വിജയ് ശങ്കറിന്റെ ബൗളിങ്
അതേസമയം, വിജയ് ശങ്കറിന് ബൗളിങ്ങില് ഇനിയും മികച്ച പ്രകടനം നടത്താനായിട്ടില്ല. വിരാട് കോലിയും രോഹിത് ശര്മയും താരത്തെ 10 ഓവറും പന്തെറിയാന് അനുവദിക്കാത്തത് പന്തേറിലുള്ള വിശ്വാസക്കുറവുകൊണ്ടുകൂടിയാണ്. ന്യൂസിലന്ഡിനെതിരായ ടി20യില് ഒരോവര് പോലും നല്കിയതുമില്ല. പന്തേറില് കൂടുതല് കൃത്യത കാട്ടാനായാല് വിജയ് ശങ്കറിന് ഹാര്ദിക്കിനൊപ്പം ഉയരാനാകും.
വിജയ് ശങ്കറും പാണ്ഡ്യയും
ലോകകപ്പില് ഉള്പ്പെടുത്തുന്നതിന് മുന്നോടിയായി വിജയ് ശങ്കറിന് കൂടുതല് അവസരം നല്കണമെന്നാണ് ഗാവസ്കര് പറയുന്നത്. ജസ്പ്രീത് ബുംറ, ഭുവനേശ്വര് കുമാര്, മുഹമ്മദ് ഷമി എന്നിവരാണ് ലോകകപ്പില് ഉള്പ്പെടാന് സാധ്യതയുള്ള സീമര്മാര്. ഇവര്ക്കൊപ്പം വിജയ് ശങ്കറും ഹാര്ദിക് പാണ്ഡ്യയും ചേരുന്നതോടെ ഇന്ത്യന് ടീമിന് കൂടുതല് കരുത്തുലഭിക്കുമെന്ന് ഗാവസ്കര് ചൂണ്ടിക്കാട്ടി.
ലക്ഷ്യം ലോകകപ്പ്
ന്യൂസിലന്ഡിനെതിരെ നടന്നുകൊണ്ടിരിക്കുന്ന ടി20 പരമ്പരയില് ഇന്ത്യ തോറ്റാലും നിരാശയില്ലെന്ന് ഗാവസ്കര് പറഞ്ഞിരുന്നു. ഇന്ത്യയുടെ ലോകപ്പിനുള്ള ഒരുക്കത്തിനാണ് പ്രാധാന്യമെന്ന് ഗാവസ്കര് വ്യക്തമാക്കി. ലോകകപ്പിന് മുന്നോടിയായുള്ള പരീക്ഷണങ്ങളുടെ കാലമാണിത്. ടി20 പരമ്പരയില് ഏകദിന മത്സരങ്ങള്ക്ക് യോജിച്ചവരെ കണ്ടെത്താന് കഴിയും. വിജയ് ശങ്കര്, ഋഷഭ് പന്ത്, ക്രുനാല് പാണ്ഡ്യ തുടങ്ങിയവര്ക്ക് കഴിവ് തെളിയിക്കാനുള്ള അവസരം കൂടിയാണിത്. സമ്മര്ദ്ദ ഘട്ടങ്ങളില് അവര് എങ്ങിനെ കളിക്കുന്നു എന്നതും പ്രധാനമാണെന്ന് ഗാവസ്കര് ചൂണ്ടിക്കാട്ടി.