ലീഡ് നേടിയിട്ടും അർജന്റീനയെ ഭയന്നു!സൗത്‌ഗേറ്റ് പോയിട്ടും ഇംഗ്ലണ്ടിന്റെ ശാപം മാറുന്നില്ലേ?വിമർശനവുമായി മുൻ താരം

ഫിഫ ലോകകപ്പ് 2026-ന്റെ ആവേശകരമായ സെമി ഫൈനലിൽ അർജന്റീനയോട് തോറ്റ് ഇംഗ്ലണ്ട് പുറത്തായതിന് പിന്നാലെ, പരിശീലകൻ തോമസ് ടുഹലിന്റെ പ്രതിരോധ തന്ത്രങ്ങൾക്കെതിരെ കടുത്ത വിമർശനവുമായി മുൻ ഇംഗ്ലീഷ് ഗോൾകീപ്പർ ജോ ഹാർട്ട്. മത്സരത്തിൽ ഒരു ഗോളിന് മുന്നിട്ടുനിന്ന ശേഷമാണ് ഇംഗ്ലണ്ട് 2-1 ന് അർജന്റീനയോട് പരാജയപ്പെട്ടത്. അവസാന നിമിഷങ്ങളിൽ ടുഹൽ വരുത്തിയ പ്രതിരോധ മാറ്റങ്ങൾ ടീമിന് തിരിച്ചടിയായെന്നും മുൻ പരിശീലകൻ ഗാരെത് സൗത്‌ഗേറ്റ് വലിയ മത്സരങ്ങളിൽ വരുത്തിയ അതേ തെറ്റുകളാണ് ടുഹലും ആവർത്തിച്ചതെന്നും ബിബിസിയോട് സംസാരിക്കവെ ഹാർട്ട് തുറന്നടിച്ചു.

സൗത്‌ഗേറ്റിന്റെ അതേ തെറ്റ് ടുഹലും ആവർത്തിച്ചു

മത്സരത്തിന്റെ 55-ാം മിനിറ്റിൽ ആന്റണി ഗോർഡനിലൂടെ ഇംഗ്ലണ്ടാണ് ആദ്യം മുന്നിലെത്തിയത്. 80 മിനിറ്റ് വരെ ഈ ലീഡ് നിലനിർത്താൻ ഇംഗ്ലണ്ടിന് സാധിച്ചെങ്കിലും അവസാന പത്ത് മിനിറ്റിൽ അർജന്റീന തിരിച്ചടിച്ച രണ്ട് ഗോളുകൾ ഇംഗ്ലണ്ടിന്റെ ഫൈനൽ സ്വപ്നങ്ങൾ തകർത്തു. ഗോൾ നേടിയതിന് പിന്നാലെ ടുഹൽ എടുത്ത തന്ത്രപരമായ തീരുമാനങ്ങളെ ഹാർട്ട് ചോദ്യം ചെയ്തു:

"വലിയ മത്സരങ്ങളിൽ ലീഡ് നേടിയ ശേഷം പ്രതിരോധത്തിലേക്ക് വലിഞ്ഞ് കളി നിർത്തുന്ന ശൈലിയുടെ പേരിൽ ഗാരെത് സൗത്‌ഗേറ്റ് ഒരുപാട് വിമർശനങ്ങൾ നേരിട്ടിട്ടുണ്ട്. ഇവിടെയും അതിൽ മാറ്റമൊന്നും കണ്ടില്ല. തോമസ് ടുഹലിനെ നമ്മൾ ഒരുപാട് പുകഴ്ത്തുന്നുണ്ടെങ്കിലും, ലീഡ് കിട്ടിയ ഉടനെ അദ്ദേഹം വരുത്തിയ മാറ്റങ്ങൾ കാണിക്കുന്നത് കോച്ചിന് സ്വന്തം ടീമിൽ വിശ്വാസമില്ലായിരുന്നു എന്നാണ്. അർജന്റീനയ്ക്ക് മേൽ ഇനിയും സമ്മർദ്ദം ചെലുത്താൻ തന്റെ ടീമിന് കഴിയില്ലെന്ന് അദ്ദേഹം ഭയപ്പെട്ടു."

മത്സരത്തിന്റെ 72-ാം മിനിറ്റിൽ ഗോൾ സ്കോറർ ഗോർഡനെ പിൻവലിച്ച് ഡിഫെൻഡർ എസ്രി കോൺസയെ ടുഹൽ കളത്തിലിറക്കിയിരുന്നു. തൊട്ടുപിന്നാലെ മറ്റ് രണ്ട് ഡിഫെൻഡർമാരെക്കൂടി ഇറക്കി ടീമിനെ പൂർണ്ണമായും ഒരു 'ബാക്ക് ഫൈവ്' (5 ഡിഫെൻഡർമാർ) പ്രതിരോധ ശൈലിയിലേക്ക് അദ്ദേഹം മാറ്റി. ഇതാണ് തോൽവിക്ക് കാരണമായതെന്നാണ് വിമർശനം.

തീരുമാനത്തെ ന്യായീകരിച്ച് തോമസ് ടുഹൽ

എന്നാൽ പ്രതിരോധത്തിലേക്ക് മാറിയ തന്റെ തീരുമാനത്തെ ടുഹൽ ബിബിസിക്ക് നൽകിയ അഭിമുഖത്തിൽ ന്യായീകരിച്ചു. ഇംഗ്ലീഷ് പ്രതിരോധത്തിലെ വിടവുകൾ നികത്താനാണ് താൻ ശ്രമിച്ചതെന്ന് അദ്ദേഹം പറഞ്ഞു:

"ഗോൾ അടിച്ചതിന് തൊട്ടുപിന്നാലെ, മാറ്റങ്ങൾ വരുത്തുന്നതിന് മുൻപ് തന്നെ അർജന്റീന നിരന്തരമായി ക്രോസുകൾ ഉതിർക്കുകയും അവസരങ്ങൾ സൃഷ്ടിക്കുകയും ചെയ്യുന്നുണ്ടായിരുന്നു. പ്രതിരോധത്തിലെ ഗ്യാപ്പുകൾ വളരെ കൂടുതലായിരുന്നു. അവർ എല്ലാ ഹെഡ്ഡറുകളും ജയിക്കുകയായിരുന്നു. ബോക്സിനുള്ളിലെ വിടവുകൾ അടയ്ക്കാനും വായുവിലൂടെയുള്ള അർജന്റീനയുടെ ആക്രമണങ്ങളെ ചെറുക്കാനുമാണ് അഞ്ച് ഡിഫെൻഡർമാരിലേക്ക് കളി മാറ്റിയത്. ഒരു കോച്ചെന്ന നിലയിൽ പരാജയത്തിന്റെ പൂർണ്ണ ഉത്തരവാദിത്തം ഞാൻ ഏറ്റെടുക്കുന്നു. കളി തോൽക്കുമ്പോൾ ഇത്തരം തീരുമാനങ്ങൾ തെറ്റായിരുന്നു എന്ന് പറയുന്നത് എളുപ്പമാണ്."

1966-ൽ കിരീടം നേടിയതിന് ശേഷം ഇംഗ്ലണ്ടിന് ഇതുവരെ ലോകകപ്പിന്റെ ഫൈനലിൽ എത്താൻ സാധിച്ചിട്ടില്ല. 2018-ലും ഇപ്പോൾ 2026-ലും സെമി ഫൈനലിൽ പുറത്താകാനായിരുന്നു ഇംഗ്ലണ്ടിന്റെ വിധി.