യുക്തി പോലും തോറ്റുപോയ വിജയം! കണക്കിലെ കളികളെ തലകീഴ് മറിച്ച മുംബൈയുടെ തേരോട്ടം ഓർമ്മയില്ലേ..?

ക്രിക്കറ്റ് പലപ്പോഴും കണക്കിലെ കളിയാകാറുണ്ട്, അല്ലേ? പ്രത്യേകിച്ച് ഐപിഎല്ലിലേക്ക് വരുമ്പോൾ? നെറ്റ് റൺറേറ്റും പോയിന്റ്സുമെല്ലാം പലപ്പോഴും പ്ലേ ഓഫ് എന്ന കടമ്പ കടക്കാൻ അന്നും ഇന്നും വളരെ പ്രധാനപ്പെട്ടതാണ്. എന്നാൽ, കാൽക്കുലേറ്ററിനെ പോലും പരാജയപ്പെടുത്തിക്കൊണ്ട്, ഐപിഎൽ പോയിന്റ് ടേബിളിലെ കണക്കുകളെയെല്ലാം വെല്ലുവിളിച്ചുകൊണ്ട്, മുംബൈ ഇന്ത്യൻസ് നടത്തിയ ഒരു പോരാട്ടത്തിന്റെ കഥ ഐപിഎൽ ഉള്ളിടത്തോളം കാലം വാഴ്ത്തിപ്പാടും. അത് വെറുമൊരു മത്സരമായിരുന്നില്ല, എല്ലാം ക്രിക്കറ്റിൽ സാധ്യമാണ് എന്ന ഉറച്ച സ്റ്റേറ്റ്മെന്റ് പറഞ്ഞുകൊണ്ട് മുംബൈ നടത്തിയ യുദ്ധമായിരുന്നു.

ഐപിഎൽ ഏഴാം സീസണിലെ ഗ്രൂപ്പ് ഘട്ടത്തിലെ അവസാന മത്സരം. മുംബൈ ഇന്ത്യൻസും രാജസ്ഥാൻ റോയൽസും നേർക്കുനേർ. മുംബൈയിലെ വാങ്കഡെ സ്റ്റേഡിയം ഒരു അഗ്നിപർവ്വതം പോലെ തിളച്ചുമറിയുകയായിരുന്നു. ഐപിഎൽ 2014-ന്റെ പ്ലേ ഓഫ് മോഹങ്ങൾ ബാക്കിനിൽക്കണമെങ്കിൽ മുംബൈ ഇന്ത്യൻസിന് മുന്നിൽ അന്ന് ഉണ്ടായിരുന്നത് വെറുമൊരു വിജയമായിരുന്നില്ല, മറിച്ച് ക്രിക്കറ്റ് യുക്തിക്ക് നിരക്കാത്ത ഒരു സമവാക്യമായിരുന്നു.

റൺറേറ്റിന്റെ അടിസ്ഥാനത്തിൽ ആര് പ്ലേ ഓഫ് കടക്കും എന്ന് തീരുമാനിക്കുന്ന അതി നിർണായക മത്സരം. ആദ്യം ബാറ്റ് ചെയ്ത രാജസ്ഥാൻ സ്കോർ ബോർഡിൽ 190 റൺസ് അടിച്ച് കൂട്ടി. മുംബൈ ക്യാമ്പിൽ അപ്പോൾ തന്നെ ആശങ്കകൾ പുകഞ്ഞിരുന്നു. കാരണം, ടാർ​ഗറ്റ് അത്ര എളുപ്പമായിരുന്നില്ല. രാജസ്ഥാൻ റോയൽസ് ഉയർത്തിയ 190 റൺസ് എന്ന കൂറ്റൻ ലക്ഷ്യം കേവലം 14.3 ഓവറിൽ മറികടന്നാൽ മാത്രമേ മുംബൈയ്ക്ക് പ്ലേ ഓഫിലെത്താൻ കഴിയൂ. ഗാലറിയിലെ ആരാധകർ പോലും അവിശ്വസനീയതയോടെ സ്കോർബോർഡിലേക്ക് നോക്കി. 87 പന്തുകളിൽ 190 റൺസ്! അസാധ്യമെന്ന് കമന്റേറ്റർമാർ ഉറപ്പിച്ചു പറഞ്ഞ നിമിഷം.

