വെള്ളിയാഴ്ച മുതല് ക്രൈസ്റ്റ്ചര്ച്ചിലാണ് രണ്ടാം ടെസ്റ്റ് ആരംഭിക്കുന്നത്. ആദ്യ ടെസ്റ്റില് ഷോര്ട്ട് ബോളുകളെറിഞ്ഞാണ് കിവി ബൗളര്മാര് ഇന്ത്യയുടെ കഥ കഴിച്ചത്. രണ്ടാം ടെസ്റ്റിലും തങ്ങള് ഇതേ തന്ത്രം തന്നെ ആവര്ത്തിക്കുമെന്നു വാഗ്നര് വ്യക്തമാക്കി.
പേസും ബൗണ്സുമുള്ള ഇവിടുത്തെ പിച്ചില് ഇന്ത്യന് ബാറ്റിങ് നിരയ്ക്കു പിടിച്ചുനില്ക്കുക ദുഷ്കരമായിരിക്കുമെന്നും പേസര് ചൂണ്ടിക്കാട്ടി.
ന്യൂസിലാന്ഡില് കളിക്കുകയെന്നത് ഇന്ത്യയെ സംബന്ധിച്ച് എളുപ്പമുള്ള കാര്യമല്ല. ഇന്ത്യയില് കളിക്കുമ്പോള് ഇവിടുത്തേതു പോലെ പേസും ബൗണ്സും ഉണ്ടാവില്ല. അതുകൊണ്ടു തന്നെയാണ് ഇവിടെ പുതിയ സാഹചര്യങ്ങളെ നേരിടുമ്പോള് ഇന്ത്യ പതറുന്നതെന്നും വാഗ്നര് അഭിപ്രായപ്പെട്ടു.
ആദ്യ ടെസ്റ്റിനെ അപേക്ഷിച്ച് കൂടുതല് മികച്ച പ്രകടനം ഇന്ത്യ പുറത്തെടുക്കുമെന്ന് പറഞ്ഞ വാഗ്നര് കിവീസ് ആദ്യ ടെസ്റ്റിലെ അതേ പ്രകടനം ആവര്ത്തിക്കുമെന്നും മുന്നറിയിപ്പ് നല്കി.
രണ്ടാം ടെസ്റ്റില് ഇന്ത്യ ശക്തമായ തിരിച്ചുവരവ് തന്നെ നടത്തുമെന്നാണ് തങ്ങളും പ്രതീക്ഷിക്കുന്നതെന്നു ന്യൂസിലാന്ഡ് കോച്ച് ഗാരി സ്റ്റെഡ് പറഞ്ഞു. ആദ്യ ടെസ്റ്റിനെപ്പോലെ മികച്ച ബൗളിങിലൂടെ ഇന്ത്യയെ നിരന്തരം സമ്മര്ദ്ദത്തിലാക്കാനായിരിക്കും തങ്ങളുടെ ശ്രമം. അതില് വിജയിക്കുകയാണെങ്കില് രണ്ടാം ടെസ്റ്റിലും കാര്യങ്ങള് തങ്ങള്ക്കു അനുകൂലമായി മാറുമെന്നും കോച്ച് വിശധമാക്കി.
ഈ ടെസ്റ്റ് പരമ്പരയ്ക്കു ദൈര്ഘ്യം കുറവാണ്. അതുകൊണ്ടു തന്നെ സാഹചര്യങ്ങളുമായി പൊരുത്തപ്പെട്ട് മികച്ച പ്രകടനം നടത്താന് ഇന്ത്യയുടെ പക്കല് സമയവും കുറവാണെന്നു സ്റ്റെഡ് ചൂണ്ടിക്കാട്ടി.
വിദേശത്തു ചിലപ്പോള് ടെസ്റ്റ് കളിക്കുമ്പോള് ഒന്നോ, രണ്ടോ ടെസ്റ്റുകള്ക്കു ശേഷം മാത്രമേ ടീമിനു സാഹചര്യങ്ങളുമായി പൊരുത്തപ്പെടാന് കഴിയൂ. എങ്കിലും ഇന്ത്യ അടുത്ത ടെസ്റ്റില് ശക്തമായ തിരിച്ചുവരവ് നടത്തുമെന്നാണ് താന് പ്രതീക്ഷിക്കുന്നതെന്നും അദ്ദേഹം കൂട്ടിച്ചേര്ത്തു.