പാകിസ്താന്റെ പ്രതികാരം: ബംഗ്ലാ കടുവകള്‍ നിലം തൊടാതെ ഓടി, തോറ്റത് 55 റണ്‍സിന്!

ഷെഹ്‌സാദ് ഈസ് ബാക്ക്

39 പന്തില്‍ മനോഹരമായ എട്ട് ബൗണ്ടറികള്‍ സഹിതമാണ് ഓപ്പണര്‍ അഹമ്മദ് ഷെഹ്‌സാദ് തിരിച്ചുവരവ് ഗംഭീരമാക്കിയത്. 52 റണ്‍സെടുത്ത ഷെഹ്‌സാദ് ഓപ്പണര്‍ ഷര്‍ജീല്‍ ഖാനൊപ്പം 2.3 ഓവറില്‍ 26 റണ്‍സിന്റെയും ഹഫീസിനൊപ്പം 95 റണ്‍സിന്റെയും കൂട്ടുകെട്ടുകള്‍ ഉണ്ടാക്കി.

മുഹമ്മദ് ഹഫീസ് തിളങ്ങി

ഹഫീസ് ഫോമിലായാല്‍ പിന്നെ പാകിസ്താന് പേടിക്കാനില്ല. 42 പന്തില്‍ 7 ഫോറും രണ്ട് സിക്‌സും പറത്തിയാണ് ഹഫീസ് 64 റണ്‍സെടുത്തത്. 16.3 ഓവറില്‍ സ്‌കോര്‍ 163 ലെത്തിയപ്പോഴാണ് ഹഫീസ് പുറത്തായത്.

അഫ്രീദിയുടെ താണ്ഡവം

വിവാദങ്ങളെല്ലാം കരയ്ക്ക് വെച്ചാണ് അഫ്രീദിയും പാകിസ്താനും കളിക്കാനിറങ്ങിയത്. ആദ്യം മിന്നല്‍ പോലെ 49 റണ്‍സ്. പിന്നാലെ നാലോവറില്‍ 27 ന് രണ്ട് വിക്കറ്റ്. പാക് ടീമിനെ മുന്നില്‍ നിന്ന് നയിച്ച അഫ്രീദി തന്നെ മാന്‍ ഓഫ് ദ മാച്ച്.

പൊരുതിയത് ഷക്കീബ്

ബംഗ്ലാദേശിന് വേണ്ടി ഷക്കീബ് അല്‍ ഹസന്‍ മാത്രമാണ് പൊരുതിയത്. 40 പന്തില്‍ 50 റണ്‍സെടുത്ത ഷക്കീബിന്റെ ഇന്നിംഗ്‌സ് പക്ഷേ ബംഗ്ലാദേശിന് ജയിക്കാന്‍ മതിയായില്ല.

ഓള്‍റൗണ്ട് പ്രകടനം

ബാറ്റിംഗിലും ബൗളിംഗിലും പാകിസ്താന്റെ ഓള്‍റൗണ്ട് പ്രകടനമായിരുന്നു കൊല്‍ക്കത്തയിലെ ഈഡന്‍ ഗാര്‍ഡനില്‍ കണ്ടത്. 19ന് ഇന്ത്യയ്‌ക്കെതിരെയാണ് പാകിസ്താന്റെ അടുത്ത കളി.