പിച്ചിനെ കുറ്റം പറയുന്നവരോട് കോലിക്കും അശ്വിനും പറയാനുള്ളത്....

പിച്ചിനെ കുറ്റം പറയല്ലേ

നാഗ്പൂരിലെ പിച്ചിനെ കുറ്റം പറയാന്‍ ഒരു കാരണവും ഇല്ല എന്നാണ് ഇന്ത്യയുടെ സ്പിന്‍ കുന്തമുനയായ അശ്വിന്‍ പറയുന്നത്. രണ്ടിന്നിംഗ്‌സുകളിലുമായ 13 വിക്കറ്റുകള്‍ വീഴ്ത്തിയ അശ്വിനാണ് മാന്‍ ഓഫ് ദ മാച്ച്. ഒന്നാം ഇന്നിംഗ്‌സില്‍ അഞ്ചും രണ്ടാം ഇന്നിംഗ്‌സില്‍ എട്ടും വിക്കറ്റുകളാണ് അശ്വിന്‍ വീഴ്ത്തിയത്.

അവിടെയും ഇവിടെയും ഇരുന്ന് പറയുന്നു

പിച്ചിനെക്കുറിച്ച് ലോകത്തിന്റെ പല ഭാഗത്തും ഇരുന്നാണ് ആളുകള്‍ കമന്റുകള്‍ പാസാക്കുന്നതെന്നാണ് കോലിയുടെ അഭിപ്രായം. പിച്ച് അങ്ങനെയായിരിക്കരുത്, ഇങ്ങനെ ആകണം എന്നൊക്കെയാണ് പറയുന്നത്. അവര്‍ക്കത് പറയാനുള്ള സ്വാതന്ത്ര്യമുണ്ട്. എന്നാല്‍ ഇതെല്ലാം വെറും മാനസികാവസ്ഥയുടെ പ്രശ്‌നങ്ങളാണ്.

ആംലയും ഡുപ്ലിസിയും കളിച്ചില്ലേ

മൂന്നാം ടെസ്റ്റിന്റെ അവസാന ദിവസം ദക്ഷിണാഫ്രിക്കന്‍ ക്യാപ്റ്റനായ ഹാഷിം ആംലയും ഫാഫ് ഡുപ്ലിസിയും കളിച്ചത് ഉദാഹരണമായി എടുക്കാം. 72 റണ്‍സിന്റെ പാര്‍ട്ണര്‍ഷിപ്പാണ് ഇരുവരും ചേര്‍ന്ന് ഉണ്ടാക്കിയത്. ഒരവസരത്തില്‍ ഇന്ത്യ തോല്‍ക്കുമെന്ന തോന്നല്‍ വരെ ഇരുവരും ചേര്‍ന്ന് ഉണ്ടാക്കി. ക്ഷമയുണ്ടെങ്കില്‍ നാഗ്പൂരില്‍ ബാറ്റ് ചെയ്യാം എന്നതാണ് ഈ ഇന്നിംഗ്‌സുകള്‍ പറയുന്നത്.

ഞങ്ങള്‍ കുറ്റം പറയുന്നില്ലല്ലോ

ലോകത്തിന്റെ ഓരോ ഭാഗത്ത് പോകുമ്പോള്‍ അവിടത്തെ സാഹചര്യം അനുസരിച്ച് കളിക്കുകയാണ് വേണ്ടത്. ഞങ്ങള്‍ ഇതുവരെ ഒരു സ്ഥലത്തെ പിച്ചിനെപ്പറ്റിയും കുറ്റം പറഞ്ഞിട്ടില്ല. ഇനി പറയാനും പോകുന്നില്ല. - ഇക്കാര്യത്തില്‍ കോലിക്കും അശ്വിനും ഒരേ സ്വരമാണ്.