ഏതു ബൗളറെ നേരിടാനാണ് ഏറ്റവും പ്രയാസം? സാഹയുടെ മറുപടിയില്‍ അമ്പരന്ന് ആരാധകര്‍

എന്തായാലും കുറച്ചു വൈകിയാണെങ്കിലും ടെസ്റ്റ് പ്ലേയിങ് ഇലവനില്‍ വൃധിമാന്‍ സാഹ സ്ഥാനം തിരിച്ചുപിടിച്ചു.സ്‌ക്വാഡില്‍ പന്തുണ്ടായിട്ടും ദക്ഷിണാഫ്രിക്ക, ബംഗ്ലാദേശ് ടീമുകള്‍ക്ക് എതിരെ നടന്ന ഹോം പരമ്പരയില്‍ സാഹയായിരുന്നു ഒന്നാം കീപ്പര്‍. രണ്ടു ടെസ്റ്റ് പരമ്പരയിലും ബാറ്റിങ് മികവു പുറത്തെടുക്കാന്‍ സാഹയ്ക്ക് കാര്യമായ അവസരം കിട്ടിയില്ല. പക്ഷെ വിക്കറ്റ് കീപ്പിങ്ങില്‍ താരം അളവുകോലുകള്‍ ഉയര്‍ത്തിത്തന്നെ പിടിച്ചു.

അടുത്തവര്‍ഷം ന്യൂസിലാന്‍ഡുമായാണ് ഇന്ത്യയുടെ അടുത്ത ടെസ്റ്റ് പരമ്പര. ന്യൂസിലാന്‍ഡിലെ സാഹചര്യങ്ങള്‍ കടുപ്പമാണെന്നിരിക്കെ പന്തിന് പകരം സാഹയെ കൂട്ടിയാകും ടീം ഇന്ത്യ അങ്ങോട്ടു വിമാനം കയറുക. എന്തായാലും നിലവില്‍ താരം വിശ്രമത്തിലാണ്. പിങ്ക് ബോള്‍ ടെസ്റ്റിനിടെ സാഹയുടെ വലതു വിരലിന് പരിക്കേല്‍ക്കുകയായിരുന്നു. മുംബൈയില്‍ വെച്ച് ശസ്ത്രക്രിയ കഴിഞ്ഞു. വൈകാതെ ബെംഗളൂരുവിലെ ദേശീയ ക്രിക്കറ്റ് അക്കാദമിയില്‍ ചേര്‍ന്ന് തിരിച്ചുവരവിനുള്ള തയ്യാറെടുപ്പുകള്‍ സാഹ തുടങ്ങും.

ഒറ്റ രാത്രി കൊണ്ട് ആരും സൂപ്പര്‍ സ്റ്റാറാകില്ല, റിഷഭ് പന്തിനെ പിന്തുണച്ച് ശാസ്ത്രി

എന്തായാലും ഈ തിരക്കുകള്‍ക്കിടയില്‍ ക്രിക്കറ്റുമായി ബന്ധപ്പെട്ട വിഷയത്തില്‍ വൃധിമാന്‍ സാഹ മനസ്സു തുറന്നിരിക്കുകയാണ്. 'ഇഎസ്പിഎന്‍ ക്രിക്കിന്‍ഫോ' -യുടെ ചോദ്യങ്ങള്‍ക്ക് സാഹ നല്‍കിയ മറുപടി ക്രിക്കറ്റ് പ്രേമികളില്‍ ഒരല്‍പ്പം കൗതുകമുണര്‍ത്തുന്നുണ്ട്. 'ഏതു ബൗളറെ നേരിടാനാണ് ഏറ്റവും പ്രയാസം', സാഹയ്ക്ക് കിട്ടിയ ചോദ്യങ്ങളില്‍ ഒന്നാണിത്. ഇപ്പോഴത്തെ സ്ഥിതിക്ക് ഷമിയെയോ ഇഷാന്തിനെയോ ഉമേഷ് യാദവിനെയോ താരം പറയുമെന്ന് ഏവരും കരുതി.

പക്ഷെ സാഹയുടെ അഭിപ്രായത്തില്‍ മുന്‍ ഇന്ത്യന്‍ താരമായ അശോക് ഡിന്‍ഡയെ നേരിടുകയാണ് ഏറ്റവും ബുദ്ധിമുട്ട്. റാഷിദ് ഖാനോ രവിചന്ദ്രന്‍ അശ്വിനോ --- ആരുടെ സ്പിനെതിരെ കളിക്കാനാണ് പ്രയാസം? ഇവിടെ റാഷിദ് ഖാനെന്നാണ് സണ്‍റൈസേഴ്‌സ് ഹൈദരാബാദ് താരം കൂടിയായ സാഹ മറുപടി നല്‍കുന്നത്.ഫസ്റ്റ് സ്ലിപ്പില്‍ പൂജാര നില്‍ക്കുന്നതാണ് സാഹയ്ക്ക് കൂടുതല്‍ ഇഷ്ടം. കഴിഞ്ഞതവണ റാഞ്ചി ടെസ്റ്റില്‍ ഹേസല്‍വുഡിനെ പൂജാരയും താനും ചേര്‍ന്ന് സ്ലെഡ്ജ് ചെയ്തിരുന്നെന്നും താരം വെളിപ്പെടുത്തി.