മെസ്സിയും റൊണാൾഡോയും വേണ്ട, എനിക്ക് പ്രിയം ഇവരെ!; ആരാധകരെ ഞെട്ടിച്ച് ലാമിൻ യമാലിന്റെ ഫേവറേറ്റ് ലിസ്റ്റ്!

ഫുട്ബോൾ ലോകത്തെ പുതിയ അത്ഭുത ബാലനായ സ്പെയിന്റെയും ബാഴ്‌സലോണയുടെയും ലാമിൻ യമാൽ, തനിക്ക് ഏറ്റവും പ്രിയപ്പെട്ട മൂന്ന് കളിക്കാരുടെ പേരുകൾ വെളിപ്പെടുത്തിയതാണ് ഇപ്പോൾ കായികലോകത്ത് വലിയ ചർച്ചയായിരിക്കുന്നത്. വരാനിരിക്കുന്ന ഫിഫ ലോകകപ്പിൽ തിളങ്ങാൻ ഒരുങ്ങുന്ന ഈ 18-കാരൻ, തന്റെ പ്രിയപ്പെട്ടവരുടെ പട്ടികയിൽ നിന്നും ഫുട്ബോൾ ഇതിഹാസങ്ങളായ ലയണൽ മെസ്സിയെയും ക്രിസ്റ്റ്യാനോ റൊണാൾഡോയെയും ഒഴിവാക്കി എന്നതാണ് ശ്രദ്ധേയം.

തന്റെ ഔദ്യോഗിക യൂട്യൂബ് ചാനലിൽ ആരാധകരുമായി നടത്തിയ ഒരു ചോദ്യോത്തര (Q&A) സെഷനിലാണ്, നിലവിൽ ബാഴ്‌സലോണയിലുള്ള തന്റെ സഹപ്രവർത്തകർക്ക് പുറമെ താൻ കളി കാണാൻ ഏറെ ആഗ്രഹിക്കുന്ന മൂന്ന് താരങ്ങളെ യമാൽ പരസ്യമാക്കിയത്.

യമാലിന്റെ ഫേവറിറ്റ് ലിസ്റ്റിലെ ആ 3 പേർ!

തന്റെ കുട്ടിക്കാലത്തെ ഹീറോയായ ബ്രസീൽ താരം നെയ്മർ ജൂനിയർ, മാഞ്ചസ്റ്റർ സിറ്റിയുടെ വിങ്ങർ ജെറമി ഡോക്കു, ഒപ്പം റയൻ ചെർക്കി എന്നിവരുടെ പേരുകളാണ് യമാൽ തിരഞ്ഞെടുത്തത്. നെയ്മർ ബാഴ്‌സലോണയിൽ കളിക്കുന്ന കാലം തൊട്ട് അദ്ദേഹത്തിന്റെ കളിശൈലിയുടെ വലിയ ആരാധകനായിരുന്നു യമാൽ. കഴിഞ്ഞ വേനൽക്കാലത്ത് റിയോ ഡി ജനീറോയിൽ വെച്ച് യമാൽ തന്റെ ഈ പ്രിയതാരത്തെ നേരിൽ കാണുകയും ചെയ്തിരുന്നു.

