കോയമ്പത്തൂര്: ഐ ലീഗ് ഫുട്ബോള് ടൂര്ണമെന്റിന്റെ 2018-19 സീസണിന് തുടക്കം. ഉദ്ഘാടന മല്സരത്തില് ആതിഥേയരായ ചെന്നൈ സിറ്റി 4-1ന് ഇന്ത്യന് ആരോസിനെ തരിപ്പണമാക്കി. ഹാട്രിക്ക് നേടിയ സ്പാനിഷ് സ്ട്രൈക്കര് പെഡ്രോ മാന്സിയാണ് ചെന്നൈ സിറ്റിക്ക് ഉജ്ജ്വല ജയം നേടിക്കൊടുത്തത്. കളിയുടെ 32, 49, 64 മിനിറ്റുകളിലായിരുന്നു മാന്സിയുടെ ഗോള്നേട്ടം. ഇന്ത്യന് മണ്ണില് മാന്സിയുടെ അരങ്ങേറ്റ മല്സരം കൂടിയായിരുന്നു ഇത്. 76ാം മിനിറ്റില് അലെക്സാണ്ടര് റൊമെയ്റോ ജെസുരാജ് ചെന്നൈ സിറ്റിയുടെ ഗോള്പട്ടിക പൂര്ത്തിയാക്കി.
ആദ്യ ഗോള് വഴങ്ങിയതിനു ശേഷമാണ് ആരോസിനെതിരേ ചെന്നൈ ഗംഭീര തിരിച്ചുവരവ് നടത്തിയത്. കളിയുടെ രണ്ടാം മിനിറ്റില് അമര്ജിത് സിങ് കിയാമാണ് ആരോസിനു വേണ്ടി ലക്ഷ്യംകണ്ടത്. പിന്നീട് കളിയില് ചെന്നൈ സമ്പൂര്ണ്ണ ആധിപത്യം സ്ഥാപിക്കുകയായിരുന്നു. 11 ടീമുകളാണ് ടൂര്ണമെന്റില് മാറ്റുരയ്ക്കുന്നത്. മിനര്വ പഞ്ചാബാണ് നിലവിലെ ചാംപ്യന്മാര്. ഇന്ന് നടക്കുന്ന മല്സരത്തില് നെറോക്ക ഈസ്റ്റ് ബംഗാളിനെയും മുന് ചാംപ്യന്മാരായ മോഹന് ബഗാന് കേരളത്തില് നിന്നുള്ള ഗോകുലം കേരളയെയും നേരിടും. വൈകീട്ട് 4.30ന് കോഴിക്കോട് ഇഎംഎസ് സ്റ്റേഡിയത്തിലാണ് ഗോകുലം-ബഗാന് മല്സരം അരങ്ങേറുന്നത്.
സ്കൂള് കായിക മേള: ഒന്നാംദിനം മൂന്ന് മീറ്റ് റെക്കോഡുകള്... ആദ്യ സ്വര്ണം ആതിഥേയര്ക്ക്