2010നു ശേഷമുള്ള കണക്കുകള് പരിശോധിച്ചാല് സ്വന്തം നാട്ടില് ഓസ്ട്രേലിയ കളിച്ച 29 ടെസ്റ്റുകളില് ഓസ്ട്രേലിയക്കായിരുന്നു ടോസ്. ഇവയില് 21ലും ഓസീസിനു ജയിക്കാന് കഴിഞ്ഞു.
ന്യൂസിലാന്ഡിന്റെ കണക്കുകള് ഇതിനേക്കാള് ശ്രദ്ധേയമാണ്. സ്വന്തം നാട്ടില് ടോസ് അനുകൂലമായി വന്ന 17 ടെസ്റ്റുകളില് 10ലും കിവീസ് വെന്നിക്കൊടി പാറിച്ചിട്ടുണ്ട്. ടോസ് ലഭിച്ച ഒരു ടെസ്റ്റില് പ്പോലും ന്യൂസിലാന്ഡ് തോറ്റിട്ടില്ലെന്നതും എടുത്തു പറയേണ്ട കാര്യമാണ്.
സ്വന്തം നാട്ടില് കളിച്ച ടെസ്റ്റുകള് പരിഗണിക്കുമ്പോള് ഇന്ത്യയുടെ കാര്യത്തിലും ടോസ് നിര്ണായകമായി മാറിയിട്ടുണ്ട്. നാട്ടില് 23 ടെസ്റ്റുകളിലാണ് ഇന്ത്യക്കു ടോസ് ലഭിച്ചത്. ഇതില് 18ലും ഇന്ത്യ വിജയിക്കുകയും ചെയ്തിട്ടുണ്ട്. ടോസ് ലഭിപ്പോള് വെറും രണ്ടു ടെസ്റ്റുകളില് മാത്രമേ നാട്ടില് ഇന്ത്യ പരാജയപ്പെട്ടിട്ടുള്ളൂ.
വെല്ലിങ്ടണ് ടെസ്റ്റിലെ വന് പരാജയത്തിനു ശേഷം ടോസിന്റെ പ്രാധാന്യം കോലി ചൂണ്ടിക്കാട്ടിയിരുന്നു. ആദ്യദിനത്തില് ടോസ് ഒരു ടീമിനെ സംബന്ധിച്ചു വളരെ പ്രധാനപ്പെട്ടതു തന്നെയാണ്. എന്നാല് ബാറ്റിങ് നിരയുടെ മോശം പ്രകടനം കണ്ടില്ലെന്നു നടിക്കുന്നില്ല. ആദ്യ ഇന്നിങ്സില് 220-230 റണ്സെങ്കിലും നേടാന് കഴിഞ്ഞിരുന്നെങ്കില് ന്യൂസിലാന്ഡിനെ സമ്മര്ദ്ദത്തിലാക്കാന് സാധിക്കമായിരുന്നെന്നും കോലി വിശദമാക്കിയിരുന്നു.
ഇന്ത്യയും ന്യൂസിലാന്ഡും തമ്മിലുള്ള ടെസ്റ്റ് പരമ്പരയിലെ രണ്ടാമത്തെയും അവസാനത്തെയും ടെസ്റ്റ് വെള്ളിയാഴ്ച മുതല് ക്രൈസ്റ്റ്ചര്ച്ചിലാണ്. പരമ്പര കൈവിടാതിരിക്കാന് ഇന്ത്യക്കു ഈ ടെസ്റ്റില് ജയിച്ചേ തീരൂ. മറുഭാഗത്ത് സമനില പോലും തങ്ങള്ക്കു പരമ്പര സമ്മാനിക്കുമെന്ന ആത്മവിശ്വാസത്തിലാവും കിവീസ് ഇറങ്ങുക. തോല്ക്കുകയാണെങ്കില് ലോക ടെസ്റ്റ് ചാംപ്യന്ഷിപ്പില് ഇന്ത്യയുടെ ആദ്യത്തെ പരമ്പര നഷ്ടം കൂടിയായിരിക്കും അത്.