) നിന്ന് ഞെട്ടിക്കുന്ന തോല്വിയോട റയല് പുറത്തായി. ക്വാര്ട്ടര് ഫൈനലില് ലെഗന്സിനോടാണ് റയല് പരാജയപ്പെട്ടത്.
അതേസമയം, ഇംഗ്ലീഷ് ലീഗ് കപ്പില് (കറാബാവോ കപ്പ്) വമ്പന്മാര് തമ്മിലുള്ള പോരാട്ടത്തില് ചെല്സിയെ അടിയറവ് പറയിച്ച് ആഴ്സനല് ഫൈനലില് കടന്നു. രണ്ടാംപാദ സെമി ഫൈനലില് ഗണ്ണേഴ്സ് 2-1ന് ബ്ലൂസിനെ വീഴ്ത്തുകയായിരുന്നു. അതേസമയം, ഫ്രഞ്ച് കപ്പില് തകര്പ്പന് ജയത്തോടെ കിരീട ഫേവറിറ്റുകളായ പിഎസ്ജി പ്രീക്വാര്ട്ടറിലേക്കു കുതിച്ചു.
കിങ്സ് കപ്പില് സ്വന്തം മൈതാനത്താണ് ലെഗന്സിനോട് റയല് 1-2ന് നാണംകെട്ടത്. ഒന്നാംപാദത്തില് ജയിച്ച റയലിന് സെമിയിലെത്താന് സമനില മാത്രം മതിയായിരുന്നു. എന്നാല് 1-2ന്റെ ഞെട്ടിക്കുന്ന തോല്വി അവരുടെ കണക്കുകൂട്ടലുകള് തെറ്റിച്ചു. ഇരുപാദങ്ങളിലുമായി സ്കോര് 2-2 ആയതോടെ റയലിന്റെ ഗ്രൗണ്ടില് നേടിയ രണ്ടു എവേ ഗോള് ലെഗന്സിനെ സെമി ഫൈനലിലെത്തിക്കുകയായിരുന്നു. ഇരുപകുതികളിലുമായി ജാവിയര് എറാസോയും ഗബ്രിയേലുമാണ് ലെഗന്സിനായി ലക്ഷ്യം കണ്ടത്. റയലിന്റെ ഗോള് കരീം ബെന്സെമയുടെ വകയായിരുന്നു.
ഹോംഗ്രൗണ്ടായ എമിറേറ്റ്സില് ഒരു ഗോളിനു പിന്നിട്ടുനിന്ന ശേഷമാണ് ചെല്സിയെ ആഴ്സനല് കീഴടക്കിയത്. ഒന്നാംപാദം ഗോള്രഹിതമായി പിരിഞ്ഞതിനാല് ഈ മല്സരം ഇരുടീമിനും ഒരുപോലെ നിര്ണായകമായിരുന്നു. ഏഴാം മിനിറ്റില് തന്നെ ഈഡന് ഹസാര്ഡിലൂടെ ചെല്സി മുന്നിലെത്തിയെങ്കിലും അഞ്ചു മിനിറ്റിനുള്ളില് ആഴ്സനല് തിരിച്ചടിച്ചു. നാച്ചോ മോണ്റിയലായിരുന്നു സ്കോറര്. 60ാം മിനിറ്റില് ്ഗ്രാനിത് സാക്കയാണ് ആഴ്സനലിന്റെ വിജയഗോള് നിക്ഷേപിച്ചത്. ഫൈനലില് മാഞ്ചസ്റ്റര് സിറ്റിയാണ് ആഴ്സനലിന്റെ എതിരാളികള്.
ഫ്രഞ്ച് കപ്പില് പിഎസ്ജി 4-2ന് ഗ്വിന്ഗാംപിനെയാണ് തുരത്തിയത്. ഒരു സെല്ഫ് ഗോളിനൊപ്പം അഡ്രിയാന് റാബിയറ്റ്, ജാവിയര് പാസ്റ്റോറെ, മാര്ക്വിഞ്ഞോസ് എന്നിവരുടെ ഗോളുകളും പിഎസ്ജിയയുടെ ജയം അനായാസമാക്കി.