WTC 2021: കോലിയുടെ ക്യാപ്റ്റന്‍സിയില്‍ കൂടുതല്‍ ടെസ്റ്റ് വിക്കറ്റ് ആര്‍ക്ക്? ടോപ് ഫൈവ് ഇതാ

ആര്‍ അശ്വിന്‍

ഇന്ത്യയുടെ സീനിയര്‍ സ്പിന്‍ ഓള്‍റൗണ്ടര്‍ ആര്‍ അശ്വിനാണ് പട്ടികയില്‍ തലപ്പത്ത്. ടെസ്റ്റില്‍ 78 മത്സരത്തില്‍നിന്ന് 409 വിക്കറ്റാണ് അശ്വിന്റെ പേരിലുള്ളത്. ഇതില്‍ 279 വിക്കറ്റുകള്‍ അശ്വിന്‍ വീഴ്ത്തിയത് കോലിയുടെ ക്യാപ്റ്റന്‍സിക്ക് കീഴിലാണ്. 59 റണ്‍സ് വഴങ്ങി മൂന്ന് വിക്കറ്റ് വീഴ്ത്തിയതാണ് മികച്ച പ്രകടനം. 30 തവണ അഞ്ച് വിക്കറ്റ് പ്രകടനവും ഏഴ് തവണ 10 വിക്കറ്റ് പ്രകടനവും അശ്വിന്‍ നേടിയിട്ടുണ്ട്. അവസാന ഓസ്‌ട്രേലിയന്‍ പര്യടനത്തിലും ഇംഗ്ലണ്ട് പരമ്പരയിലും അദ്ദേഹം ഗംഭീര പ്രകടനമാണ് കാഴ്ചവെച്ചത്.

രവീന്ദ്ര ജഡജേ

ഇടം കൈയന്‍ സ്പിന്‍ ഓള്‍റൗണ്ടര്‍ രവീന്ദ്ര ജഡേജയാണ് രണ്ടാം സ്ഥാനത്ത്. 51 ടെസ്റ്റില്‍ നിന്ന് 220 വിക്കറ്റാണ് ജഡേജയുടെ പേരിലുള്ളത്. ഇതില്‍ 158 വിക്കറ്റുകളും കോലിയുടെ ക്യാപ്റ്റന്‍സിക്ക് കീഴിലായിരുന്നു. ധോണിക്ക് കീഴില്‍ ടെസ്റ്റില്‍ വലിയ അവസരം ലഭിച്ചില്ലെങ്കിലും നിലവിലെ ഇന്ത്യന്‍ ടീമിലെ നിര്‍ണ്ണായക താരമാണ് ജഡേജ. 48 റണ്‍സ് വഴങ്ങി ഏഴ് വിക്കറ്റ് വീഴ്ത്തിയതാണ് മികച്ച പ്രകടനം. 9 തവണ അഞ്ച് വിക്കറ്റ് പ്രകടനവും ഒരു തവണ 10 വിക്കറ്റ് പ്രകടനവും നടത്തിയിട്ടുണ്ട്.

മുഹമ്മദ് ഷമി

മുഹമ്മദ് ഷമിയെ ടെസ്റ്റ് ബൗളറായി വളര്‍ത്തിക്കൊണ്ടുവന്നത് വിരാട് കോലിയാണ്. ഷോര്‍ട്ട് ബോളുകളും ബൗണ്‍സറുകളും നന്നായി എറിയുന്ന ഷമി 50 ടെസ്റ്റില്‍ നിന്ന് 180 വിക്കറ്റാണ് വീഴ്ത്തിയത്. ഇതില്‍ 142 വിക്കറ്റും കോലിക്ക് കീഴിലാണ്. 56 റണ്‍സ് വഴങ്ങി ആറ് വിക്കറ്റ് വീഴ്ത്തിയതാണ് മികച്ച പ്രകടനം. അഞ്ച് തവണ അഞ്ച് വിക്കറ്റ് പ്രകടനം നടത്തിയിട്ടുണ്ട്.

ഇഷാന്ത് ശര്‍മ

വിദേശ മൈതാനങ്ങളിലെ ഇന്ത്യയുടെ കുന്തമുനയാണ് ഇഷാന്ത് ശര്‍മ. 101 ടെസ്റ്റില്‍ നിന്ന് 303 വിക്കറ്റാണ് ഇഷാന്ത് വീഴ്ത്തിയത്. ഇതില്‍ 113 വിക്കറ്റ് കോലിക്ക് കീഴിലാണ് ഇഷാന്ത് വീഴ്ത്തിയത്. ധോണിയുടെ പ്രധാന ടെസ്റ്റ് ബൗളര്‍മാരിലൊരാളായിരുന്നു ഇഷാന്ത്. 74 റണ്‍സ് വഴങ്ങി ഏഴ് വിക്കറ്റ് വീഴ്ത്തിയതാണ് മികച്ച പ്രകടനം. 11 തവണ അഞ്ച് വിക്കറ്റ് പ്രകടനവും ഒരു തവണ 10 വിക്കറ്റ് പ്രകടനവും അദ്ദേഹം നടത്തിയിട്ടുണ്ട്.

ഉമേഷ് യാദവ്

നിലവില്‍ ഇന്ത്യയുടെ ടെസ്റ്റ് ടീമില്‍ മാത്രം ഇടമുള്ള പേസറാണ് ഉമേഷ് യാദവ്. 33കാരനായ താരം 48 ടെസ്റ്റില്‍ നിന്ന് 148 വിക്കറ്റാണ് വീഴ്ത്തിയിട്ടുള്ളത്.ഇതില്‍ 96 വിക്കറ്റും കോലിയുടെ ക്യാപ്റ്റന്‍സിക്ക് കീഴിലാണ്. 88 റണ്‍സ് വഴങ്ങി ആറ് വിക്കറ്റ് വീഴ്ത്തിയതാണ് മികച്ച പ്രകടനം. അഞ്ച് തവണ മൂന്ന് വിക്കറ്റ് പ്രകടനം നടത്തിയതാരം ഒരു തവണ 10 വിക്കറ്റ് പ്രകടനവും നടത്തിയിട്ടുണ്ട്.