18-കാരൻ യമാൽ മുതൽ 41-കാരൻ റൊണാൾഡോ വരെ!; കാനഡയിലും അമേരിക്കയിലുമായി മാസ്സ് കാണിക്കാൻ ഇവരെത്തും!

ഫുട്ബോൾ പ്രേമികളുടെ നീണ്ട കാത്തിരിപ്പിന് വിരാമമിട്ടുകൊണ്ട് 2026 ഫിഫ ലോകകപ്പ് ജൂൺ 11-ന് പന്തുരുളാൻ പോവുകയാണ്. അമേരിക്ക, കാനഡ, മെക്സിക്കോ എന്നീ രാജ്യങ്ങളിലെ 16 ലോകോത്തര നഗരങ്ങളിലാണ് ഇത്തവണത്തെ ആവേശം അരങ്ങേറുന്നത്. മെക്സിക്കോ സിറ്റി, ടൊറന്റോ, ലോസ് ആഞ്ചലസ്, ന്യൂയോർക്ക്, മിയാമി തുടങ്ങിയ പ്രമുഖ സ്റ്റേഡിയങ്ങളിൽ ലോകത്തിലെ ഏറ്റവും മികച്ച കളിക്കാർ കനകക്കിരീടത്തിനായി പോരാടും.

കരിയറിലെ അവസാന ലോകകപ്പ് കളിക്കുന്ന ഇതിഹാസങ്ങൾ മുതൽ ലോകം കീഴടക്കാൻ വരുന്ന യുവതുർക്കികൾ വരെ ഇത്തവണ ടൂർണമെന്റിന്റെ ഗതി നിർണ്ണയിക്കും. 2026 ലോകകപ്പിൽ എല്ലാവരും ഉറ്റുനോക്കുന്ന ആ 10 പ്രമുഖ താരങ്ങൾ ആരൊക്കെയാണെന്ന് നോക്കാം:

1. ലയണൽ മെസ്സി (അർജന്റീന)

2022 ഖത്തർ ലോകകപ്പിൽ അർജന്റീനയെ മൂന്നാം ലോകകിരീടത്തിലേക്ക് നയിച്ച ലയണൽ മെസ്സി തന്റെ കുട്ടിക്കാലത്തെ വലിയ സ്വപ്നമാണ് അന്ന് സാക്ഷാത്കരിച്ചത്. ഇപ്പോൾ 38 വയസ്സുള്ള ഈ അത്ഭുത താരം തന്റെ കരിയറിലെ ആറാമത്തെ ലോകകപ്പ് കളിക്കാനാണ് വടക്കേ അമേരിക്കയിലേക്ക് വരുന്നത്. നിലവിലെ ചാമ്പ്യന്മാരായ അർജന്റീനയുടെ കിരീടം നിലനിർത്തുക എന്ന വലിയ ലക്ഷ്യമാണ് മെസ്സിക്കുള്ളത്.

2. ലാമിൻ യമാൽ (സ്പെയിൻ)

നിലവിൽ ലോക ഫുട്ബോളിലെ ഏറ്റവും തിളക്കമാർന്ന യുവതാരങ്ങളിൽ മുൻപനാണ് സ്പെയിന്റെ ലാമിൻ യമാൽ. യൂറോ 2024-ൽ സ്പെയിനെ കിരീടത്തിലേക്ക് നയിക്കുന്നതിൽ നിർണായക പങ്കുവഹിച്ച ഈ 18-കാരൻ വിങ്ങർ വലിയ പ്രതീക്ഷകളോടെയാണ് തന്റെ ആദ്യ ലോകകപ്പിന് ഇറങ്ങുന്നത്. പ്രായത്തെ വെല്ലുന്ന പക്വതയും അസാധ്യമായ ഡ്രിബ്ലിങ് മികവുമുള്ള യമാൽ ഇത്തവണത്തെ വലിയ ആകർഷണമാണ്.

3. കിലിയൻ എംബാപ്പെ (ഫ്രാൻസ്)

കഴിഞ്ഞ ഖത്തർ ലോകകപ്പ് ഫൈനലിൽ ഹാട്രിക് നേടി ഗോൾഡൻ ബൂട്ട് സ്വന്തമാക്കിയിട്ടും കിരീടം നഷ്ടമായതിന്റെ സങ്കടം തീർക്കാനാണ് കിലിയൻ എംബാപ്പെ വരുന്നത്. നിലവിൽ 27 വയസ്സുള്ള എംബാപ്പെ ലോകത്തിലെ ഏറ്റവും അപകടകാരിയായ സ്ട്രൈക്കർമാരിൽ ഒരാളാണ്. ഫ്രാൻസിനെ തങ്ങളുടെ മൂന്നാം ലോകകിരീടത്തിലേക്ക് നയിക്കാൻ എംബാപ്പെ മുന്നിൽ നിന്ന് പൊരുതും.

4. എർലിങ് ഹാലണ്ട് (നോർവേ)

നീണ്ട 28 വർഷത്തെ കാത്തിരിപ്പിന് ശേഷമാണ് നോർവേയെ ലോകകപ്പിലേക്ക് യോഗ്യത നേടാൻ എർലിങ് ഹാലണ്ട് സഹായിച്ചത്. അതുകൊണ്ട് തന്നെ ഹാലണ്ടിന്റെ കരിയറിലെ ലോകകപ്പ് അരങ്ങേറ്റം കൂടിയാണിത്. യൂറോപ്യൻ യോഗ്യതാ മത്സരങ്ങളിൽ ടോപ്പ് സ്കോറർ ആയി തിളങ്ങിയ ഈ സൂപ്പർ സ്ട്രൈക്കറിലാണ് നോർവേയുടെ മുഴുവൻ പ്രതീക്ഷകളും.

