ശുദ്ധ അസംബന്ധം
പുതിയ റിപ്പോര്ട്ടുകള് പ്രകാരം കോലിയും രോഹിത്തും തമ്മില് ശത്രുതയിലാണെന്ന റിപ്പോര്ട്ടുകള് ശുദ്ധ അസംബന്ധമാണെന്നാണ് പറയുന്നത്. ടീമുമായി അടുത്ത ബന്ധമുള്ള ചില വൃത്തങ്ങളെ ഉദ്ധരിച്ചാണ് ഈ റിപ്പോര്ട്ട് വന്നിരിക്കുന്നത്.
ടീമില് തമ്മിലടിയുണ്ടെന്നും കോലിയും രോഹിത്തും രണ്ടു ചേരികളിലാണെന്നുമുള്ള തരത്തില് പ്രചരിക്കുന്ന റിപ്പോര്ട്ടുകളില് ഒരു സത്യവുമില്ല. പല തരത്തിലും ആളുകള് കാര്യങ്ങളെ വളച്ചൊടിക്കുകയാണെന്നും റിപ്പോര്ട്ടില് പറയുന്നു.
കോലി കളിക്കും
രോഹിത്തുമായി തനിക്ക് അഭിപ്രായവ്യത്യാസങ്ങളുണ്ടെന്ന തരത്തിലുള്ള അഭ്യൂഹങ്ങള് തെറ്റാണെന്ന് തെളിയിക്കുന്നതിനു വേണ്ടി കൂടിയാവാം വരാനിരിക്കുന്ന വെസ്റ്റ് ഇന്ഡീസ് പര്യടനത്തില് കളിക്കുമെന്ന് വിരാട് കോലി അറിയിച്ചിരിക്കുന്നതെന്നാണ് വിവരം.
നേരത്തേ കോലിക്കും എംഎസ് ധോണി, ജസ്പ്രീത് ബുംറ എന്നിവര്ക്കുമെല്ലാം വിന്ഡീസ് പര്യടനത്തില് വിശ്രമം നല്കിയേക്കുമെന്നും രോഹിത്തായിരിക്കും ടീമിനെ നയിക്കുകയെന്നും റിപ്പോര്ട്ടുകള് വന്നിരുന്നു.
ശിഖര് ധവാനും വിജയ് ശങ്കറും?
വിന്ഡീസ് പര്യടനത്തില് ഓപ്പണര് ശിഖര് ധവാനും ഓള്റൗണ്ടര് വിജയ് ശങ്കറും കളിക്കുമോയെന്ന കാര്യത്തില് വ്യക്തതയില്ല. ലോകകപ്പിനിടെ പരിക്കേറ്റതിനെ തുടര്ന്ന് ഇരുവരും നേരത്തേ നാട്ടിലേക്കു മടങ്ങിയിരുന്നു. ഫിറ്റ്നസ് തെളിയിച്ചാല് മാത്രമേ ഇവരെ വിന്ഡീസ് പര്യടനത്തിലേക്കു പരിഗണിക്കാന് സാധ്യതയുള്ളൂ. വെള്ളിയാഴ്ചയാണ് വിന്ഡീസ് പര്യടനത്തിനുള്ള ഇന്ത്യന് ടീമിനെ ബിസിസിഐ പ്രഖ്യാപിക്കുന്നത്.