ട്രംപിന്റെ ഇടപെടലിനും രക്ഷിക്കാനായില്ല; ആതിഥേയരായ യു.എസ്.എയെ തകർത്തെറിഞ്ഞ് ബെൽജിയം ക്വാർട്ടറിൽ!

ഫിഫ ലോകകപ്പിന്റെ പ്രീ ക്വാർട്ടർ പോരാട്ടത്തിൽ സഹ-ആതിഥേയരായ യു.എസ്.എയെ ഒന്നിനെതിരെ നാല് ഗോളുകൾക്ക് തകർത്തുവിട്ട് ബെൽജിയം ക്വാർട്ടർ ഫൈനലിൽ പ്രവേശിച്ചു. സീറ്റിൽ സ്റ്റേഡിയത്തിൽ നടന്ന മത്സരത്തിൽ യുവതാരം ചാർലസ് ഡി കെറ്റലാറെയുടെ ഇരട്ട ഗോളുകളും ഹാൻസ് വനാകെൻ, റൊമേലു ലുക്കാക്കു എന്നിവരുടെ പ്രകടനവുമാണ് ബെൽജിയത്തിന് മിന്നുന്ന വിജയം സമ്മാനിച്ചത്. ഇതോടെ ഈ ലോകകപ്പിന് ആതിഥേയത്വം വഹിച്ച മൂന്ന് രാജ്യങ്ങളും (യു.എസ്.എ, മെക്സിക്കോ, കാനഡ) ടൂർണമെന്റിൽ നിന്ന് പുറത്തായി.

ആവേശകരമായ ക്വാർട്ടർ ഫൈനലിൽ മുൻ ചാമ്പ്യന്മാരായ സ്പെയിനാണ് ഇനി ബെൽജിയത്തിന്റെ എതിരാളികൾ. മത്സരത്തിന് മുന്നോടിയായി യു.എസ്. താരം ഫൊളാരിൻ ബലോഗന്റെ ചുവപ്പ് കാർഡ് വിലക്ക് ഫിഫ അപ്പീൽ കമ്മിറ്റി റദ്ദാക്കിയത് വലിയ വിവാദങ്ങൾക്ക് വഴിവെച്ചിരുന്നു.

ഡി കെറ്റലാറെയുടെ കരുത്തിൽ ബെൽജിയം മുന്നോട്ട്

മത്സരം ആരംഭിച്ച് ഒൻപതാം മിനിറ്റിൽത്തന്നെ നിക്കോളാസ് റാസ്കിന്റെ അസിസ്റ്റിൽ നിന്ന് ചാർലസ് ഡി കെറ്റലാറെ ബെൽജിയത്തെ മുന്നിലെത്തിച്ചു. എന്നാൽ 31-ാം മിനിറ്റിൽ ലഭിച്ച ഫ്രീ കിക്ക് മനോഹരമായി വലയിലെത്തിച്ച് മാലിക് ടിൽമാൻ യു.എസ്.എയ്ക്ക് സമനില നേടിക്കൊടുത്തു. അമേരിക്കൻ ആരാധകരുടെ ആവേശം അധികനേരം നീണ്ടുനിന്നില്ല; വെറും രണ്ട് മിനിറ്റിനുള്ളിൽ (33-ാം മിനിറ്റ്) ലിയാൻഡ്രോ ട്രൊസാർഡിന്റെ ക്രോസിൽ നിന്ന് ഒരു മികച്ച ഹെഡ്ഡറിലൂടെ ഡി കെറ്റലാറെ ബെൽജിയത്തിന്റെ രണ്ടാം ഗോളും സ്വന്തമാക്കി. ആദ്യ പകുതിയിൽ ബെൽജിയം 2-1 ന് മുന്നിലായിരുന്നു.

യു.എസിന്റെ പോരാട്ടവും ലുക്കാക്കുവിന്റെ ഫിനിഷിംഗും

രണ്ടാം പകുതിയിൽ സമനിലയ്ക്കായി യു.എസ്.എ കിണഞ്ഞുപരിശ്രമിച്ചെങ്കിലും 57-ാം മിനിറ്റിൽ ബോക്സിന് പുറത്തുനിന്ന് ഹാൻസ് വനാകെൻ തൊടുത്ത ലോങ് ഷൂട്ട് അമേരിക്കൻ വല കുലുക്കിയതോടെ യു.എസിന്റെ പ്രതീക്ഷകൾ മങ്ങി. കളി അവസാനിക്കാൻ മിനിറ്റുകൾ മാത്രം ബാക്കിനിൽക്കെ സൂപ്പർ താരം കെവിൻ ഡി ബ്രൂയ്നെക്കൊപ്പം ബെഞ്ചിലായിരുന്ന റൊമേലു ലുക്കാക്കു സബ്സ്റ്റിറ്റ്യൂട്ടായി മൈതാനത്തെത്തി. ഇഞ്ചുറി ടൈമിൽ (93-ാം മിനിറ്റ്) വനാകെന്റെ പാസിൽ നിന്ന് ലുക്കാക്കു കൂടെ ഗോൾ നേടിയതോടെ ബെൽജിയം 4-1 ന്റെ ആധികാരിക വിജയം ഉറപ്പിച്ചു. പരിക്കേറ്റതിനെ തുടർന്ന് യു.എസ്. ക്യാപ്റ്റൻ ക്രിസ്റ്റ്യൻ പുലിസിച്ചിന് രണ്ടാം പകുതിയുടെ തുടക്കത്തിൽത്തന്നെ കളം വിടേണ്ടി വന്നത് അമേരിക്കയ്ക്ക് കനത്ത തിരിച്ചടിയായിരുന്നു.

ഇനി ക്വാർട്ടറിൽ പോർച്ചു​ഗലിനെ വീഴ്ത്തി മുന്നോട്ട് കുതിച്ച സ്പെയിനാണ് ബെൽജിയത്തിന്റെ എതിരാളി. ക്രിസ്റ്റ്യാനോ റൊണാൾഡോയുടെ പോർച്ചു​ഗലിനെ തകർത്തതോടെ റൊണാൾഡോയുടെ അവസാന ലോകകപ്പ് മത്സരവും പൂർത്തിയായിരിക്കുകയാണ്. കഴിഞ്ഞ ദിവസം മറ്റൊരു ഇതിഹാസ താരമായ നെയ്മർ ജൂനിയറും തന്റെ അന്താരാഷ്ട്ര കരിയർ അവസാനിപ്പിച്ചിരുന്നു. നോർവെയോട് തോൽവി വഴങ്ങിയതിന് ശേഷമാണ് ബ്രസീലിയൻ ഇതിഹാസം ഫുട്ബോളിനോട് വിട പറഞ്ഞത്. ഇന്ന് ലയണൽ മെസിയുടെ അർജന്റീന മുഹമ്മദ് സലാഹിന്റെ ഈജിപ്തിനെ പ്രീ ക്വാർട്ടറിൽ നേരിടും.