മൂന്നുവീതം ട്വന്റി-20, ഏകദിന മത്സരങ്ങള് പരമ്പരയിലുണ്ട്. ഇരു ഭാഗത്തും അവസാനവട്ട ഒരുക്കങ്ങള് തകൃതിയായി നടക്കവെ ചില വ്യക്തിഗത നേട്ടങ്ങള് വിരാട് കോലിയെ കാത്തിരിപ്പുണ്ട്. പതിവുപോലെ ഈ വര്ഷവും രാജ്യാന്തര ക്രിക്കറ്റിലെ ഏറ്റവും ഉയര്ന്ന റണ്വേട്ടക്കാരനാണ് കോലി.മൂന്നു ഫോര്മാറ്റില് നിന്നുമായി 2,183 റണ്സ് ഇന്ത്യന് നായകന് കുറിച്ചുകഴിഞ്ഞു.
ഇന്ത്യന് ഓപ്പണര് രോഹിത് ശര്മ്മയാണ് കോലിക്ക് തൊട്ടുപിന്നില്. ഈ വര്ഷം ഇതുവരെയുള്ള കണക്കുകള് പ്രകാരം 2,090 റണ്സ് ഹിറ്റ്മാന് സ്വന്തമാക്കിയിട്ടുണ്ട്. പാകിസ്താന്റെ ബാബര് അസമാണ് 1,820 റണ്സുമായി പട്ടികയില് മൂന്നാമത്. എന്തായാലും 2019 -ല് ആറു മത്സരങ്ങള് ഇനിയും ബാക്കിനില്ക്കെ പതിവ് ആവര്ത്തിക്കാനുള്ള പുറപ്പാടിലാണ് ഇന്ത്യന് നായകന്. കഴിഞ്ഞ മൂന്നു വര്ഷവും കോലിയായിരുന്നു രാജ്യാന്തര ക്രിക്കറ്റിലെ റണ്വേട്ടക്കാരന്.
2016 -ല് 2,595 റണ്സ് നേടിയ കോലി തൊട്ടടുത്ത വര്ഷം 2,818 റണ്സ് കൈയ്യടക്കി നേട്ടം നിലനിര്ത്തി. 2018 -ല് 2,735 റണ്സായിരുന്നു ഇന്ത്യന് നായകന് അടിച്ചെടുത്തത്.എന്നാല് ഇത്തവണ കോലിയുടെ റെക്കോര്ഡ് കുതിപ്പിന് തടയിടാന് രോഹിത് ശര്മ്മയ്ക്ക് കഴിഞ്ഞേക്കും. ട്വന്റി-20, ഏകദിന ഫോര്മാറ്റുകളില് തിളങ്ങി നില്ക്കുകയാണ് രോഹിത്. നിലവില് 93 റണ്സിന്റെ വ്യത്യാസം മാത്രമേ കോലിയും രോഹിത്തും തമ്മിലുള്ളൂ.
നടക്കാനിരിക്കുന്ന ട്വന്റി-20, ഏകദിന പരമ്പരകളില് ഇരു താരങ്ങളും മുഴുനീളം കളിക്കും. മറുഭാഗത്ത് കോലിയെ മറികടക്കാന് ബാബര് അസമിന് കഴിയുമോയെന്ന കാര്യം സംശയമാണ്. കാരണം ശ്രീലങ്കയുമായി ടെസ്റ്റ് പരമ്പരയാണ് ഈ വര്ഷം പാകിസ്താന് ബാക്കിയുള്ളത്. നാലു ഇന്നിങ്സുകള്കൊണ്ട് കോലിയെ പിന്നിലാക്കാന് ബാബര് അസമിന് കഴിയുമോയെന്ന് കണ്ടറിയണം.
ഇതേസമയം, ബാബര് അസമിനെ മറികടന്ന് ഇംഗ്ലണ്ട് ക്യാപ്റ്റന് ജോ റൂട്ട് റണ്വേട്ടക്കാരില് മൂന്നാമനാവാനും സാധ്യതയുണ്ട്. നിലവില് 30 റണ്സിന്റെ ദൂരം മാത്രമേ ഇരുവരും തമ്മിലുള്ളൂ. ഇംഗ്ലണ്ടും ദക്ഷിണാഫ്രിക്കയും തമ്മിലെ ബോക്സിങ് ഡേ ടെസ്റ്റ് സമവാക്യങ്ങള് തിരുത്താം.