|
ഞെട്ടല് മാറാതെ മഞ്ഞപ്പട
ടൂര്ണമെന്റിലെ ഉദ്ഘാടന മല്സരത്തിലേറ്റ ദയനീയ തോല്വിയുടെ ഞെട്ടല് മാറാതെയാണ് ബ്ലാസ്റ്റേഴ്സ് തങ്ങളുടെ രണ്ടാമത്തെയും അവസാനത്തെയും കളിക്ക് ഇറങ്ങുന്നത്. അന്ന് ഓസ്ട്രേലിയയുടെ മുന്നിര ക്ലബ്ബായ മെല്ബണ് സിറ്റി എഫ്സിയോട് എതിരില്ലാത്ത ആറു ഗോളുകള്ക്കു ബ്ലാസ്റ്റേഴ്സ് തകര്ന്നടിയുകയായിരുന്നു.
ഈ ദുരന്തത്തില് നിന്നും കരകയറാനായെങ്കില് മാത്രമേ ജിറോണയ്ക്കെതിരേ മഞ്ഞപ്പടയ്ക്കു പൊരുതിനോക്കാനെങ്കിലും കഴിയുകയുള്ളൂ.
|
ആശങ്കയ്ക്കു കാരണം
ജിറോണയ്ക്കെതിരേ ഇറങ്ങുന്നതിനു മുമ്പ് ബ്ലാസ്റ്റേഴ്സിന് ഇത്രയുമധികം ആശങ്കയുണ്ടാവാന് കാരണമുണ്ട്. ആദ്യ കളിയില് തങ്ങളെ 6-0ന് കെട്ടുകെട്ടിച്ച മെല്ബണ് സിറ്റിയെ വെള്ളിയാഴ്ച രാത്രി നടന്ന മല്സരത്തില് ജിറോണ ഇതേ സ്കോറിന് തരിപ്പണമാക്കിയിരുന്നു.
തങ്ങളെ നിഷ്പ്രഭരാക്കിയ മെല്ബണിനെപ്പോലും കശക്കിയെറിഞ്ഞ ജിറോണയുടെ കരുത്ത് എത്രത്തോളമുണ്ടെന്ന് ബോധ്യമായതാണ് ബ്ലാസ്റ്റേഴ്സിന്റെ ഹൃദയമിടിപ്പ് കൂട്ടുന്നത്.
|
സമനില പോലും സന്തോഷിപ്പിക്കും
ബ്ലാസ്റ്റേഴ്സിനെ സംബന്ധിച്ചിടത്തോളം വലിയ പ്രതീക്ഷകളൊന്നും ജിറോണയ്ക്കെതിരേ ഉണ്ടാവില്ല. കാരണം സ്പാനിഷ് ലീഗില് റയല് മാഡ്രിഡ്, ബാഴ്സലോണ എന്നിവരടക്കമുള്ള അതികായന്മാര്ക്കെതിരേ കൊമ്പുകോര്ത്ത ടീമാണ് ജിറോണ. അവരെ സമനിലയില് പിടിച്ചുനിര്ത്താന് കഴിഞ്ഞാല് പോലും ബ്ലാസ്റ്റേഴ്സിനെ സംബന്ധിച്ചിടത്തോളം അത് ജയത്തിനു തുല്യമാവും.
|
ജയിച്ചാല് ചാംപ്യന്മാര്
ജിറോണയെ സംബന്ധിച്ചിടത്തോളം മെല്ബണിനെതിരേ നിര്ത്തിയ ഇടത്തുനിന്ന് ബ്ലാസ്റ്റേഴ്സിനെതിരേ തുടങ്ങാനായിരിക്കും ശ്രമം. ബ്ലാസ്റ്റേഴ്സിനെതിരേ ജയിക്കാനായാല് ലാ ലിഗ വേള്ഡ് ട്രോഫിയുമായി ജിറോണയ്ക്കു നാട്ടിലേക്കു മടങ്ങാം. സമനില പോലും ജിറോണയെ കിരീടം സ്വന്തമാക്കാന് സഹായിക്കും. കാരണം, ഒരു ജയം മാത്രമേ മെല്ബണിന്റെ അക്കൗണ്ടിലുള്ളൂ.