ഹാരി കെയ്ൻ അല്ല, ഇം​ഗ്ലണ്ടിന്റെ കുന്തമുന ഈ 23-കാരൻ! മെസ്സിയും കൂട്ടരും ഭയക്കേണ്ടത് ബെല്ലിംഗ്ഹാമിനെയോ?

2026 ഫിഫ ലോകകപ്പ് ആവേശകരമായ സെമി ഫൈനൽ ഘട്ടത്തിലേക്ക് കടക്കുമ്പോൾ ഫുട്ബോൾ ലോകത്തിന്റെ മുഴുവൻ ശ്രദ്ധയും ഇംഗ്ലണ്ടിന്റെ യുവ മിഡ്ഫീൽഡർ ജൂഡ് ബെല്ലിംഗ്ഹാമിലാണ്. ടൂർണമെന്റ് തുടങ്ങുമ്പോൾ ഹാരി കെയ്നിലേക്ക് നീണ്ടിരുന്ന ക്യാമറക്കണ്ണുകളെല്ലാം ഇപ്പോൾ ഈ ഇരുപത്തിമൂന്നുകാരനിലേക്ക് തിരിഞ്ഞിരിക്കുകയാണ്. ഇംഗ്ലണ്ടിനെ 60 വർഷത്തെ കിരീട വരൾച്ച അവസാനിപ്പിക്കാൻ സഹായിക്കുന്ന പ്രധാന കരുത്തായി ബെല്ലിംഗ്ഹാം മാറിയിരിക്കുന്നു. നോർവേയ്ക്കെതിരായ ക്വാർട്ടർ ഫൈനലിൽ സമ്മർദ്ദഘട്ടത്തിൽ ഇരട്ട ഗോളുകൾ നേടി ഇംഗ്ലണ്ടിനെ സെമിയിലേക്ക് നയിച്ചതോടെയാണ് താരം ടീമിന്റെ ഏറ്റവും പ്രധാനപ്പെട്ട കണ്ണിയാണെന്ന് ഉറപ്പിച്ചത്.

പെലെയുടെ റെക്കോർഡിനൊപ്പം; ബോബി ചാൾട്ടനോട് സാമ്യം

ടൂർണമെന്റിൽ ഇതുവരെ കളിച്ച ആറ് മത്സരങ്ങളിൽ നിന്ന് ആറ് ഗോളുകളും ഒരു അസിസ്റ്റും ബെല്ലിംഗ്ഹാം സ്വന്തമാക്കി കഴിഞ്ഞു. ക്രൊയേഷ്യ, പനാമ, മെക്സിക്കോ, നോർവേ എന്നീ ടീമുകൾക്കെതിരെ ഗോളടിച്ച താരം ഇതിനകം നാല് തവണ 'ഫിഫ പ്ലെയർ ഓഫ് ദി മാച്ച്' പുരസ്കാരവും സ്വന്തമാക്കി. ലോകകപ്പ് നോക്കൗട്ട് മത്സരങ്ങളിൽ തുടർച്ചയായി രണ്ട് ഗോളുകൾ നേടുന്ന ചരിത്രത്തിലെ രണ്ടാമത്തെ ഏറ്റവും പ്രായം കുറഞ്ഞ താരമെന്ന പെലെയുടെ റെക്കോർഡിനൊപ്പവും ബെല്ലിംഗ്ഹാം ഇടംപിടിച്ചു.

ഇംഗ്ലണ്ടിന്റെ ഈ യുവതാരത്തിന്റെ കളിശൈലി ആരാധകർക്ക് ഓർമ്മപ്പെടുത്തുന്നത് 1966-ൽ ഇംഗ്ലണ്ടിന് ലോകകപ്പ് നേടിക്കൊടുത്ത ഇതിഹാസ താരം ബോബി ചാൾട്ടനെയാണ്. ചാൾട്ടനെപ്പോലെ മധ്യനിരയെ നിയന്ത്രിക്കാനും നിർണ്ണായക ഘട്ടങ്ങളിൽ ഗോളുകൾ കണ്ടെത്താനും ബെല്ലിംഗ്ഹാമിന് സാധിക്കുന്നുണ്ട്. റയൽ മാഡ്രിഡിൽ പരിക്കുകൾ അലട്ടിയ ഒരു സീസണിന് ശേഷമാണ് താരം ലോകകപ്പിൽ തന്റെ കരിയറിലെ ഏറ്റവും മികച്ച ഫോമിൽ കളിക്കുന്നത്.

സെമിയിൽ അർജന്റീനയുമായി വമ്പൻ പോരാട്ടം

ആരാധകർ കാത്തിരിക്കുന്ന വലിയ പോരാട്ടത്തിൽ നിലവിലെ ചാമ്പ്യന്മാരായ അർജന്റീനയെയാണ് ഇംഗ്ലണ്ട് നേരിടുക. ചരിത്രവും വികാരങ്ങളും നിറഞ്ഞ ഈ സെമി ഫൈനൽ പോരാട്ടത്തിൽ ലയണൽ മെസ്സിയുടെ നേതൃത്വത്തിലുള്ള അർജന്റീനയെ തളയ്ക്കാൻ ഇംഗ്ലണ്ട് പ്രധാനമായും ആശ്രയിക്കുന്നത് ബെല്ലിംഗ്ഹാമിന്റെ മാന്ത്രിക പ്രകടനത്തെയായിരിക്കും. ഇന്ത്യൻ സമയം ജൂലൈ 16 വ്യാഴാഴ്ച പുലർച്ചെ 12:30-ന് അറ്റ്ലാന്റ സ്റ്റേഡിയത്തിലാണ് ഈ സ്വപ്ന സെമി ഫൈനൽ നടക്കുക.

എർലിങ് ഹാളണ്ടിന്റെ നോർവെയെ മുട്ടുകുത്തിച്ചാണ് ഇം​ഗ്ലണ്ടിന്റെ വരവെങ്കിൽ, സ്വിസ് പടയെ അടിയറവ് പറയിച്ചാണ് അർജന്റീനയുടെ തേരോട്ടം. ലോകകപ്പിൽ ഏറ്റവും കൂടുതൽ ​ഗോളുകൾ നേടിയവരുടെ പട്ടികയിൽ കിലിയൻ എംബാപ്പെയ്ക്കൊപ്പം ലയണൽ മെസി ഒന്നാം സ്ഥാനത്ത് തന്നെ തുടരുന്നുണ്ട്. ഇം​ഗ്ലണ്ട് പ്രതിരോധത്തിന് ഏറ്റവും വലിയ വെല്ലുവിളിയും മെസ്സിയെ എങ്ങനെ പൂട്ടാം എന്നുതന്നെയാകും. എന്നാൽ, മെസി മാർക്ക് ചെയ്യപ്പെട്ടാലും ജൂലിയൻ അൽവാരസ് ഫോമിലേക്ക് തിരിച്ചുവന്നത് അർജന്റീനയ്ക്ക് കരുത്താകും. പിന്നെ, രണ്ടാം പകുതിയിൽ ലൗത്താരോ മാർട്ടീനസ് കൂടി വരുന്നതോടെ ആക്രമണ നിര സജ്ജമാണ്. ഇവരെ പിടിച്ചുകെട്ടുക എന്നത് തന്നെയാണ് ഇം​ഗ്ലീഷ് പടയുടെ ഏറ്റവും വലിയ വെല്ലുവിളി.