ആ ബൗണ്‍സര്‍ ഇന്ത്യയെയും കാത്തിരിക്കുന്നുണ്ട്!

മിച്ചല്‍ ജോണ്‍സന്‍

ഏത് ചത്ത പിച്ചിലും വെടിച്ചില്ല് പോലത്തെ പന്തെറിയും ഈ 33 കാരന്‍ ഇടംകൈയ്യന്‍ ഫാസ്റ്റ് ബൗളര്‍. കളി ഓസ്‌ട്രേലിയയിലാണെങ്കില്‍ പിന്നെ പറയാനുമില്ല. ആഷസ് ഹീറോ മിച്ചല്‍ ജോണ്‍സനാണ് ഇന്ത്യയ്‌ക്കെതിരെ ഓസ്‌ട്രേലിയയുടെ ഏറ്റവും വലിയ ആയുധം. സംശയം വേണ്ട.

സുരേഷ് റെയ്‌ന

ഏകദിനത്തിലും ട്വന്റി 20യിലും മിന്നും താരമാണ് റെയ്‌ന. എന്നാല്‍ ടെസ്റ്റ് ക്രിക്കറ്റില്‍ ആ മികവ് അത്ര കാണാനില്ല. ബൗണ്‍സറുകള്‍ക്കെതിരെ ഏറ്റവും കൂടുതല്‍ പതറുന്ന നിലവിലെ ഇന്ത്യന്‍ ബാറ്റ്‌സ്മാനാണ് റെയ്‌ന. ഫാസ്റ്റ് ബൗണ്‍സറുകള്‍ക്കെതിരെ റെയ്‌നയുടെ ഹുക്കും പുള്ളും എത്രമാത്രം വിലപ്പോകും എന്ന് കണ്ടറിയണം.

പീറ്റര്‍ സിഡില്‍

മിച്ചല്‍ ജോണ്‍സനൊപ്പം പുതിയ പന്തെടുക്കുന്നത് മിക്കവാറും പീറ്റര്‍ സിഡിലായിരിക്കും. കൃത്യതയാണ് 30 കാരന്‍ സിഡിലിന്റെ പ്രത്യേകത. സ്പീഡും ഒട്ടും മോശമല്ല.

രോഹിത് ശര്‍മ

ഫ്രണ്ട് ഫൂട്ടില്‍ ഷോട്ടുകള്‍ കളിക്കുന്ന രോഹിത് ഒരു കാഴ്ച തന്നെയാണ്. എന്നാല്‍ ബൗണ്‍സറിനെതിരെ കളി മാറും. ലിമിറ്റഡ് ഓവര്‍ കളികളില്‍ മികച്ച പുള്‍ ഷോട്ടുകള്‍ കളിക്കാറുണ്ടെങ്കിലും ടെസ്റ്റില്‍ ബൗണ്‍സര്‍ രോഹിതിന് പ്രശ്‌നം തന്നെയാണ്.

റയാന്‍ ഹാരിസ്

ഓസ്‌ട്രേലിയയുടെ മറ്റൊരു ഫാസ്റ്റ് ബൗളര്‍. 35 വയസ്. വലം കൈയന്‍ ബൗളറായ റയാന്‍ ഹാരിസിനെ ഐ പി എല്ലിലും മറ്റും കളിച്ച പരിചയമുണ്ട് ഇന്ത്യക്കാര്‍ക്ക്. എന്നാല്‍ ഓസ്‌ട്രേലിയയിലെത്തുമ്പോള്‍ ഹാരിസിന്റൈ ഭാവം മാറും.

രവീന്ദ്ര ജഡേജ

ബൗണ്‍സറിനെതിരെ പുള്ളും ഹുക്കും നിയന്ത്രിക്കാന്‍ പറ്റില്ല എന്നതാണ് ജഡ്ഡുവിന്റെ പ്രശ്‌നം. നിയന്ത്രണം കുറവാണെങ്കിലും ജഡേജ ഷോട്ടുകള്‍ക്ക് ശ്രമിച്ചുകൊണ്ടേയിരിക്കും. ഒരു തരം കിട്ടിയാല്‍ കിട്ടി മനോഭാവം.

ക്യാപ്റ്റന്‍ ധോണി

ഇന്ത്യന്‍ ക്യാപ്റ്റന്‍ ധോണിയുടെ ടെക്‌നിക്കും വളരെ ദുര്‍ബലമാണ്. ബൗണ്‍സറിനെ ഒഴിഞ്ഞുമാറിയും മറ്റുമാണ് ധോണി ടെസ്റ്റില്‍ പിടിച്ചുനില്‍ക്കുന്നത്.

പൂജാര തിളങ്ങും

ചേതേശ്വര്‍ പൂജാരയാണ് ഏത് ബൗണ്‍സറും കളിക്കാന്‍ പറ്റുന്ന ഒരു ഇന്ത്യന്‍ താരം. രാഹുല്‍ ദ്രാവിഡിനെ പോലെ തന്നെ തികഞ്ഞ ടെക്‌നീഷ്യനാണ് ഇക്കാര്യത്തില്‍ പൂജാര.