5. ക്രിസ്റ്റ്യാനോ റൊണാൾഡോ (പോർച്ചുഗൽ)

തന്റെ കരിയറിലെ ആറാമത്തെ ലോകകപ്പ് കളിക്കുക എന്ന റെക്കോർഡ് സ്വന്തമാക്കാൻ കൂടിയാണ് ക്രിസ്റ്റ്യാനോ റൊണാൾഡോ തയ്യാറെടുക്കുന്നത്. 41-ാം വയസ്സിലും പ്രായത്തെ വെല്ലുന്ന ഫിറ്റ്നസ്സോടെ പോർച്ചുഗൽ ആക്രമണ നിരയുടെ പ്രധാന കരുത്ത് റൊണാൾഡോ തന്നെയാണ്. ക്ലബ്ബ് തലത്തിലും അന്താരാഷ്ട്ര തലത്തിലും എല്ലാ ട്രോഫികളും നേടിയ റൊണാൾഡോയ്ക്ക് തന്റെ കരിയർ പൂർണ്ണമാക്കാൻ ഈ ഒരു ലോകകപ്പ് കൂടി വേണം.

6. ഹാരി കെയ്ൻ (ഇംഗ്ലണ്ട്)

ബയേൺ മ്യൂണിക്കിനായി തകർപ്പൻ ഫോമിൽ ​ഗോൾവേട്ട നടത്തിയ ശേഷമാണ് ഇംഗ്ലണ്ട് നായകൻ ഹാരി കെയ്ൻ ലോകകപ്പിനെത്തുന്നത്. 2018 ലോകകപ്പിലെ ഗോൾഡൻ ബൂട്ട് ജേതാവും ഇംഗ്ലണ്ടിന്റെ എക്കാലത്തെയും മികച്ച ഗോൾ സ്കോററുമായ കെയ്നിലാണ് ഇംഗ്ലീഷ് പടയുടെ പ്രധാന പ്രതീക്ഷകൾ.

7. വിനീഷ്യസ് ജൂനിയർ (ബ്രസീൽ)

കഴിഞ്ഞ ലോകകപ്പിൽ ടീമിൽ ഇടം കണ്ടെത്താൻ ശ്രമിച്ചിരുന്ന വിനീഷ്യസ് ഇന്ന് ബ്രസീൽ ആക്രമണ നിരയുടെ ഏറ്റവും പ്രധാനപ്പെട്ട കപ്പിത്താനാണ്. തന്റെ വേഗത കൊണ്ടും കളിയിലെ മാന്ത്രികത കൊണ്ടും ലോകത്തെ ഏത് പ്രതിരോധ കോട്ടയും തകർക്കാൻ കെൽപ്പുള്ള വിനീഷ്യസ് ബ്രസീലിന് ആറാം ലോകകിരീടം നേടിക്കൊടുക്കാൻ മുന്നിലുണ്ടാകും.

8. അന്റോയിൻ സെമെൻയോ (ഘാന)

തന്റെ ആദ്യ ലോകകപ്പിന് ഇറങ്ങുന്ന അന്റോയിൻ സെമെൻയോയാണ് നിലവിൽ ഘാനയുടെ ഏറ്റവും വലിയ ആക്രമണ താരം. ക്ലബ്ബ് തലത്തിലെ മികച്ച പ്രകടനത്തിലൂടെ ആഫ്രിക്കയിലെ ഏറ്റവും ആവേശകരമായ യുവ പ്രതിഭയായി മാറിയ സെമെൻയോ ബ്ലാക്ക് സ്റ്റാർസിനെ പുതിയ ഉയരങ്ങളിലേക്ക് നയിക്കുമെന്നാണ് ആരാധകർ കരുതുന്നത്.

9. അർദ ഗുലർ (തുർക്കി)

നീണ്ട രണ്ട് പതിറ്റാണ്ടുകൾക്ക് ശേഷമാണ് തുർക്കി ലോകകപ്പ് കളിക്കാൻ യോഗ്യത നേടുന്നത്. റയൽ മാഡ്രിഡിന്റെ 21-കാരനായ ഈ അത്ഭുത ബാലനിലാണ് തുർക്കിയുടെ എല്ലാ പ്രതീക്ഷകളും. യൂറോപ്പിലെ മികച്ച യുവ കളിക്കാരിലൊരാളായ ഗുലറിന് ലോകവേദിയിൽ തന്റെ കഴിവ് തെളിയിക്കാനുള്ള സുവർണ്ണാവസരമാണിത്.

10. മുഹമ്മദ് സലാ (ഈജിപ്ത്)

ആഫ്രിക്കയിലെ എക്കാലത്തെയും മികച്ച ഫുട്ബോൾ താരങ്ങളിൽ ഒരാളായ മുഹമ്മദ് സലാ തന്റെ കരിയറിലെ അപൂർണ്ണമായ അധ്യായം പൂർത്തിയാക്കാനാണ് വരുന്നത്. ക്ലബ്ബ് തലത്തിൽ ഒരുപാട് ബഹുമതികൾ നേടിയെങ്കിലും ഈജിപ്ഷ്യൻ നായകന് ദേശീയ ടീമിനൊപ്പം വലിയൊരു നേട്ടം സ്വന്തമാക്കാൻ കഴിഞ്ഞിട്ടില്ല. 33-കാരനായ സലായുടെ അവസാന ലോകകപ്പ് പോരാട്ടമായിരിക്കാം ഇത്.