വിരാട് കോലിയുടെ വിക്കറ്റുമായി സഹീർ ഖാൻ മടങ്ങി? സഹീർഖാനെ ഇനിയൊരിക്കലും ഐപിഎല്ലിൽ കാണാൻ കഴിയില്ല?

പ്രതിഭാശാലിയായ സഹീർ

ഇന്ത്യ കണ്ട ഏറ്റവും മികച്ച ഫാസ്റ്റ് ബൗളർമാരിൽ ഒരാൾ എന്നല്ല, ബൗളർ എന്ന് തന്നെ പറയാം സഹീർഖാനെ. വേഗത, സ്വിങ്, കൃത്യത - ഒരു ഫാസ്റ്റ് ബൗളർക്ക് വേണ്ട എല്ലാ ചേരുവകളും സഹീറിൽ ഉണ്ടായിരുന്നു. പുതിയ പന്തിലും പഴയ പന്തിലും സഹീർ വിസ്മയങ്ങൾ തീർത്തു. 2011 ലോകകപ്പ് വിജയത്തിലെ പ്രധാനിയായി - പക്ഷേ അനവസരത്തിലെ പരിക്കുകൾ സഹീറിന്‍റെ കളിക്ക് തടസമായി.

ക്രിക്കറ്റിൽ നിന്നും വിരമിച്ചു

2015ലാണ് സഹീർഖാൻ അന്താരാഷ്ട്ര ക്രിക്കറ്റിൽ നിന്നും വിരമിച്ചത്. എന്നാല്‍ പിന്നീടും സഹീർ ഐ പി എല്ലിൽ കളിക്കാൻ മനസ് കാണിച്ചു. ഇനി ഒരു സീസൺ എന്നാണ് സഹീർ കഴിഞ്ഞ സീസൺ തീരുമ്പോൾ. എന്ന് വെച്ചാൽ ഈ സീസണോടെ സഹീർ കളി നിർത്തും. ഈ സീസണിലെ ഡെല്‍ഹിയുടെ കളി കഴിഞ്ഞെങ്കിലും സഹീർ പ്രത്യേകിച്ച് ഒരു പ്രഖ്യാപനവും നടത്തിയിട്ടില്ല.

ഐപിഎൽ 2017

11 മത്സരങ്ങളിലാണ് സഹീർഖാന്‍ ഇത്തവണ ഡെൽഹിക്ക്വേണ്ടി ഇറങ്ങിയത്. 40.1 ഓവറുകൾ എറിഞ്ഞു. 313 റൺസ് വിട്ടുകൊടുത്ത് 10 വിക്കറ്റുകളും വീഴ്ത്തി. 20 റൺസിന് മൂന്ന് വിക്കറ്റാണ് മികച്ച പ്രകടനം. പവർ പ്ലേയിലും ഡെത്ത് ഓവറുകളിലും പന്തെറിഞ്ഞ സഹീർ പഴയ ഫോമിൻറെ മിന്നലാട്ടങ്ങൾ കാണിച്ചു.

അവസാന വിക്കറ്റ് കോലി

റോയൽ ചാലഞ്ചേഴ്സ് ബാംഗ്ലൂരിനെതിരെയായിരുന്നു സഹീർഖാൻ ഐ പി എല്ലിൽ അവസാനമായി കളിച്ചത്. കളി ഡെൽഹി 10 റൺസിന് തോറ്റു. സഹീറിന്റെ അവസാനത്തെ വിക്കറ്റ് വിരാട് കോലിയുടെതും. 2008ൽ സൗരവ് ഗാംഗുലിയുടെ വിക്കറ്റ് വീഴ്ത്തി തുടങ്ങിയ സഹീർ മറ്റൊരു സൂപ്പർ സ്റ്റാറിന്റെ വിക്കറ്റോടെ എന്നെന്നേക്കുമായി ഐ പി എൽ നിർത്തുകയാണോ എന്നാണ് ആരാധകർക്ക് അറിയേണ്ടത്.

സഹീറിന്റെ ടീമുകൾ

റോയൽ ചാലഞ്ചേഴ്സ് ബാംഗ്ലൂരിന് വേണ്ടിയാണ് സഹീർഖാൻ ഐ പി എല്ലിൽ കളിച്ചുതുടങ്ങിയത്. പിന്നീട് മുംബൈ ഇന്ത്യൻസിന്റെ ഓപ്പണിങ് ബൗളറായി. അവസാന സീസണുകളിൽ ഡെൽഹി ഡെയർഡെവിൾസിന് വേണ്ടിയാണ് സഹീർ കളിച്ചത്. ഡെൽഹിയെ നയിക്കുകയും ചെയ്തു. വരും സീസണിൽ ഡെൽഹി സഹീറിനെ നിലനിർത്തുമോ അതോ സഹീർ കളി നിർത്തുമോ - കണ്ടറിയണം.