ഇങ്ങനെ ബാറ്റ് ചെയ്താൽ തെറിക്കാതിരിക്കുമോ? ടി20 റാങ്കിംഗിലെ 'രാജാവ്' വീണത് എവിടെ? കണക്കുകൾ ഇതാ!

ഇന്ത്യൻ ടി20 ക്രിക്കറ്റ് ടീമിന്റെ നായകസ്ഥാനത്തുനിന്ന് സൂര്യകുമാർ യാദവിനെ മാറ്റാൻ പോകുന്നു എന്ന വാർത്തകൾ കായികലോകത്ത് വലിയ ചർച്ചയായിരിക്കുകയാണ്. ഇന്ത്യയെ ടി20 ലോകകപ്പ് കിരീടത്തിലേക്ക് നയിച്ചെങ്കിലും, കഴിഞ്ഞ കുറച്ചുകാലമായി താരത്തിന്റെ ബാറ്റിംഗിലുണ്ടായ ഫോമില്ലായ്മയാണ് ബിസിസിഐയെ ഇത്തരമൊരു കടുത്ത തീരുമാനത്തിലേക്ക് നയിച്ചതെന്നാണ് റിപ്പോർട്ടുകൾ. 2022, 2023 എന്നീ കരിയറിലെ സുവർണ്ണ വർഷങ്ങൾക്ക് ശേഷം 2024 മുതൽ സൂര്യകുമാറിന്റെ റൺവേട്ടയുടെ വേഗത കുറഞ്ഞിട്ടുണ്ട്.

ആകെ കളിച്ച ടി20 മത്സരങ്ങളിലെ റെക്കോർഡുകൾ

2024-ന്റെ തുടക്കം മുതൽ ഇതുവരെ ആകെ 103 ടി20 മത്സരങ്ങളാണ് സൂര്യകുമാർ കളിച്ചിട്ടുള്ളത്. ഇതിലെ 100 ഇന്നിങ്സുകളിൽ നിന്നായി 32.09 ശരാശരിയിലും 153.84 സ്ട്രൈക്ക് റേറ്റിലും 2,760 റൺസ് താരം നേടിയിട്ടുണ്ട്. ഒരു സെഞ്ച്വറിയും ഒമ്പത് അർദ്ധസെഞ്ച്വറികളും സ്വന്തമാക്കിയെങ്കിലും ഒമ്പത് തവണ റണ്ണൊന്നും എടുക്കാതെ താരം പുറത്താവുകയും ചെയ്തു. എന്നാൽ ഇന്ത്യക്കായുള്ള അന്താരാഷ്ട്ര ടി20 മത്സരങ്ങളിലേക്ക് വരുമ്പോൾ ഈ ഗ്രാഫ് വീണ്ടും താഴോട്ടാണ്. രാജ്യത്തിനായി കളിച്ച 53 മത്സരങ്ങളിൽ നിന്ന് 26.30 എന്ന സാധാരണ ശരാശരിയിൽ 1,131 റൺസ് മാത്രമാണ് സൂര്യകുമാറിന് നേടാനായത്. മുൻവർഷങ്ങളിൽ 40-ന് മുകളിലായിരുന്ന അദ്ദേഹത്തിന്റെ ശരാശരിയാണ് ഇവിടെ കുത്തനെ ഇടിഞ്ഞത്.

ഐപിഎല്ലിലും ആഭ്യന്തര ക്രിക്കറ്റിലുമുള്ള തിരിച്ചടികൾ

ഐപിഎല്ലിലും ആഭ്യന്തര ക്രിക്കറ്റിലും സമാനമായ പ്രതിസന്ധിയാണ് താരം നേരിടുന്നത്. 2024 മുതൽ മുംബൈ ഇന്ത്യൻസിന് വേണ്ടി 40 മത്സരങ്ങളിൽ നിന്ന് 1,332 റൺസ് നേടിയെങ്കിലും, തൊട്ടുമുൻപ് അവസാനിച്ച ഐപിഎൽ സീസണിൽ വെറും 20.76 ശരാശരിയിൽ 270 റൺസ് മാത്രമാണ് സൂര്യകുമാറിന് സ്കോർ ചെയ്യാൻ സാധിച്ചത്. സ്വന്തം സംസ്ഥാന ടീമായ മുംബൈയ്ക്കായി കളിച്ച 10 ആഭ്യന്തര ടി20 മത്സരങ്ങളിൽ നിന്നാകട്ടെ വെറും 297 റൺസ് മാത്രമാണ് താരത്തിന്റെ ആകെ സമ്പാദ്യം.

ടീമിലെ സ്ഥാനവും ഭാവി പ്രതിസന്ധിയും

2028-ലെ ടി20 ലോകകപ്പ് ലക്ഷ്യമിട്ട് ഒരു യുവനിരയെ വാർത്തെടുക്കാൻ സെലക്ടർമാർ ശ്രമിക്കുമ്പോൾ സൂര്യകുമാറിന് ടീമിലെ സ്ഥാനം തന്നെ നഷ്ടപ്പെടാൻ സാധ്യതയുണ്ടെന്നാണ് സൂചനകൾ. ശ്രേയസ് അയ്യരെ പുതിയ നായകനാക്കാൻ മാനേജ്‌മെന്റ് ഒരുങ്ങുമ്പോൾ, ഈ ഫോമില്ലായ്മ സൂര്യകുമാർ യാദവ് എന്ന ലോകോത്തര ബാറ്ററുടെ കരിയറിലെ ഏറ്റവും വലിയ വെല്ലുവിളിയായി മാറുകയാണ്.

കഴിഞ്ഞ ടി20 ലോകകപ്പിലും യുഎസ്എയ്ക്ക് എതിരായ ​ഗ്രൂപ്പ് മത്സരത്തിൽ നേടിയ 82 റൺസ് ഒഴിച്ചാൽ സൂര്യകുമാർ യാദവ് ദയനീയ ഫോമിലായിരുന്നു ടൂർണമെന്റിൽ ഉടനീളം ബാറ്റ് വീശിയത്. അതിന് തൊട്ടുമുമ്പുള്ള ന്യൂസിലാൻഡ് പര്യടനത്തിൽ മികച്ച രീതിയിൽ അദ്ദേഹം ബാറ്റ് വീശിയിരുന്നു. പക്ഷെ, പെട്ടന്നായിരുന്നു എല്ലാം മാറി മറിഞ്ഞത്. ക്യാപ്റ്റൻസി മാത്രമാണോ, അതോ ടീമിലെ സ്ഥാനം തന്നെ നഷ്ടപ്പെടുമോ എന്നും സൂര്യകുമാർ ആരാധകർ ഭയക്കുന്നുണ്ട്.