താരങ്ങൾ തന്നെ തുറന്നുപറഞ്ഞു
ഡിസംബർ 11ന് തിങ്കളാഴ്ച ഇറ്റലിയിലാണ് വിരാട് കോലിയും അനുഷ്ക ശർമയും വിവാഹിതരായത്. തിങ്കളാഴ്ച വൈകുന്നേരത്തോടെ വിരാട് കോലിയും അനുഷ്ക ശർമയും തങ്ങളുടെ ട്വിറ്റർ അക്കൗണ്ടുകൾ വഴി വിവാഹ വാർത്ത ആരാധകരെ അറിയിക്കുകയും ചെയ്തു. ഒരേ സന്ദേശമാണ് ഇരുവരും ട്വിറ്ററിൽ പോസ്റ്റ് ചെയ്തത്. ഇതോടെ താരദമ്പതികൾക്ക് ആശംസാപ്രവാഹങ്ങളുമായി ആളുകളെത്തിത്തുടങ്ങി.
ക്രിക്കറ്റിലെ പ്രിയ കൂട്ടുകാർ
ഇന്ത്യൻ ക്രിക്കറ്റ് ടീമിൽ വിരാടിന്റെ സഹതാരങ്ങളായ ശിഖർ ധവാൻ, ചേതേശ്വർ പൂജാര, ഉമേഷ് യാദവ്, ഹർഭജൻ സിംഗ് തുടങ്ങിയവർ താദമ്പതികൾക്ക് ആശംസകളുമായി എത്തി. മുൻതാരവും കമന്റേറ്ററുമായ ആകാശ് ചോപ്രയും വിരാട് - അനുഷ്ക ദമ്പതികൾക്ക് ആശംസയറിയിച്ചു. ലവ്ലി കപ്പിള് എന്നായിരുന്നു ശിഖർ ധവാൻ അനുഷ്കയെയും വിരാടിനെയും വിളിച്ചത്.
മെഗാതാരങ്ങളും
ക്രിക്കറ്റ് ഇതിഹാസം സച്ചിൻ തെണ്ടുൽക്കർ വിരാടിന് ആശംസ അറിയിച്ചു. കൺഗ്രാജുലേഷനും ഓൾ ദി ബെസ്റ്റും അറിയിച്ച സച്ചിൻ രണ്ടുപേരെയും ഒരുമിച്ച് കാണാൻ മനോഹരമായിട്ടുണ്ടെന്നും പറഞ്ഞു. ബി സി സി ഐ ഒഫീഷ്യൽ അക്കൗണ്ടിലൂടെ തങ്ങളുടെ ക്യാപ്റ്റനെ ആശംസ അറിയിച്ചു. പാക് ക്രിക്കറ്റ് താരം ഷാഹിദ് അഫ്രീദി, ബാഡ്മിന്റൺ താരം സൈന നേവാൾ തുടങ്ങിയവരും വിരാടിനും അനുഷ്കയ്ക്കും ആശംസ അറിയിച്ച് ട്വീറ്റ് ചെയ്തു.
ബോളിവുഡിൽ നിന്നും
താരരാജാവ് അമിതാബ് ബച്ചൻ, ഷാരൂഖ് ഖാൻ, പ്രിയങ്ക ചോപ്ര, മാധുരി ദീക്ഷിത്, ഷാഹിദ് കപൂർ, അനിൽ കപൂർ, വരുൺ ധവാൻ, അഭിഷേക് ബച്ചൻ, പരിണീതി ചോപ്ര, നേഹ ധൂപിയ, ശ്രീദേവി എന്നിങ്ങനെ വൻ താര നിര തന്നെ ബോളിവുഡിൽ നിന്നും താരവിവാഹത്തിന് ആശംസകൾ അറിയിച്ച് എത്തി. രാഷ്ട്രീയ നേതാക്കളായ ജോതിരാദിത്യ സിന്ധ്യ, അനുരാഗ് താക്കൂർ എന്നിവരും ആശംകളറിയിച്ചു.