ബെര്ലിന്: ലോകം ഉറ്റുനോക്കിയ ക്ലാസിക് പോരാട്ടത്തില് യൂറോപ്യന് വമ്പന്മാരായ ജര്മനിയും ലാറ്റിനമേരിക്കന് ഗ്ലാമര് ടീം അര്ജന്റീനയും തമ്മിലുള്ള സൗഹൃദ മല്സരം 2-2നു സമനിലയില് കലാശിച്ചു. രണ്ടു ഗോളുകള്ക്കു പിന്നിട്ടുനിന്ന ശേഷമാണ് മുന് ലോക ചാംപ്യന്മാരായ ജര്മനിയെ അവരുടെ മൈതാനത്ത് അര്ജന്റീന പിടിച്ചുനിര്ത്തിയത്.
സെര്ജി നാബ്രി, കെയ് ഹവേര്ട്ട്സ് എന്നിവരുടെ ഗോളുകളില് ആദ്യ പകുതി അവസാനിക്കുമ്പോള് ജര്മനി 2-0ന് മുന്നിലായിരുന്നു. എന്നാല് രണ്ടാം പരുതിയില് അര്ജന്റീന ശക്തമായി തിരിച്ചടിച്ചു. ലൂക്കാസ് അലാറിയോ, ലൂക്കാസ് ഒക്കാംപോസ് എന്നിവരുടെ ഗോളുകളില് അര്ജന്റീന സമനില കൈക്കലാക്കുകയായിരുന്നു. സസ്പെന്ഷന് നേരിടുന്ന സൂപ്പര് താരവും ക്യാപ്റ്റനുമായ ലയണല് മെസ്സിയില്ലാതെയാണ് ഈ മല്സരത്തില് അര്്ജന്റീന ഇറങ്ങിയത്.
പാകിസ്താന് നാണക്കേട്; മൂന്നാം ട്വന്റി20യിലും ശ്രീലങ്കയ്ക്ക് ജയം
15ാം മിനിറ്റിലാണ് നാബ്രി ജര്മനിയെ മുന്നിലെത്തിച്ചത്. ദേശീയ ടീമിനു വേണ്ടി 11 മല്സരങ്ങളില് നിന്നും താരത്തിന്റെ 10ാം ഗോളായിരുന്നു ഇത്. 22ാം മിനിറ്റില് ജര്മനിയുടെ ആധിപത്യമുറപ്പിച്ച് ഹവേര്ട്സ് ലീഡുയര്ത്തി. നാബ്രിയാണ് ഈ ഗോളിനു വഴിയൊരുക്കിയത്. തുടര്ന്നും ജര്മനിയുടെ തുടരെയുള്ള മുന്നേറ്റങ്ങളാണ് കണ്ടത്. രണ്ടാംപകുതിയിലും ഇരുടീമുകളും ആക്രമിച്ചു കളിച്ചു. 66ാ മിനിറ്റില് തകര്പ്പനൊരു ഹെഡ്ഡറിലൂടെ അലാറിയോ അര്ജന്റീനയുടെ ആദ്യ ഗോള് മടക്കി. നിശ്ചിത സമയം അവസാനിക്കാന് അഞ്ച് മിനിറ്റ് ബാക്കിയുള്ളപ്പോള് ഒകാംപോസിലൂടെ അര്ജന്ഖീന സമനിലയും കണ്ടെത്തി.