ടി20യില് മൂന്ന് പേരുടെയും ശൈലി ശരിയല്ലെന്നും വിശ്വസ്തരല്ലെന്നും എപ്പോഴൊക്കെ ടീമിന് റണ്സ് അത്യാവശം വരുന്നോ ആ സമയത്ത് വിക്കറ്റ് നഷ്ടപ്പെടുത്തുന്നവരാണ് ഈ മൂന്ന് പേരുമെന്നാണ് കപില് അഭിപ്രായപ്പെട്ടത്. 'രോഹിത് ശര്മ, വിരാട് കോലി, കെ എല് രാഹുല് ഈ മൂന്ന് പേര്ക്കും ക്രിക്കറ്റില് വലിയ പ്രശസ്തിയാണുള്ളത്. അതുകൊണ്ട് തന്നെ ഇവര്ക്ക് സമ്മര്ദ്ദവുമുണ്ട്. എന്നാല് പ്രശസ്തി പരിഗണിക്കരുത്.
ഭയമില്ലാത്ത ക്രിക്കറ്റാണ് കളിക്കേണ്ടത്. മൂന്ന് പേര്ക്കും 150-160 സ്ട്രൈക്കറേറ്റില് കളിക്കാനുള്ള മികവുണ്ട്. എപ്പോഴൊക്കെ ടീം നിര്ണ്ണായക ഘട്ടത്തില് നില്ക്കുന്നുവോ അപ്പോഴൊക്കെ ഇവര് വിക്കറ്റും നഷ്ടമാക്കുന്നു. റണ്സുയര്ത്തേണ്ട സമയത്ത് ഇവര്ക്ക് വിക്കറ്റ് കളയുന്നു. അത് ടീമിന് അധിക സമ്മര്ദ്ദം നല്കുന്നു' -അണ്കട്ട് യുട്യൂബ് ചാനലില് സംസാരിക്കവെ കപില് പറഞ്ഞു.
2021ലെ ടി20 ലോകകപ്പില് ഇന്ത്യക്ക് വലിയ തിരിച്ചടി സംഭവിച്ചതിന് കാരണം ടോപ് ത്രീയുടെ നിരാശപ്പെടുത്തുന്ന പ്രകടനമാണ്. പാകിസ്താനെതിരേ വിരാട് കോലി അര്ധ സെഞ്ച്വറി നേടിയെങ്കിലും രാഹുലും രോഹിത്തും തീര്ത്തും നിരാശപ്പെടുത്തി. ന്യൂസീലന്ഡിനെതിരേ ആര്ക്കും കാര്യമായൊന്നും ചെയ്യാനാവുന്നില്ല. സമീപകാലത്തായി ഇന്ത്യയുടെ സൂപ്പര് താരങ്ങള് പ്രധാന മത്സരങ്ങളില് തുടര്ച്ചയായി നിരാശപ്പെടുത്തുന്നുവെന്നത് വസ്തുതയാണ്. ഇതിന് മാറ്റമുണ്ടാകേണ്ടത് അത്യാവശ്യമാണ്.
വരാനിരിക്കുന്ന ലോകകപ്പിന് വേദി ഓസ്ട്രേലിയയാണ്. പേസിനെ തുണക്കുന്ന ബൗണ്സ് നിറഞ്ഞ പിച്ചുകളില് ബാറ്റ് ചെയ്യുകയെന്നത് വളരെ പ്രയാസമാവുമെന്നുറപ്പാണ്. അതുകൊണ്ട് തന്നെ അനുഭവസമ്പന്നരായ താരങ്ങളുടെ പ്രകടനത്തിലാണ് ഇന്ത്യയുടെ എല്ലാ പ്രതീക്ഷയും. രോഹിത്തും കോലിയും രാഹുലും നിരാശപ്പെടുത്തിയാല് ഇന്ത്യക്ക് 2021നെക്കാളും നാണക്കേട് ഇത്തവണ നേരിടേണ്ടി വന്നേക്കും.
കെ എല് രാഹുല് സ്ഥിരതയുള്ള ബാറ്റ്സ്മാനാണ്. വലിയ ഇന്നിങ്സുകള് കളിക്കാന് കെല്പ്പുള്ളവനാണെങ്കിലും സ്ട്രൈക്കറേറ്റ് 130 ഒക്കെയാവും ഉണ്ടാവുക. ഇത് ടീമിന് ഉപകാരത്തേക്കാള് കൂടുതല് പലപ്പോഴും ഉപദ്രവമായി മാറുന്നു. കപിലും ഇക്കാര്യമാണ് ചൂണ്ടിക്കാട്ടിയത്. 'കെ എല് രാഹുലിനെക്കുറിച്ച് പറഞ്ഞാല് ടീം അവനോട് 20 ഓവറും നിന്ന് കളിക്കണമെന്ന് പറഞ്ഞാല് 60 റണ്സുമായി തിരിച്ചുവരുന്നത് ടീമിനോട് കാട്ടുന്ന അനീതിയാണ്. എനിക്ക് തോന്നുന്നത് സമീപനം മാറണമെന്നാണ്. അതിന് തയ്യാറാവുന്നില്ലെങ്കില് താരങ്ങളെ മാറ്റണം. വലിയ താരങ്ങള് കളിക്കുമ്പോള് വലിയ ഇംപാക്ടാണ് പ്രതീക്ഷിക്കുന്നത്. അല്ലാതെ വലിയ പ്രശസ്തിയല്ല. മികച്ച പ്രകടനം നടത്തുകയാണ് വലിയ താരങ്ങള് ചെയ്യേണ്ടത്'-കപില് ദേവ് കൂട്ടിച്ചേര്ത്തു.
രോഹിത് ശര്മക്ക് ക്യാപ്റ്റനെന്ന നിലയില് വലിയ പരീക്ഷണമാവും ടി20 ലോകകപ്പ്. എടുത്തു പറയാന് സാധിക്കുന്ന താരങ്ങളേറെയാണെങ്കിലും അവര്ക്ക് അവസരത്തിനൊത്ത് ഉയരാന് സാധിക്കേണ്ടത് വളരെ പ്രധാനപ്പെട്ടതാണ്. ഇന്ത്യന് ടീമില് വലിയ മാറ്റങ്ങള് ടി20 ലോകകപ്പിന് ശേഷം സംഭവിക്കുമെന്ന കാര്യം ഉറപ്പാണ്.