മോശം പിച്ച്
ഇന്ത്യയും പാകിസ്താനും തമ്മിലുള്ള സെമി ഫൈനലിന് വേദിയായ ധാക്കയിലെ ബംഗബന്ധു സ്റ്റേഡിയത്തിലെ പിച്ച് തീരെ നിലവാരമില്ലാത്തതായിരുന്നു. ഈ സ്റ്റേഡിയത്തിലെ പിച്ച് വളരെ മോശമാണെന്ന് നേരത്തേ ഇവിടെ നടന്ന സന്നാഹ മല്സരങ്ങള് തന്നെ തെളിയിച്ചിരുന്നു. എന്നാല് ഇതൊന്നും മുഖവിലയ്ക്കെടുക്കാതെയാണ് സെമി ഇവിടെ തന്നെ നടത്തിയത്.
ഇന്ത്യ- പാക് മല്സരത്തിനിടെ പിച്ചിന്റെ മോശം അവസ്ഥ മൂലം താരങ്ങള് പലപ്പോഴും ഗ്രൗണ്ടില് അടിതെറ്റി വീഴുകയും ചെയ്തിരുന്നു.
പ്രതീക്ഷയേകി ഇന്ത്യന് യുവത്വം
ഇത്തവണ അണ്ടര് 23 ടീമിനെ സാഫ് കപ്പില് പരീക്ഷിക്കാനുള്ള ഇന്ത്യയുടെ ശ്രമം വിജയിച്ചുവെന്നാണ് ഫൈനല് വരെയുള്ള മുന്നേറ്റം തെളിയിക്കുന്നത്. സുനില് ഛേത്രിയടക്കമുള്ള സൂപ്പര് താരങ്ങളില്ലാതെ തന്നെ ഇന്ത്യന് ഫുട്ബോളിന്റെ ഭാവി ശോഭനമാണെന്ന് സാഫ് കപ്പ് അടിവരയിടുന്നു.
മന്വീര് സിങ്, മലയാളി താരം ആഷിഖ് കുരുണിയന്, അനിരുദ്ധ് ഥാപ്പ, വിനീത് റായ്, ഗുര്മന്പ്രീത് സിങ് എന്നീ യുവതാരങ്ങള് മിന്നുന്ന പ്രകടനമാണ് നടത്തിക്കൊണ്ടിരിക്കുന്നത്.
കോണ്സ്റ്റൈന്റെ പരീക്ഷണം
മികച്ച ഫോമിലുള്ള ലാലിയാന്സുവാല ചാങ്തെയെ പാകിസ്താനെതിരായ സെമി ഫൈനലിനുള്ള പ്ലെയിങ് ഇലവനില് നിന്നും കോച്ച് സ്റ്റീഫന് കോണ്സ്റ്റന്ൈന് മാറ്റിനിര്ത്തിയപ്പോള് പലരുടെയുെ നെറ്റി ചുളിഞ്ഞിരുന്നു. ചാങ്തെയുടെ പകരക്കരനായി ടീമിലെത്തിയ നിഖില് പുജാരെ മിന്നുന്ന പ്രകടനമാണ് കാഴ്ചവചച്ചത്.
സെമിയില് വിങുകളിലൂടെയുള്ള പുജാരെയുടെ മിന്നല് നീക്കങ്ങള് പാകിസ്താനെ നിരന്തരം പ്രതിരോധത്തിലാക്കിയിരുന്നു. പിന്നീട് പുജാരെയെ പിന്വലിച്ച് ചാങ്തെയെ രണ്ടാംപകുതിയില് കോച്ച് കളത്തിലിറക്കിയെങ്കിലും താരം ചുവപ്പ് കാര്ഡ് കണ്ടു പുറത്തായിരുന്നു. ഇതോടെ ഫൈനലിലും പുജാരെ തന്നെ കളിക്കുമെന്ന് ഉറപ്പായി.
അവസാന മിനിറ്റുകളിലെ ഏറ്റുമുട്ടലും കാര്ഡും
ഇന്ത്യ- പാക് സെമിയുടെ അവസാന മിനിറ്റുകള് സംഘര്ഷഭരിതമായിരുന്നു. ഇരുടീമിന്റെയും ഓരോ താരങ്ങളെ അംപയര് ചുവപ്പ് കാര്ഡ് നല്കി പുറത്താക്കുകയും ചെയ്തു. ഇന്ത്യന് വിങര് ചാങ്തെയെ പാക് താരം മൊഹ്സിന് അലി ഗുരുതരമായി ഫൗള് ചെയ്തതോടെയാണ് സംഭവങ്ങളുടെ തുടക്കം. ഫൗളില് കുപിതനായ ചാങ്തെ അലിയുമായി തട്ടിക്കയറുകയായിരുന്നു. അന്താരാഷ്ട്ര മല്സരങ്ങളിലെ അനുഭസമ്പത്തില്ലായ്മയാണ് ഇത്തരമൊരു പക്വതയില്ലാത്ത പെരുമാറ്റത്തിലേക്കു ചാങ്തെയെ നയിച്ചത്. ഇതു മൂലം ചുവപ്പ് കാര്ഡ് കണ്ട താരത്തിന് ഫൈനല് നഷ്ടമാവുകയും ചെയ്തു.
ഹൈലൈറ്റ്സ് വീഡിയോ
ഇന്ത്യയും പാകിസ്താനും തമ്മിലുള്ള സെമി ഫൈനലിന്റെ ഹൈലൈറ്റ്സ് വീഡിയോ കാണാം