2012ല് എംഎസ് ധോണിക്കു കീഴില് ഇന്ത്യന് ടീം ഇംഗ്ലണ്ടിനെതിരേ നാട്ടില് ടെസ്റ്റ് പരമ്പര കളിച്ചിരുന്നു. അന്നു നാലു ടെസ്റ്റുകളുടെ പരമ്പരയില് ഇംഗ്ലണ്ട് 1-2ന് ഇന്ത്യയെ തോല്പ്പിക്കുകയും ചെയ്തിരുന്നു. നാട്ടിലേറ്റ പരാജയമായതിനാല് തന്നെ ധോണിക്കും ഇന്ത്യക്കും നേരെ വലിയ വിമര്ശനങ്ങളാണ് ഉയര്ന്നത്. എന്നാല് ധോണിക്കു കട്ട സപ്പോര്ട്ടുമായി ഇര്ഫാന് രംഗത്തു വരികയായിരുന്നു.
ഇനിയവര് തിരയുക ഒരു ബലിയാടിനെ ആയിരിക്കും, അത് ധോണിയുമായിരിക്കുമെന്നായിരുന്നു ഇര്ഫാന് ട്വിറ്ററില് കുറിച്ചത്.
2017ല് ധോണി ടെസ്റ്റ് ടീമിന്റെ നായകസ്ഥാനമൊഴിഞ്ഞപ്പോഴും ഇര്ഫാന് പുകഴ്ത്തിയിരുന്നു. എന്തൊരു ക്യാപ്റ്റനാണ് നിങ്ങള് എംഎസ് ധോണി. ഏറെക്കുറെ ഒറ്റയ്ക്കു ഇന്ത്യക്കു ലോകകപ്പ് നേടിത്തന്ന നിങ്ങള് എല്ലായ്പ്പോഴും ഓര്മിക്കപ്പെടുമെന്നായിരുന്നു ഇര്ഫാന് അന്നു ട്വീറ്റ് ചെയ്തത്.
ജയത്തോടെയാണ് നാലു ടെസ്റ്റുകളുടെ പരമ്പരയ്ക്കു ഇന്ത്യ തുടക്കമിട്ടത്. നാഗ്പൂരില് നടന്ന ആദ്യ ടെസ്റ്റില് ഒമ്പത് വിക്കറ്റിന്റെ അനായാസ ജയമാണ് ധോണിയും സംഘവും കൊയ്തത്. ചേതേശ്വര് പുജാരയുടെ ഡബിള് സെഞ്ച്വറിയും വീരേന്ദര് സെവാഗിന്റെ സെഞ്ച്വറിയുമായിരുന്നു ഇന്ത്യന് വിജയത്തിന് അടിത്തറയിട്ടത്.
ആദ്യ ഇന്നിങ്സില് 521 റണ്സാണ് ഇന്ത്യ വാരിക്കൂട്ടിയത്. മറുപടിയില് 191 റണ്സിന് പുറത്തായ ഇംഗ്ലണ്ട് ഫോളോഓണ് നേരിട്ടു. തുടര്ന്നു രണ്ടാമിന്നിങ്സില് അവര് 406 റണ്സെടുത്തെങ്കിലും ഒരു വിക്കറ്റിന് ഇന്ത്യ ലക്ഷ്യം മറികടന്നു.
ആദ്യ ടെസ്റ്റില് കനത്ത തോല്വിയേറ്റു വാങ്ങിയെങ്കിലും തുടര്ന്നുള്ള മല്സരങ്ങളില് തകര്പ്പന് തിരിച്ചുവരവാണ് ഇംഗ്ലണ്ട് നടത്തിയത്. ഇന്ത്യന് വംശജനായ സ്പിന്നര് മോണ്ടി പനേസറെ രണ്ടാം ടെസ്റ്റില് ഉള്പ്പെടുത്താനുള്ള ഇംഗ്ലണ്ടിന്റെ നീക്കമാണ് വഴിത്തിരിവായത്. 11 വിക്കറ്റുകള് രണ്ടാം ടെസ്റ്റില് താരം കൊയ്തു. ഇതോടെ ഇന്ത്യയെ തകര്ത്ത് ഇംഗ്ലണ്ട് പരമ്പരയില് 1-1ന് ഒപ്പമെത്തുകയും ചെയ്തു. മൂന്നാം ടെസ്റ്റിലും ഇന്ത്യയെ ഞെട്ടിച്ച ഇംഗ്ലണ്ട് പരമ്പരയില് 2-1ന് മുന്നിലെത്തി. നാലാം ടെസ്റ്റ് സമനിലയില് കലാശിക്കുകയും ചെയ്തതോടെ ഇംഗ്ലണ്ട് പരമ്പര പോക്കറ്റിലാക്കി.
2011ലെ ഏകദിന ലോകകപ്പിനു ശേഷം ധോണിക്കു തിരിച്ചടികള് നേരിട്ടിരുന്നു. ഇംഗ്ലണ്ടിനെതിരേ മാത്രമല്ല ഓസ്ട്രേലിയക്കെതിരേയും ടെസ്റ്റ് പരമ്പര ഇന്ത്യക്കു നഷ്ടമായി. ഇതേ തുടര്ന്നു ടെസ്റ്റ് ടീമിന്റെ നായകസ്ഥാനത്തു നിന്നു ധോണിയെ മാറ്റണമെന്ന ആവശ്യം അന്നു ശക്തമാവുകയും ചെയ്തിരുന്നു.