കോറി ആൻഡേഴ്സൺ എന്ന കൊടുങ്കാറ്റ്

എന്നാൽ വാങ്കഡെയിൽ അന്ന് മറ്റൊരു തിരക്കഥയാണ് എഴുതപ്പെട്ടത്. ഓപ്പണർമാർ വേഗത്തിൽ പുറത്തായെങ്കിലും ന്യൂസിലൻഡ് താരം കോറി ആൻഡേഴ്സൺ ക്രീസിലെത്തിയതോടെ കളി മാറി. രാജസ്ഥാൻ ബൗളർമാരെ സ്റ്റേഡിയത്തിന്റെ നാനാഭാഗത്തേക്കും ആൻഡേഴ്സൺ അടിച്ചുപറത്തി. വെറും 44 പന്തിൽ നിന്ന് പുറത്താകാതെ 95 റൺസാണ് താരം അടിച്ചുകൂട്ടിയത്. അമ്പാട്ടി റായുഡുവിന്റെ (30 off 10) മിന്നൽ പ്രകടനവും മുംബൈയെ ലക്ഷ്യത്തിന് തൊട്ടടുത്തെത്തിച്ചു.

നാടകീയമായ അവസാന നിമിഷങ്ങൾ

14.2 ഓവർ പിന്നിടുമ്പോൾ മുംബൈയുടെ സ്കോർ 189-ൽ എത്തി. ലക്ഷ്യം പൂർത്തിയാക്കാൻ നിശ്ചയിച്ച സമയം അവസാനിക്കാൻ ഇനി ഒരു പന്ത് മാത്രം. പക്ഷേ അപ്പോഴാണ് നാടകീയമായി അമ്പാട്ടി റായുഡു റണ്ണൗട്ടാകുന്നത്. മുംബൈ വീണ്ടും പ്രതിസന്ധിയിലായി. പുറത്താകലിന്റെ വക്കിലെത്തി. അപ്പോഴാണ് മറ്റൊരു ഇക്വേഷൻ മുന്നോട്ട് വന്നത്. 14.3 ഓവറിൽ സ്കോർ തുല്യമായെങ്കിലും (Tie), അടുത്ത പന്തിൽ ബൗണ്ടറി നേടിയാൽ മുംബൈയ്ക്ക് റൺറേറ്റിൽ രാജസ്ഥാനെ മറികടക്കാം. ഇത് വലിയൊരു ഭാരം ആരാധകരുടെയും താരങ്ങളുടെയും നെഞ്ചിൽ വച്ച് കൊടുത്തു.

പക്ഷേ, അടുത്ത പന്തിൽ ക്രീസിലെത്തിയത് ആദിത്യ താരെ. ജെയിംസ് ഫോക്‌നർ എറിഞ്ഞ ഫുൾ ടോസ് പന്തിനെ ഒരു സിക്സറിലൂടെ അതിർത്തി കടത്തി താരെ ചരിത്രം കുറിച്ചു. ഗാലറി ഒന്നടങ്കം ഇളകിമറിഞ്ഞു. പ്ലേ ഓഫ് ഉറപ്പിച്ച സന്തോഷത്തിൽ രാജസ്ഥാൻ മെന്റർ രാഹുൽ ദ്രാവിഡ് തന്റെ തൊപ്പി ദേഷ്യത്തോടെ നിലത്തെറിഞ്ഞ ദൃശ്യം ഇന്നും ആരാധകരുടെ മനസ്സിലുണ്ട്. "ജെന്റിൽമാൻ ഓഫ് ക്രിക്കറ്റ്" എന്നറിയപ്പെടുന്ന ദ്രാവിഡിനെപ്പോലും നിയന്ത്രണം നഷ്ടപ്പെടുത്താൻ പ്രേരിപ്പിച്ച ആ 87 പന്തുകൾ ഐപിഎൽ ചരിത്രത്തിലെ സമാനതകളില്ലാത്ത പോരാട്ടമായി ഇന്നും നിലനിൽക്കുന്നു. കണക്കിനെപ്പോലും തോൽപ്പിച്ച മുംബൈയുടെ പോരാട്ട വീര്യത്തെ ഏത് ക്രിക്കറ്റ് ആരാധകനാണ് മറക്കാനാവുക?