ജനുവരി 15 കോലിക്ക് സെഞ്ച്വറി ഡേ; തുടര്‍ച്ചയായ മൂന്നുവര്‍ഷം, എന്തൊരു താരം

ഇംഗ്ലണ്ടിനെതിരായ സെഞ്ച്വറി

2017 ജനുവരി 15ന് ഇംഗ്ലണ്ടിനെതിരെ ആയിരുന്നു കോലിയുടെ പ്രകടനം. സ്വന്തം നാട്ടില്‍ നടന്ന മൂന്നു മത്സരങ്ങളുടെ ഏകദിന പരമ്പരയിലെ ആദ്യ മത്സരത്തില്‍ കോലി ഇന്ത്യയെ ഗംഭീര വിജയത്തിലേക്കാണ് അന്ന് നയിച്ചത്. 351 റണ്‍സ് എന്ന ലക്ഷ്യത്തിലേക്ക് ബാറ്റ് ചെയ്ത് ക്യപ്റ്റന്‍ 122 റണ്‍സ് അടിച്ചുകൂട്ടി. 120 റണ്‍സുമായി കോലിക്ക് മികച്ച പിന്തുണ നല്‍കിയ കേദാര്‍ ജാദവും ഇന്ത്യന്‍ വിജയത്തിന് നിര്‍ണായക പങ്കുവഹിച്ചു.

ദക്ഷിണാഫ്രിക്കയ്‌ക്കെതിരെയും ശതകം

2018 ജനുവരി 15ന് ദക്ഷിണാഫ്രിക്കയായിരുന്നു കോലിയുടെ ബാറ്റിന്റെ ചൂടറിഞ്ഞത്. മൂന്നു മത്സരങ്ങളുടെ ടെസ്റ്റ് പരമ്പരയിലെ രണ്ടാം മത്സരത്തില്‍ കോലി 153 റണ്‍സടിച്ച് വിദേശ പിച്ചില്‍ ഒരിക്കല്‍ക്കൂടി മികവ് തെളിയിച്ചു. ആ ടെസ്റ്റില്‍ ഇന്ത്യ 72 റണ്‍സിന് തോറ്റെങ്കിലും മൂന്നാമത്തെ ടെസ്റ്റില്‍ ഇന്ത്യ ജയിച്ചിരുന്നു. 2019 ജനുവരി 15ന് അതായത് കഴിഞ്ഞദിവസം അഡ്‌ലെയ്ഡിലും കോലി ശതകം പൂര്‍ത്തിയാക്കി പുതുവര്‍ഷത്തെ സെഞ്ച്വറി കുതിപ്പ് തുടങ്ങി.

കോലി ഒരുക്കിയ വിജയം

കോലിയുടെ തകര്‍പ്പന്‍ ബാറ്റിങ് ഓസ്‌ട്രേലിയ ഉയര്‍ത്തിയ 298 എന്ന വിജയലക്ഷ്യം മറികടക്കാന്‍ ഇന്ത്യയെ സഹായിച്ചു. 49.2 ഓവറില്‍ നാല് വിക്കറ്റ് നഷ്ടത്തിലാണ് ഇന്ത്യ ജയിച്ചത്. ഇന്ത്യയ്ക്കുവേണ്ടി വിരാട് കോലി(104), എംഎസ് ധോണി(55), രോഹിത് ശര്‍മ(43), ശിഖര്‍ ധവാന്‍(32), ദിനേഷ് കാര്‍ത്തിക്(25), അമ്പാട്ടി റായിഡു(24) എന്നിവര്‍ കാര്യമായി സ്‌കോര്‍ ചെയ്തു.