സ്വന്തം തട്ടകത്തില് കപ്പുയര്ത്താന് ഇന്ത്യ
സ്വന്തം തട്ടകത്തില് കിരീടം മാത്രമാണ് ഇന്ത്യയുടെ നീലക്കടുവകളുടെ ലക്ഷ്യം. കഴിഞ്ഞ രണ്ട് മല്സരത്തിലും ഇന്ത്യന് ഫുട്ബോളിനെ പിന്തുണയ്ക്കാന് മൈതാനത്തെത്തിയ പതിനായിരക്കണക്കിന് ആരാധകര്ക്കു മുന്നില് തലയുഴര്ത്തി നില്ക്കാന് സുനില് ഛേത്രി നയിക്കുന്ന ഇന്ത്യക്ക് കപ്പടിക്കണം. നായകന് സുനില് ഛേത്രിയുടെ മിന്നും ഫോമില് തന്നെയാണ് ഇന്ത്യയുടെ പ്രതീക്ഷകള്. ടൂര്ണമെന്റിലെ മൂന്ന് മല്സരങ്ങളില് നിന്ന് ഇതിനോടകം ആറ് ഗോളുകള് ഛേത്രി അടിച്ചുകൂട്ടിയിട്ടുണ്ട്.
ഗ്രൂപ്പ്ഘട്ടത്തില് കെനിയയെ തോല്പ്പിക്കാനായതും ഇന്ത്യക്ക് ആത്മവിശ്വാസം നല്കുന്നുണ്ട്. ഛേത്രി ഇരട്ട ഗോളുമായി മിന്നിയ മല്സരത്തില് എതിരില്ലാത്ത മൂന്നു ഗോളിനായിരുന്നു കെനിയക്കെതിരേ ഇന്ത്യയുടെ വിജയം. ഫൈനലിലും ഈ ആധിപത്യം നിലനിര്ത്താന് കഴിഞ്ഞാല് സ്വന്തം തട്ടകത്തില് ചാംപ്യന്പട്ടം ഉയര്ത്താന് ഇന്ത്യക്ക് കഴിയും.
പോരാട്ടവീര്യവുമായി കെനിയ
ആഫ്രിക്കന് രാജ്യങ്ങളുടെ ഏറ്റവും വലിയ പ്ലസ് പോയിന്റാണ് പൊരുതി കളിക്കുകായെന്നത്. ലോക ഫുട്ബോളില് ആഫ്രിക്കന് കരുത്ത് പലപ്പോഴും കണ്ടതാണ്. ആഫ്രിക്കയെ പ്രതിനിധീകരിച്ചെത്തുന്ന കെനിയെയും ഇത്തരത്തിലൊരു പോരാട്ട മികവ് തെളിയിക്കാനുറച്ചാണ് ഇന്ത്യക്കെതിരായ കിരീടപ്പോരാട്ടത്തിനിറങ്ങുന്നത്. ഗ്രൂപ്പ്ഘട്ടത്തില് ഇന്ത്യയോടേറ്റ തോല്വിക്ക് മധുരപ്രതികാരം വീട്ടാനുള്ള സുവര്ണാവസരം കൂടിയാണ് കെനിയക്ക് ഇന്ന് ലഭിച്ചിരിക്കുന്നത്.
ഫൈനലിലേക്കുള്ള നാള്വഴി
ചൈനീസ് തായ്പേയിയെ 0-5ന് തരിപ്പണമാക്കി തുടങ്ങിയ ഇന്ത്യ കെനിയയെ എതിരില്ലാത്ത മൂന്നു ഗോളിന് തോല്പ്പിക്കുകയും ചെയ്തു. എന്നാല്, ഗ്രൂപ്പ്ഘട്ടത്തിലെ അവസാന മല്സരത്തില് ന്യൂസിലന്ഡിനോട് 2-1ന് ഇന്ത്യ പരാജയപ്പൈട്ടു.
ന്യൂസിലന്ഡിനെ 2-1ന് തോല്പ്പിച്ച കെനിയക്ക് രണ്ടാം മല്സരത്തില് ഇന്ത്യയോട് എതിരില്ലാത്ത മൂന്ന് ഗോളുകള്ക്ക് തോല്വി വഴങ്ങേണ്ടിവന്നു. നിര്ണായക മല്സരത്തില് ചൈനീസ് തായ്പേയിയെ 0-4ന് തകര്ത്ത കെനിയ ന്യൂസിലന്ഡിനെ മറികടന്ന് ഫൈനലിലേക്ക് മുന്നേറുകയായിരുന്നു.