ലയണൽ മെസ്സിയും റൊണാൾഡോയും തങ്ങളുടെ കരിയറിന്റെ അവസാന ഘട്ടത്തിലേക്ക് എത്തിയതും യഥാക്രമം എംഎൽഎസ് (MLS), സൗദി പ്രോ ലീഗ് എന്നിവടങ്ങളിലേക്ക് മാറിയതുമാകാം യമാൽ ഇവരെ ഈ ലിസ്റ്റിൽ നിന്നും ഒഴിവാക്കാൻ കാരണം. എങ്കിലും ബാഴ്‌സലോണ അക്കാദമിയിൽ വളർന്ന യമാൽ, ലയണൽ മെസ്സിയെ തന്റെ എക്കാലത്തെയും മികച്ച പ്രിയപ്പെട്ട കളിക്കാരിൽ ഒരാളായാണ് കണക്കാക്കുന്നത്. കഴിഞ്ഞ മാർച്ചിൻ നടക്കേണ്ടിയിരുന്ന ഫൈനലിസിമ (Finalissima) മത്സരത്തിൽ ഇരുവരും നേരിൽ കാണേണ്ടതായിരുന്നുവെങ്കിലും ആ മത്സരം റദ്ദാക്കപ്പെടുകയായിരുന്നു. അതേസമയം, കഴിഞ്ഞ ജൂണിൽ നടന്ന യുവേഫ നേഷൻസ് ലീഗ് ഫൈനലിൽ ക്രിസ്റ്റ്യാനോ റൊണാൾഡോയുടെ പോർച്ചുഗലിനെതിരെ യമാൽ കളിച്ചിട്ടുണ്ട്. അന്ന് സ്പെയിനെ തോൽപ്പിച്ച് പോർച്ചുഗൽ കിരീടം ചൂടിയിരുന്നു.

"യമാലിനെ ഞാൻ പച്ചയ്ക്ക് വിഴുങ്ങുമായിരുന്നു"; മുന്നറിയിപ്പുമായി മാഞ്ചസ്റ്റർ യുണൈറ്റഡ് മുൻ താരം പാട്രിക് എവ്ര!

യമാലിന്റെ കളിമികവിനെ അഭിനന്ദിക്കുന്നതിനൊപ്പം തന്നെ താരത്തിന് ഒരു കടുത്ത മുന്നറിയിപ്പുമായി മാഞ്ചസ്റ്റർ യുണൈറ്റഡ് മുൻ ഇതിഹാസ പ്രതിരോധ താരം പാട്രിക് എവ്ര രംഗത്തെത്തി. തന്റെ കരിയറിന്റെ പ്രതാപകാലത്ത് തന്നെ നേരിടാൻ മുന്നേറ്റനിരക്കാർക്ക് ഭയമായിരുന്നുവെന്ന് എവ്ര അവകാശപ്പെടുന്നു.

ഇതുമായി ബന്ധപ്പെട്ട് ഇഎസ്പിഎൻ യുകെ-യോട് (ESPN UK) എവ്ര പറഞ്ഞത് ഇങ്ങനെയാണ്:

"എന്റെ പ്രതാപകാലത്ത് ഞാൻ യമാലിനെതിരെയാണ് കളിച്ചിരുന്നതെങ്കിൽ അവനെ ഞാൻ പച്ചയ്ക്ക് വിഴുങ്ങുമായിരുന്നു. എന്നോട് ക്ഷമിക്കുക ലാമിൻ, എനിക്ക് നിന്നോട് വലിയ സ്നേഹമുണ്ട്... പക്ഷേ എന്നെ നേരിട്ടപ്പോൾ ഉള്ള അവസ്ഥയെക്കുറിച്ച് നീ ക്രിസ്റ്റ്യാനോയോടും മെസ്സിയോടും ചോദിച്ചു നോക്കൂ, കളിക്കളത്തിൽ ഞാൻ ഒട്ടും ദയയില്ലാത്തവനാണ്."

മാഞ്ചസ്റ്റർ യുണൈറ്റഡ്, യുവന്റസ് എന്നീ വമ്പൻ ക്ലബ്ബുകൾക്കായി കളിച്ച് ലോകത്തെ ഏറ്റവും മികച്ച ലെഫ്റ്റ് ബാക്ക് ആയി തിളങ്ങിയിട്ടുള്ള താരമാണ് പാട്രിക് എവ്ര. ഫ്രാൻസിന് വേണ്ടിയും നിരവധി ലോകകപ്പുകളിൽ അദ്ദേഹം ബൂട്ട് കെട്ടിയിട്ടുണ്ട്.