ഇന്ത്യയും വെസ്റ്റ് ഇന്‍ഡീസും ചേര്‍ന്ന് തോല്‍പ്പിച്ചു; വിരാട് കോലി ലോകകപ്പിന് പുറത്ത്!

രോഹിത് കത്തിക്കയറി

ആദ്യ രണ്ടോവറില്‍ പതുങ്ങിനിന്ന രോഹിത് ശര്‍മ മൂന്നാം ഓവറില്‍ കെട്ടുപൊട്ടിച്ചു. 31 പന്തില്‍ 3 വീതം സിക്‌സും ഫോറുമായി 43 റണ്‍സെടുത്ത ശര്‍മ പുറത്താകുമ്പോള്‍ ഇന്ത്യയുടെ സ്‌കോര്‍ 7.2 ഓവറില്‍ 62 റണ്‍സ്

ധവാന് പകരം രഹാനെ

ഫോമിലല്ലാത്ത ശിഖര്‍ ധവാന് പകരം എത്തിയ അജിന്‍ക്യ രഹാനെയും മോശമാക്കിയില്ല. 35 പന്തില്‍ 40 റണ്‍സ്. എന്നാല്‍ മുംബൈയിലെ ബാറ്റിംഗ് ട്രാക്ക് കണക്കിലെടുക്കുമ്പോള്‍ രഹാനെ കുറച്ച് കൂടി വേഗത്തില്‍ സ്‌കോര്‍ ചെയ്യണമായിരുന്നു എന്ന് കളിക്ക് ശേഷം തോന്നി. ഇന്ത്യന്‍ ടോട്ടല്‍ 20 റണ്‍സോളം കുറഞ്ഞുപോയി.

വിരാട് കോലി വീണ്ടും

വെറും 47 പന്തിലായിരുന്നു ഇത്തവണ വിരാട് കോലിയുടെ 89 റണ്‍സ്. 11 ഫോറും 1 സിക്‌സും. കോലി ഓടിയെടുത്തത് 39 റണ്‍സ്. സ്വപ്‌നതുല്യമായ ഫോമില്‍ തുടരുന്ന കോലി അവസാന ഓവറുകളില്‍ ശരിക്കും കത്തിക്കയറി.

ഗെയ്‌ലിനെ വീഴ്ത്തി

രണ്ടാമത്തെ ഓവറിലെ ഒന്നാം പന്തില്‍ ഉജ്വലമായ ഒരു പന്തിലൂടെ ജസ്പ്രീത് ഭുമ്ര ക്രിസ് ഗെയ്‌ലിനെ പുറത്താക്കി ഇന്ത്യയ്ക്ക് പ്രതീക്ഷ നല്‍കി. തൊട്ടുപിന്നാലെ നെഹ്‌റ സാമുവല്‍സിനെയും വീഴ്ത്തിയതോടെ ഇന്ത്യ ജയത്തിന്റെ പാതയിലെന്ന് തോന്നിപ്പിച്ചു.

സിമ്മണ്‍സ് വരുന്നു

സാമുവല്‍സ് പുറത്തായതിന് പിന്നാലെ ക്രീസിലെത്തിയ ലെന്‍ഡല്‍ സിമ്മണ്‍സാണ് 82 റണ്‍സെടുത്ത് ഇന്ത്യയെ തോല്‍പിച്ചത്. ഇടയ്ക്ക് അശ്വിന്റെയും പാണ്ഡ്യയുടെയും നോബോളുകളില്‍ സിമ്മണ്‍സ് ക്യാച്ച് നല്‍കിയെങ്കിലും ഭാഗ്യം രക്ഷിച്ചു.

ചാള്‍സും അടിച്ചുതകര്‍ത്തു

36 പന്തില്‍ 52 റണ്‍സായിരുന്നു ജോണ്‍സന്‍ ചാള്‍സിന്റെ സംഭാവന. ആന്‍ഡ്രെ റസല്‍ 20 പന്തില്‍ പുറത്താകാതെ 43 റണ്‍സടിച്ചു.