അക്ര: ആഫ്രിക്കന് ഫുട്ബോളര് ഓഫ് ദി ഇയര് പുരസ്കാരം ലിവര്പൂളിന്റെ പുതിയ സൂപ്പര് താരമായ മുഹമ്മദ് സലായ്ക്ക്. ലിവര്പൂളില് തന്റെ ടീമംഗമായ സാദിയോ മാനെയെ രണ്ടാംസ്ഥാനത്തേക്കു പിന്തള്ളിയാണ് സലാ ഈ നേട്ടം കൈവരിച്ചത്. ബൊറൂസ്യ ഡോട്മുണ്ട് ഗോള്മെഷീന് പിയറെ എമെറിക് ഓബമെയാങ് മൂന്നാമതെത്തി.
കഴിഞ്ഞ സീസണില് ഇംഗ്ലീഷ് ടീമായ ലെസ്റ്റര് സിറ്റിയുടെ അല്ജീരിയന് പ്ലേമേക്കറായിരുന്ന റിയാദ് മഹ്റെസിനായിരുന്നു പുരസ്കാരം. താന് ഏറെ ആഗ്രഹിച്ചതാണ് ഈ നേട്ടമെന്ന് ഘാനയില് പുരസ്കാരം ഏറ്റുവാങ്ങിയ ശേഷം സലാ പ്രതികരിച്ചു. നിരവധി വെല്ലുവിളികളാണ് തനിക്ക് അതിജീവിക്കേണ്ടിവന്നത്. ഈജിപ്തിന്റെ ഫുട്ബോള് ചരിത്രത്തിലെ തന്നെ ഏറ്റവും മികച്ച താരമായി മാറുകയാണ് തന്റെ ലക്ഷ്യമെന്നും അദ്ദേഹം കൂട്ടിച്ചേര്ത്തു.
ഇംഗ്ലീഷ് ചാംപ്യന്മാരായ ചെല്സിയില് ഫ്ളോപ്പായി മാറിയ സലാ പിന്നീട് യൂറോപ്പിലെ തന്നെ ഏറ്റവും മികച്ച താരങ്ങളിലൊരാളായി മാറുന്നതാണ് കണ്ടത്. ചെല്സിയില് നിന്നും ഇറ്റാലിയന് ക്ലബ്ബായ എഎസ് റോമയിലേക്ക് കൂടുമാറിയതോടെയാണ് യഥാര്ഥ സലായെ ലോകം കാണുന്നത്. ഈ സീസണില് ലിവര്പൂളിലെത്തിയപ്പോഴും താരം ഉജ്ജ്വല ഫോം ആവര്ത്തിക്കുകയാണ്.
കഴിഞ്ഞ സീസണില് റോമയ്ക്കായി 31 ലീഗ് മല്സരങ്ങളില് നിന്നും 15 ഗോളുകള് സലാ നേടിയിരുന്നു. ലിവര്പൂളിനു വേണ്ടി 21 മല്സരങ്ങളില് നിന്നും 17 ഗോളുകളാണ് ഇതിനകം താരം അടിച്ചുകൂട്ടിയത്.