ഇം​ഗ്ലണ്ടിന്റെ യാത്ര ഇവിടെ അവസാനിക്കും, മെസിയെ പൂട്ടുക എളുപ്പമല്ല! സ്വന്തം രാജ്യത്തെ തള്ളിപ്പറഞ്ഞ് ബെക്കാം

ഫിഫ ലോകകപ്പ് 2026-ന്റെ രണ്ടാം സെമി ഫൈനലിൽ അർജന്റീനയും ഇംഗ്ലണ്ടും തമ്മിലുള്ള മഹാപോരാട്ടത്തിന് മണിക്കൂറുകൾ മാത്രം ബാക്കിനിൽക്കെ, സ്വന്തം രാജ്യത്തെ ഞെട്ടിക്കുന്ന പ്രസ്താവനയുമായി ഇംഗ്ലീഷ് ഫുട്ബോൾ ഇതിഹാസം ഡേവിഡ് ബെക്കാം. നിലവിലെ ഫോമിൽ ലയണൽ മെസ്സിയെ തടയാൻ ഇംഗ്ലീഷ് പ്രതിരോധത്തിന് കഴിയില്ലെന്നും ഇംഗ്ലണ്ടിന്റെ ലോകകപ്പ് സ്വപ്നങ്ങൾ സെമിയിൽ അവസാനിക്കാനാണ് സാധ്യതയെന്നും ബെക്കാം തുറന്നടിച്ചു.

മെസ്സിയെ പൂട്ടാൻ ഇംഗ്ലണ്ടിന് ആളില്ല

അർജന്റീന നിലവിൽ കളിക്കുന്നത് മറ്റൊരു തലത്തിലുള്ള ആത്മവിശ്വാസത്തോടെയാണെന്ന് ബെക്കാം വിലയിരുത്തി. ലയണൽ മെസ്സി തന്റെ പഴയ ഫോമിലേക്ക് ഉയർന്നാൽ കളിയുടെ ഗതി തന്നെ മാറ്റിമറിക്കാൻ അദ്ദേഹത്തിന് സാധിക്കും:

"ഞാൻ തികച്ചും സത്യസന്ധമായി പറയുകയാണെങ്കിൽ, ഇംഗ്ലണ്ടിന്റെ ലോകകപ്പ് യാത്രയുടെ അവസാനമായിരിക്കും ഇത്. മെസ്സിക്ക് മൈതാനത്ത് ചെറിയൊരു സ്ഥലം പോലും നൽകിയാൽ കളി അർജന്റീനയുടെ കൈകളിലാകും. ഇംഗ്ലണ്ടിന് മികച്ച കളിക്കാരുണ്ടെന്നത് ശരിയാണ്, പക്ഷേ 90 മിനിറ്റ് നേരം മെസ്സിയെ പൂർണ്ണമായി തടഞ്ഞുനിർത്താൻ പോന്ന ആരെയും ഈ സ്ക്വാഡിൽ ഞാൻ കാണുന്നില്ല. മെസ്സിയെ മാർക്ക് ചെയ്ത് നിർത്തുക സാധ്യമല്ല, അദ്ദേഹത്തിന് ഒരു മോശം ദിവസമായിരിക്കാൻ പ്രാർത്ഥിക്കുക മാത്രമേ വഴിയുള്ളൂ."

തന്റെ വാക്കുകൾ ഇംഗ്ലണ്ടിനോടുള്ള അനാദരവല്ലെന്നും, മറിച്ച് കഴിഞ്ഞ രണ്ട് പതിറ്റാണ്ടായി ലോകത്തെ ഏറ്റവും മികച്ച ടീമുകൾക്കെതിരെ മെസ്സി കാഴ്ചവെക്കുന്ന പ്രകടനത്തോടുള്ള ആരാധന മാത്രമാണെന്നും ബെക്കാം വ്യക്തമാക്കി. ഇംഗ്ലണ്ട് മെസ്സിക്ക് ഒരൊറ്റ അവസരം നൽകിയാൽ പോലും അതിന്റെ വില നൽകേണ്ടി വരുമെന്നും അദ്ദേഹം കൂട്ടിച്ചേർത്തു.

സ്വന്തം രാജ്യം തന്നെ തെറ്റുകാരനാക്കട്ടെ എന്ന് ആഗ്രഹം

മെസ്സിക്ക് ഗോളടിക്കാൻ അഞ്ച് അവസരങ്ങൾ ആവശ്യമില്ലെന്നും ഒരൊറ്റ അവസരം കൊണ്ട് കളി തീർക്കാൻ അദ്ദേഹത്തിന് കഴിയുമെന്നും ബെക്കാം ഓർമ്മിപ്പിച്ചു. താൻ ഒരു ഇംഗ്ലണ്ടുകാരനായതുകൊണ്ട് തന്നെ ഇംഗ്ലണ്ട് ഈ പ്രവചനം തെറ്റിക്കണമെന്നാണ് തന്റെ ആഗ്രഹമെന്നും, എന്നാൽ അർജന്റീന അവരുടെ സ്വാഭാവിക കളി പുറത്തെടുത്താൽ ഫൈനലിലേക്ക് യോഗ്യത നേടുമെന്നും ബെക്കാം പറഞ്ഞു. ചരിത്രത്തിൽ എന്നും ഓർമ്മിക്കപ്പെടുന്ന ഒരു ലോകകപ്പ് രാത്രിയായിരിക്കും ഇതെന്നും പറഞ്ഞാണ് മുൻ ഇംഗ്ലീഷ് ക്യാപ്റ്റൻ നിർത്തിയത്. മുൻപ് 1998 ലോകകപ്പിൽ അർജന്റീനയ്ക്കെതിരായ മത്സരത്തിൽ ബെക്കാമിന് ചുവപ്പ് കാർഡ് ലഭിച്ചതും 2002 ലോകകപ്പിൽ ഇതേ അർജന്റീനയ്ക്കെതിരെ ​ഗോളടിച്ച് ഇം​ഗ്ലണ്ടിനെ ബെക്കാം വിജയത്തിലെത്തിച്ചതുമെല്ലാം ചരിത്രത്തിന്റെ ഭാഗമാണ്. ആറ് ലോകകപ്പുകളിൽ കളിച്ചിട്ടുണ്ടെങ്കിലും, തന്റെ കരിയറിൽ മൊത്തം 59 രാജ്യങ്ങൾക്കായി ബൂട്ട് കെട്ടിയിട്ടുണ്ടെങ്കിലും ലയണൽ മെസി ഇതുവരെ ഇം​ഗ്ലണ്ടിനെ നേരിട്ടിട്ടില്ല. ഇതാദ്യമായാണ് തന്റെ കരിയറിൽ മെസ്സി ഇം​ഗ്ലീഷ് പടയ്ക്കെതിരെ കളത്തിലിറങ്ങുന്നത്. ഇരു ടീമുകളും വലിയ ആത്മവിശ്വാസത്തോടെയാണ് സെമി ഫൈനലിനെ സമീപിക്കുന്നത്. വർഷങ്ങളുടെ വൈരമുള്ള ഇം​ഗ്ലണ്ടും അർജന്റീനയും ഏറ്റുമുട്ടുമ്പോൾ ഒരു നെക്ക് ടു നെക്ക് പോരാട്ടം പ്രേക്ഷകർക്ക് പ്രതീക്ഷിക്കാം.